MPSC Challenge Inter College Quiz Competition 2018 HBC an champion zawn
MPSC Challenge Inter College Quiz Comeptition 2018 chu April 6, Zirtawpni zan khan zawhfel a ni ta a, Govt. Hrangbana College chuan Pachhunga University College hnehin a zawnin an champion.
HBC hi MPSC Challenge Inter College Quiz Competition-ah a zawna champion thei hmasa ber an ni a, PUC lakah pawh hian phu takin hnenahna an chang a ni. Hetih rual hian round hmasa lama che ṭha zawk chu PUC an ni a, mahse a tawp lamah HBC hian an lehthal leh a ni.
Grand Finale zan hian HBC aiawha tel Malsawmkimi chu 'Best Quizee' atan thlan a ni a, zawhna pariat a chhang dik. Malsawmkimi hi Grand Finale-a hmeichhe inlan awm chhun a ni bawk. Hetih lai hian MPSC Challenge Inter College Quiz Comeptition-a la tel kim vek, PUC zirlai Christopher Rodingpuia chu zawhna chhang dik hnem ber a ni a, zawhna 31 a chhang dik. Christopher-a hi 'Best Quizee of 2018' atan thlan a ni a, lawmman pawisafai leh trophy a dawng a ni.
Grand Finale hi Ignite Studio, Khatla-ah neih a ni a, a hmunah leh TV kaltanga lo entu an ṭhahnem hle. HBC leh PUC zirlai leh zirtirtu eng emaw zat chuan an College-ah a huhoin an en bawk.
Mizo Students' Union (MSU) leh Mizoram Public Service Commission (MPSC) ṭangkawp chuan All India Civil Service-ah Mizo ṭhalai tam zawk inziahtlin theih beiseiin kum 2016 aṭang khan quiz competition hi an buatsaih ṭan a, kumtin neih chhoh zel tur a ni. Gov't Champhai College chu champion hmasa ber an ni a, HBC chu ṭum hnih an champion tawh. Heng college pahnih hi champion thei awm chhun an ni. Kuminah hian zirna-in 18 zet an tel a ni. -Vanglaini
Post a Comment