UPC (North East India) rorelna sang ber General Conference vawi 50-na chu April 5, 2018 zan khan Aizawla Electric Veng YMA Hall-ah ṭan a ni a, nizan khan a ṭiak. UPC (NEI) hian an kohhran chhungkuaah fa nei tam tura inzirtir an rel.
UPC General Conference-ah hian April 7, Inrinni khan rorel inkhawm neih a ni a, general superintendent Rev. Lalmalsawma Sailo-in kaihruaiin, rorel palai mi 260 chuang an tel. 'NEI UPC kohhran chhungkuaah fa nei tam tura inzirtir ni se la, Executive Board-in lo zir chiangin, a bawhzui dan tur ruahmanna lo siam se,' tiin an rêl a ni.
Inrinni zing karah kum 2018-2019 chhunga UPC (NEI) hruaitu turte an thleng a; general superintendent atan Rev. Lalmalsawma Sailo, general secretary atan Rev. R Lalrinsanga leh general treasurer atan Rev. Zohmingthanzama te an thlang.
Conference report-a a lan danin, UPC (NEI)-ah hian district 11-ah member 1,04,889 awmin, chhungkua 25,527 an awm a; tualchhung kohhran 747 leh preaching point 122 a awm mek. Kum 2017 chhungin member 6,037-in an pung a, rawngbawlna licence kawl mi 1,015 an awm a ni.-Vanglaini
Post a Comment