MAGNETIC MIZORAM INVESTORS SUMMIT 2018Ni hnih awh Magnetic Mizoram Investors Summit, Berawtlang Tourist Convention Centre-a buatsaih chu vawiin khan Mizoram pawn leh chhunglam atanga mi sawmten sawihona leh inkawmna an neih hnu in a tiak ta. He hunah hian Mizoram Chief Minister Pu Lal Thanhawla chuan Mizoram aiawhin Company pahnih nen thawhhona thuthlung a ziahpui. He MoU hi Pu Deepak Khera, MD, Hospitality Doctor leh Pu Premjit, Sungevity Enterprises Chairman te nen ziah niin, MoU ah hian Hospitality Doctor chuan Mizorama Investment tih nan Rs.1,500 crores an dah a, Sungevity Enterprise (Solar plant company) chuan Rs. 600 crore an dah bawk a ni.

 MAGNETIC MIZORAM INVESTORS SUMMIT 2018 


Chief Minister Pu Lal Thanhawla chuan Rs. 2100 crore hu Mizorama Investment tih na tur MoU ziah tak chu Investor Summit hlawhtlinna lantirtu a ni, a ti a. Mizoram leh investor-te tan hmasawnna leh hlawkna a thlen ve ve a beisei thu sawiin, Mizoram chuan hmasawnna kawng a zawh mek zel a, investing company-te tana ngaihpawimawh ber pakhat inkalpawhna pawh tichangtlung turin nasa taka hma lak mek zel a nih thu te a tarlang a. Sector hrang hrangah hmalakna tur awmin, Mizoram chu India leh Asia hmarchhak ramte inkara insumdawn tawnna kawtchhuah ropui ni mai tur a nih avangin investor-te tan kawng a la inhawn zau zel tur thu a tarlang bawk. Chief Minister chuan Summit buatsaihtute leh Mizoram pawn leh chhunglam atanga Summit chhim tura palai kal zawng zawngte chungah lawmthu a sawi bawk a ni.

Planning Minister Pu Lalsawta chuan Mizoramin sik leh sa nuam tak te, thalai lehkha thiam tak takte leh ram nuam tak mai khualzin mite hip theitu tha tak neiin, hmasawnna atan theihna, potential a neih that thu a sawi a. Hmasawnna atan chung malsawmna te chu hmang tangkai tur chuan state dang leh ram dangte aia danglam bik leh thlanawm bika kan insiam thiam a tul a ni, tiin ramin hma a sawn dawn chuan leilung hausakna emaw ai chuan inrelbawlna tha a pawimawh zawk thu a sawi a. Investors Summit buatsaih chuan Mizorama entrepreneur tharte tan hmasawnna a thlen tel ngei a beisei thu leh, mipui zingah hmalakna tur ngaihtuahna leh ruahmanna tha tak tak nei, lian tham taka hmalak dawn a thawhpui tur hre mai lo ten khawvel huap company liante nen mahni kawtkaia inkawmna hun siam a ni chu lawmawm a tih thu a sawi a ni.

Vawiin Summit Panel Discussion-ah hi Prof. C.D. Mitra, IIM Calcutta chuan kaihhruaiin, Pu Premjit, Chairman, Sungevity Enterprise; Lt. Gen (Dr) Anil Kumar Misra, WVSM (Rtd.) Vice Chancellor, ICFA; Pu Raveendra Desai, CEO, Airtel (NE); Pu Deepak Khera, MD, Hospitality Doctor; Pu Dhiraj Pratap, CEO, Cloudsteer Technology, Singapore leh Dr. Subrangshu Sanyal, CEO, IIM Calcutta Innovation Park ten hnathawhna atan leh thawhpui atana Mizoram an hmuh dan leh, an company theuhin hma an lakpui theih dan turte an sawi a ni.

MAGNETIC MIZORAM INVESTORS SUMMIT 2018 CONCLUDEDSummit zawh hnu hian Sungevity Enterprise leh Hospitality Doctor nen a MoU ziah chungchangah Sawrkar hotute leh Company aiawhten hmalakho dan tur an sawi chhunzawm ang a. Heng company ten Mizorama hmalakna tur atana an pawisa invest hi Mizoram hamthatna atan Mizo mipuite, mimal emaw company emaw, an thawhpuina tur a ni a, sawrkar chu an inkarah kawng kawhhmuhtu a ni dawn a ni.

Magnetic Mizoram Investors Summit hi Planning and Programme Implementation Department sum bultumin Innovations India Advertising & Events Pvt. Ltd. buatsaih a ni a. August ni 4, 2017 khan Mizoram Sawrkar leh Innovations India chuan thawhhona thuthlung lo ziak tawhin, chumi thawhhona atang chuan tun tumah hian Mizorama entrepeneurship tihhmasawn a nih a, pawnlam mi te tan thawhpui a sum peipunna hmun tha a ni tih Mizoram chu an rawn hriat theih nan he intawhkhawmna hi buatsaih a ni.-DIPR

Post a comment

Powered by Blogger.