Chief Minister hlui Pu Zoramthanga’n Aizawl court-a thubuai a thehluh kal zelah rorellai Congress chanchinbu thlakip chhuak ‘Congress Thlifim’ enkawltute chu June ni 18-a court hmaa inlan tura koh an ni.
Court atanga thudawn danin First Class Judicial Magistrate Pu H. Lalduhsanga chuan Congress Thlifim publisher Pu James Thanghmingmawia leh Chief Editor Pu David M. Thangliana te chu June ni 18-a a court hma a inlan turin a kova. He chanchinbu-in thu lakna atana an hman ni a an sawi Pu Thansanga, Aizawl Chhinga Veng pawh hemi ni vek hian court hma a inlan tura koh a ni. Pu Zoramthanga hian Rev. Chanchinmawia thih chungchanga Congress Thlifim-in March thla a an thuchhuah chu amah tihhmingchhiatna ni a ngaiin IPC section 500 leh 501 tlawh chhanin thubuai hi a theh lut niin a ukil Pu C. Lalramzauva chuan a sawi.
Congress Thlifim chanchinbu-in Pu Thansanga thusawi a chhuah chhawn dan chuan Pu Zoramthanga hian Pu Thansanga hi Rev. Chanchinmawia that tura cheng tam tham taka mi ruai turin a ngen a, ani’n a duh lo niin a insawi a. Hemi chungchangah hian Pu Zoramthanga hian term hnih chief minister nihna lo chelh tawh leh MNF party president pawh hun engemaw chen lo ni tawh a nih avangin he an thuchhuah hian a ti hmingchhia-in miin an hmuh chhiat phah thei niin a sawi a ni.-AIR News Aizawl
Post a Comment