Chief Minister Pu Lal Thanhawla chuan vawiin khan Thenzawl Sports Festival 2018 chu Lothazawl Volleyball Pavilion-ah a khar a, lawmman a sem nghal a ni. He Sports Festival hi Thenzawl Sports Committee buatsaih niin, anni hian Chief Minister hnenah hian CM Relief Fund a chhun tur Rs. 10,000 an hlan nghal a ni.
Chief Minister chuan infiamna, games & sports a hmasawnna chu ram changkannna tehfung tha tak a ni, a ti a. Mizoramah pawh thalaite tan khawvel thar siam turin sawrkarin hma la in, a bik takin infiamna lamah discipline hrang hrang tih hmasawn nan hmunhma tha leh changtlung tak tak district hrang hranga siam a nih thu a tarlang a. Chutihrual chuan infrastructure tha tak siam chu a tawklo a, a hmangtu tur leh hman nachang hria an awm a ngai tel a ni, a ti. Infiamna khawvela hlawhtling tluantling tur chuan a thei leh thiam fal bik nih mai piah lamah chhunglam leh pawnlam nun uluk te, ei leh in a fimkhur a, zuk leh hmuam leh ruihtheih thil laka fihlim te a pawimawh tel hle a ni, a ti a. Mizoramah cancer leh nunphungin a zirloh avanga natna khirh tak tak vei kan tam tak em avangin infiammi te mai nilo mipui pawhin nun phung hrisel zawk neih tuma kan nun theuh a hmasawn kan tum a tul a ni, a ti bawk.
Tun dinhmunah Mizoramah hnathawk thei leh thawktu zingah a tam zawk thalai an nih avangin Mizoram chuan workforce a neih that thu Chief Minister chuan a sawi a. NEDP kaltlangin thalaite zingah eizawnna thar hlawk tak tak la ni thei tur te ngaihtuahchhuak a bul tan an awm thu te tarlangin, chutiang chuan ngaihtuahna te seng zel tura thangtharte a duh thu sawiin, state pawhin chak zawka hmasawn theihna potential a nei thu a sawi. Chutiang bawk chuan infiamna pawh eizawnna kawng tha tak a nih avangin a tui mi leh a thei te chuan tumruhna leh taimakna nen hlawhtlin ngei tumin bei zui zel tura a duhsak thu a sawi bawk.
Thenzawl Sports Festival 2018 ah hian Thenzawl YMA Branch pariat tel theiin, infiamna discipline hrang hrang pakuaah inelna neih a ni a. Individual prize sem anih bakah a pumpuia ti tha ber YMA Branch ten Tea Urn set an dawnga, pahnihna leh pathumna ten dekchi dawngin an pathum hian pawisafai an dawng vek a. Consolation prize siam a ni bawk a ni.-DIPR
Post a Comment