Mizoram Journalist Association (MJA) leh Zonet ṭangkawpten an buatsaih Miss Mizoram 2018 thlanna chu Nilaini zan khan R. Dengthuama Hall-ah Grand Finale neih a ni a, North Khawbung nula C. Ramthanmawii (Thanthan-i) chu Miss Mizoram 2018 atan thlan a ni. Thanthan-i hi Miss Mizoram 2017 Rody H. Vanlalhriatpuii chuan chuan Crown a khum tir a ni.
1st Runner Up chu ITI Veng nula C. Lallawmzuali a ni a, 2nd Runner Up chu CT Malsawmsangi a ni. Miss Mizoram 2018 atana Thanthan-i thlan a nih tak avangin North Khawbung khua chuan an la tawn ngai loh Miss Mizoram Crown an kawl rih dawn ta a ni.
Grand Finale hi R.Dengthuama Hall-ah neih a ni a, Rini Hlawndo chuan zei takin a host. Amtea chuan fuh fa hranin bul a rawn ṭan a, show boruak a fuh chho nghal. Contestant 12 ten intiahsiak an hmachhawn zui a, an zing aṭang hiana tiṭha zual pariat thlan chhuah an ni. Top 8 te hian intiahsiak an hmachhawn zui leh a, a kar lakah hian zaithiam zai ngaihthlak tur a awm. Zaithiamte hi an zai sa tliah lo a, an perform a hmuhnawmin mit leh beng a tlai hle. Contestant ten lawm an hlawh hle a, stage-a an chhuahin thawm a ring ṭhin hle. Designer kut chhuak thawmhnaw mawi tak tak inbela an che vel hi a hmuhnawm a, thawm a ring pawh hi a mak lo.
Top 8 aṭang hian top 5 thlan chhuah leh an ni a, Miss ni thei tur thlitfim zel an ni. Top 5-ah hian T. Ramthanmawii, C.Lallwmzuali, Lily Lalremkimi Darnei, CT Malsawmsangi leh Josephine Lalnunfeli te an imnhlangkai. Anni hian zawhna zawttu tur judge an pawt a, boruak a ṭang hle. Contest te hi an ṭhat tlan avangin judge ten zawhna an zawh an chhan danin kawngro a su hle a, top 5 chinte phei chuan zawhna pawh hi an chhang ṭha hlawm viau. Thanthani-i chuan judge zinga mi Charlie Mathlena zawhna chu ṭha takin a chhang a, Miss Mizoram a nih phahna chhan ti pawhin a sawi theih awm e. Than thani hian zawhna a chhang ṭha thei viau a, Grand Finale bikah chuan mimala che ṭha ber tih ngam a ni.
Mizorama show awm tawh zinga pui ber tih ngamah hi a hmuhnawm hle a, a hmuna kal leh tv lama lo thlirtute mit a tlung hle a ni.
Lawmman
Miss Mizoram hian lawmman pawisa fai Rs. 1,10,000 leh Vespa Scooter a dawng. Hei bakah hian sponsor tute aṭangin Vivo Phone a dawng bawk a, Miss atan thlan a nih avang hian Dubai a la zin thei dawn cheu bawk. 1st Runner Up C. lallawmzuali henah Rs. 50,000 leh Vivo phone hlan a ni a, 1st Runner Up CT Malsawmtluangi chu Rs. 30,000 leh Vivo phone hlan a ni bawk ang. Sub-title latuten Rs.15,000 ṭheuh an dawng a, a tel zawng zawngten Rs. 10,000 an dawng ṭheuh bawk. -Vanglaini
Post a Comment