New Delhi-a cham mek NGO Coordination committee chuan nimin khan Ministry of Home Affairs Joint secretary(NE) Pu Satyendra Garg hmu in Bru chungchang an sawipui a, NGO Coordination committee te hi an Chairman CYMA President Pu Vanlalruatan ho in, MHIP finance secy Dr. Thanpuii, MZP President Pu L.Ramdinliana Renthlei leh MSU President Pu RB. Lalmalsawma te an ni a. Bru chungchang an buaipui rei tawh thu leh kum 20 lai an buaipui tawh a, Mizoram a lo lut duhte chu lo lut se dodalna an neih loh thu te, tunah pawh hian a duh chu lo lut se la Mizoram ah harsatna an neih loh tûr thu te an hrilh a, Tuna camp a an leader te an hausak rualin an mipuite te chu mi rethei ber an nih thu te, camp a awm ho hian an demand an tisang zel a sorkar in a tlin loh thu te, Bru lakluh tumin vawi tam ruahmanna siam a nih tawh a Mizo society ah an lut duhloh a nih chuan State pawn aṭanga vote an thlak chu an pawm theih tawh dawn loh thu an hrilh a ni.
Mizoram a inthlan lo awm leh tur hma hian anmahni duhthu ngei a tlanchhuak Bru chungchang hi chinfelsak turin leh Mizoram ah an lo let duhlo a nih chuan Tripura state ah awm hlen se la, Tripura state electoral roll a thunluh mai nise tih leh anmahni leh anmahni intihthaih in Mizoram atanga chhuak tura tihna lehkha te an sem thu te Pu Satyendra Garg hnenah hian thlen a ni.
Pu Garg a chuan NGO Coordination committee thu thlen te chu Mizoram ah Election puan a nih hma ngei a lo tih fel hman an tum thu leh atul anga hma lo lakzui a tum thu a sawi a, NGO Coordination committee in atul anga Election Commission of India pawh thurawn pe tura an ngen angin Election Commission of India pawh atul anga thurawn lo pek a tum thu a sawi bawk a ni.
NGO Coordination committee chuan Pu Satyendra Garg(NE) hnenah hian tun bak hi Ministry of Home Affairs dawr a kal an tum tawh loh thu leh tun hi a tawpna tur a nih thu te leh Bru te chu Mizoram State pawn aṭanga vote thlak tir tumna a awm chuan nasa taka dodal a nih tur thu an thlen bawk a ni. - AIR Aizawl News
Post a Comment