Mizo Academy of Letters (MAL) chuan nimin khan an pawl din champha, Annual Foundation Day an hmang a; kum 2017 chhunga Mizo ir-áwm chhuak lehkhabu ṭha ber, Book of the Year atana an thlan, 'Savun Kawrfual' tih ziaktu Lalhmingchhuanga Zongte hnenah khuallian Rev. Zosangliana Colney, MPSC chairman-in lawmman a hlan.
MAL Annual Foundation Day lawmna inkhawm hi MBSE Hall-ah neih niin, MAL president Prof. Laltluangliana Khiangte-in a kaihruai a; MAL secretary Dr Rualkhuma Colney-in report pein, Book of the Year Selection Committee secretary C Lalnunchanga'n Book of the Year an thlan dan a sawifiah.
Rev. Zosangliana Colney chuan, thuziak chu a pawimawh hle tih sawiin, sakhuaah pawh nghawng a neih ṭhin avangin thuziahah uluk leh fimkhur a ngaih thu a sawi a; ṭhangthar zingah aia upa zahlohna leh mihring nun leh awm dan mawi hlohna a nasat tawh avang leh, Mizo ṭawng dik thiam lo an tam tawh avangin nun dan mawi leh Mizo ṭawng inzirtirna lam uar a ṭul thu a sawi bawk.
C Lalnunchanga sawi danin, kum 2017 chhunga lehkhabu chhuak an hmuh theih 131 aṭangin Book of the Year 2017 thlan a ni. Book of the Year hian chawimawina thuchei leh Rs. 5,000 a keng a, MAL chanchinbu 'Thu leh Hla' tih kum khat chhung a thlawnin a dawng bawk ang.
Lalhmingchuanga Zongte hi Mizoram Baptist kohhrana pastor ṭanglai a ni a, North India Field, New Delhi-ah director hna a thawk mek a ni. -Vanglaini
Post a Comment