PAY COMMITTEE-IN FINANCE MINISTER HNENAH REPORT THEHLUT

Mizoram Seventh Pay CommissionMizoram-a Seventh Pay chungchang zirchiang tura a bik taka din Mizoram Pay Committee 2017 chuan ngun taka a zirchian hnuin vawiin khan a Report/Recommendation-te chu sorkarah an thehlut ta.

Pay Committee 2017 te hi an Chairman Pu H.Liansailova, Vice-Chairman, Planning Board hovin Member-te - Agriculture Minister Pu K.S.Thanga, Taxation Commissioner Pu V.L.Chhuanga, IA&AS leh Mizoram sorkara Finance Secretary ni thin Pu Lalthansanga te an ni a. Pay Committee 2017 Report hi Chief Minister aiawhin Finance Minister Pu Lalsawta’n ama office chamber-ah a lo dawng a ni.

Finance Minister Pu Lalsawta chuan Committee Member-te thawhrimna fakin nikum November thla tawp lama din chauh he Committee hian ngawrh taka hna thawk zuiin hun bituk chhungin sorkar hnenah Report an thehlut thei chu a lawmawm hle a ni a ti. Pay Committee Report hi sorkarin ngun takin lo zirchiang lehin Cabinet-in a ngaihtuah leh ang a, Cabinet thutlukna angin sorkar chu a kal mai dawn a ni a ti bawk.

Pay Committee 2017 Chiarman Pu H.Liansailova chuan Committee-in hlawh pun dan tur a ngaihtuah laiin sorkarin a hnuaia hnathawkte a duhsakna a hre reng a, lehlamah sorkar sum dinhmun te pawh ngun takin a ngaihtuah tel bawk a ni, a ti. Mipui nawlpui rilruah chuan Seventh Pay hman a nih vang maiin sorkar hnathawkte hlawh nasa taka pung tur anga ngaihdan awm hi a dik lova, a tam berah 18% ngawr ngawrin a pun chauh hmel a, chuvangin he Report an thehluh vang maia sumdawng thenkhatten an thil zawrh mante an tihsan vak a dik lova, chutiang thil chu tumahin lo ti lo turin a chah bawk a ni.-DIPR

Post a comment

Powered by Blogger.