1.ȚAWNGTAI ZEI -
A bikin Biak In Programme leh inkhawmpui nikhuain heng țawngtai zei te hi an hriat hle. An biak chunglam aiin țawngtai ngaithlatu mipui lam an ngaichang zawk thin. An thuchham chu a fel thak mai a, a hul phak bawk thin. Muang fán deuh raih, tawi fel takin an han ti kual a, țawngtaina nalh tak a ni pawh a tih theih ang. Mipui Amen hnu ah fiah bung nghutin Amen an ti ve țhin.
2. ȚAWNGȚAI CHAPO -
Ring tak takin bula mite tibuai thei khawpin Biak Inah te, Kohhran Programme eng eng emaw ahte țawngtairualna ah an țawngtai țhin. Heng ho hian an sawi ngai an sawi nawn tlut tlut țhin. Chhuat te an chum a, an kut an phar a, an vai fua fua thin. An bula tih takzeta tawngtai ve tur chuan beng hup a ngai thin. Pathian chu Order an pe nasa thei hle a, "ANG CHE!!" an ti pawr bung nghut thin.Heng bei ring thei fu fu te hian an chhungkua chauha chhung inkhawm an hmanna leh chaw eidawn mut dawn tawngtaiah chuan mi an tlem tawh avangin rik pawh ri mang lo leh tawi takin an țawngtai ve leh lawi thin.
3.HNU KHAR TUM RÂN ȚAWNGȚAI -
Hengho țawngtai hian tum an neisa ran a, khawi hmun pawh nise hnu khar tum ranin tawngtai rualna ah an tawngtai thin. A tirah chuan an tawngtai ring vak lova, anmahni chauh an ni ta maw tih ah chuan awki an ti sang sauh sauh a, tu emaw tih chhan deuh ranin an tawngtai loh leh an áng chet ti tih a, an Pathian thu hriat zawng zawng an chham chhuak a, mi in ngaihbel ram ram na turin an tawngtai ngheng thin. Amen an lo pek that deuh phei chuan an phur tawlh tawlh a, an țap thul, mahni chauhin a bei nghek tawh mai thin.
4.PATHIAN, PATHIAN THU HRILH ȚAWNGȚAI
Țhenkhat tawngtai chuan Pathian hi Pathian thu an hrilh nghek thin. "I thu chuan chutiang khatiang chuan min ti si a, a va pawimawh tak em" te an ti kual a, an biak Pathian ber chu Pathian thu an hrilh let nek bawk thin. Kan va in daihzai tak !!
5."LAWMTHU KAN HRILH CHE" -
Kan țawngtaina ah hian a taka kan tih ngai mang loh țawngtai țawngkam kan nei a, 'Lawmthu kan hrilh a che' tih hi a ni. Vai ho pawh hian a taka an tih miah loh Film ah erawh khel lova kan hmuh a awm a, zai paha inchhai hi a ni. A tak takah chuan 'Ka lawm e aw' 'Kan lawm tak zet a ni' 'Ka lawm lutuk aw' kan ti thin. Kan lawm takzet a nih chuan 'Ka lawm lutuk e aw' tih lawm lawm awm tak hi 'Lawmthu ka/kan hrilh a che' kan ti daih zel bawk. Kan lawm tak zetna hrilh lovin LAWMTHU tih ringawt hi dan angin kan hrilh lek fang thin.
6.MITEN CHUTIANG KHATIANG -
"Mite damdawiin/Jail/thihna an tawh laiin keini chhung/Kohhran erawh chu..." tih kan ching thin hian miten harsatna an tawh chu vanduainaah ngaih sakin a tawk ve lo keini chu Vannei em em,Pathian malsawm tlak bik, awmpui bik ah kan inhmu tih hi a chiang khawp mai. Nang anga vannei tluang purh purh tuihnang lo zet ai chuan vanduai zawka i ngaih, Cancer, natna hrang hrang tawk mek, thihna in a tuam mek, Jail rûn bel tute khan an thil tawn avangin nang aiin an hlim a, Chunglam an hnaih zawk thei a, pawnlama i en ang ai khan nang aiin vannei an in ti zawk daih thei zu nia !!
7.MI TLAWN ȚAWNGȚAINA -
Mihlim inti tam tak hian pachhia retheite chhuat ai chuan hausa leh challangte chhuat an beng zing zawk duh khawp mai. An mi tawngtai saka te chu tlangkam atanga an dik lohna leh fellohna an hriat sak reng chung pawhin an nihna anga puansak duh lovin Chunglamin a duh che, hman che a duh chuti khati an ti duah a, chu mi dik lo mi lian chuan tak tak emaw a ti a, dik lo takin a lawm ru veng veng thin. Mi tlawn tawngtai ho hian sual an vulh lianin an ti huangtau zawk thin.
8.ZING ȚAWNGȚAI INKHAWM & INRINNI ZAN -
Pawnlang taka kan tawngtai hona hun a ni. Tawngtai Subject ah chuan a nihna chiah thup siin a pawilo chin mawihnai takin kan han sawi chhuak a, kan thlenna tur chunglam erawh chuan a lo hrefiah fai fel si a aw!! Tunge heng tawngtai hunah hian mi hriat tura chunglam dawr tak taka mahni nun diktak phawrh kauh kauh ngam le!! A pawilo chin, a mawi chin, a mualpho lo tawk velin kan ti ho mai mai a ni. "Misual ka ni tiin a awm a in chum a in chum a" a tih ang chi A tak tak phawrh chhuak chu mi tlemte an ni ngei ang. Kan ká chinin kan tawngtai a, min hmu vektu hnenah engmah kan phawrh lo. Zing tawngtaite hi chapo pui a la awl viau zui. 'Kha khawnge?' Kan ti dek dek a, 'Ka zing tawngtai bang chutah/khatah ka kal lawk a' kan han ti hram zel ah !! A thlenna tur hnena hlawkthlak taka inphawrh a thlen ai chuan ȚAWNGȚAI TRADITION ah hian kan lungawi viau a ni.
9.ȚAWNGȚAI EVALUATION -
Mizoten kan tlakchham ber chu 'Evaluation' a ni. 'Ram leh hnam humhalh' kum puanah kan nei a, kan Ram chu eng tiangin nge kan humhalh teh reng a, kan hnam chu engtiang takin nge kan voh phah tih hi kum tawp ah chuan kan ennawn ta em? A nih loh chuan kan hlawkpuina chhut miah lova a thu a țha ti a puang ve leh dur mai thin kan ni ngei ang. Rorelna dik chu luipui angin a luang ta em? Kan thuvawn chu sawi sawi zahthlak a nih tawh phei chuan thlak vat a tul tihna a ni.
"Ei leh in min pek te hi kan taksa leh thlarau tan malsawm la" "Tui taka ka mut theih nan min pui la" "Vawiin nilengin min hruai la" " I thlarauin min thuam thar la" a tam mai. I chaw ei tur chu i taksa leh i thlarau thleng chuan malsawmna a dawn phah em ? Aw i tih chuan lawm thu i sawi em? Chaw chu i ei hlei thei lo emaw, I pum a nat phah a, i kua te a ti tha lo a nih phei chuan i ei dawna i tawngtaina kha i ngaihtuah let ngai em? I dilna kha engtin nge chunglamah i tih leh thin?!! Engtinmah... I tawngtaina kha ngaihtuah tak tak hek lo che mawle !!
I tawngtai zo a, i muhil leh thei hlek si lova, nileng chuan Pathian Thlarau hruai nun in i nung lo tih a lang reng bawk sia..i tawngtaina kha EVALUATE ve thin la hlawkna i nei ngei ang.
10. MAMAWH ȚAWNGȚAI -
Lawmthu emaw, mangan thu emaw, mamawh dil thu ah emaw tu pawhin mamawh taka chung lam a biak chuan a betu chu eng mi pawh ni rawh se Addict, ngawlvei, pa/nu ho tak pawh ni rawh se chunglam mamawhna in a tlak buak tawh chuan lirthei chuan lai pawhin mengreng chungin thinlungin mittui tla zawih zawihin an lo tawngtai zawk a,tu khaw hriat loh in pindan chhung rilah kawng kalhin inthlahrung takin thingthi/bawkkhupin mittui nen chunglam an lo au thin zawk a lo ni reng mai. Chu chu a ni THINLUNG ȚAWNGȚAINA HLA MAWI TAK CHU !!
Post a Comment