SAPTAWNG ZIR DAN THARIN ZIRNA A TI HMASAWNTun hnaia Aizawl DC leh ELF Learning Solutions, Chennai te thawhhona kal zel chuan Aizawl khawpui huamchhunga sorkar sikula Pawl 1-4 zirlaite tana Saptawng zirdan thar (New English Program) hman a nih hnuah nasa takin zirna lamah hmasawnna hmuh zel a ni. He project hi English Learning Founation (ELF) leh Rural Electrification Corporation (REC) te bultum niin kumin chhung hian Pawl 9 & 10 zirlaite tan pawha tihchhunzawm tum a ni a, hei hi School Education Department nena tangkawpa tih a ni thung ang.


Kumin 2018 chhung hian Primary School 30 leh Higher Secondary School 20 ah he New English Program hi hman a ni dawn a. Zirtirtute chu training pek vek niin Saptawng an zirtir dan thlak danglam vek a ni a; hla te, lem (video) leh workbook te hmangin zirlaite chu saptawng zirtir an ni a, hma an sawn chak hle tih zirtirtute chuan an sawi. Higher Secondary School zirlaite chu English grammar leh a chhiar dan zirtir an nih bakah a ziahdan (writing skills) pawh nasa takin zirtir an ni bawk ang. DIPR

Post a comment

Powered by Blogger.