Vawiin chawhma khan Hotel Regency -ah Indian Chamber of Commerce bultumin ‘Business Summit leh Roadshow – Mizoram Calling’ tih buatsaih a ni a. He hunah hian Mizoram sawrkar leh Maharashtra Tourism Development Corporation Ltd. te chuan thawhhona thuthlung an ziak a.  Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chuan he hun hi hmanpuiin keynote address a sawi a ni.


Governor Lt. Gen. Nirbhay Sharma chuan Mizorama tourism leh thei leh thlai thar hralh tura hlawkna awmte chu chhuichian tlak a ni tiin, State upa zawk Maharashtra leh sumdawng lianten hemi kawngah hian an puih theih thu a sawi a ni. Khualzin thlenna tur bik engemaw zat siam chu tha a tih thu sawiin, chu chuan hmsawnna ruhrel dang te a siam belhin mi thanhem tak tan eizawnnna ngelnghet a siam thei dawn a ni, a ti. Hmasawnna tura a hriat sector thenkhatte chu tarlangin sumdawng lianten investment siam se a duh thu a sawi. Maharashtra-a cooperative society-te chin dan tha chu Mizorama loneituten entawn se a duh a. Governor chuan Bollywood-a thawkte chu Mizorama rawn hruai lutin, a hmunhma te rawn en ve tura a duh thu a sawi a ni. Hetiang hmalakna hrang hrangah hian khawtlang hruaitute thlawpna a ngen a ni. Sawrkar chuan insumdawntawnna a awlsam zawk nana hma a lak mek thu leh he Summit hian rah tha a chuah ngei a beisei thu a sawi a ni.

MIZORAM SAWRKAR LEH MAHARASHTRA TOURISM DEVELOPMENT CORPORATION LTD. TE CHUAN THAWHHONA THUTHLUNG AN ZIAK

Pu PC Lalthanliana, Horticulture Minister chuan hmarchhuak bialin insumdawntannaa potential a neih that thu a sawi a. Horticulture thei leh thlai thar hralh chhuah theiha a ngaih te chu tarlangin organic an nih thu a sawi a ni. Heng thei leh thlaite sawngbawl tura investment ngaihna lai te a tarlang  a. Summit chuan sawrkar pahnih inkarah inlaichinna tha a siam bakah ngaihtuahna thar inthlengna dawh san a nih a beisei thu a sawi bawk a ni.


Mizoram Chief Secretary Pu Arvind Ray chuan inlawmna thu sawiin, Dr. C Vanlalramsanga Planning Secretary chuan sawrkar pahnih te thawhhona atanga hlawkna hmuh theih turte a sawi a. Pu Ashutosh Rathod, Tourism Director, Government of Maharashtra leh Maharashtra Tourism Development Corporation Ltd. Jt. MD ni bawk chuan Mizo mipuite thawhpui an chak tawh thu a sawi a. An rama inentir tura lo kal te chu Medical Tourism policy kaltlanga ngaihsak bik an nih tur thu a sawi a ni. Dr. Rajaram Dighe, OSD to Minister – Cooperation, Marketing and textiles, Government of Maharashtra chuan Atal Mahapanan Vikas Abhiyan chungchang a sawi a ni.

Tourism Director Pu Biakthanmawia Pautu  leh Dr. Robert Lalrinsanga Horticulture Development Officer te chuan ‘Mizoram as the popular and sustainable Agri Tourism destination’ leh ‘Horticulture based business opportunities in Mizoram’ tih thupui hmang in presentation an pe a. Tourist Officer Pi Rachel Lalrinhlui chuan thawhhona thuhthlunga inremsiamna tlangpuite a tarlang a ni.  Summit neih zawh hian ‘B2B Interaction on Maharashtra-Mizoram Business Cooperation’-in a chhunzawm nghal bawk a ni.- DIPR

Post a Comment

Powered by Blogger.