Chief Secretary Pu Arvind Ray an nimin khan Kolasib a tlawh a, Sawrkar Department Hrang hrang leh khawtlang Hruaitu hrang hrangte a kawm a, Pu Arvind Ray chuan amah lo hmuaktu Kolasib District official-te leh khawtlang hruaitute chu Kolasib District-a sawrkar hna kalpui a nih dan leh hmasawnna ruhrel Project te a hmuna tlawh tura kal a nih thu a sawi a. Tun dinhmunah Dan leh thupek kenkawh kawnga harsatna lian tham awm lovin boruak ralmuang tak hnuaia sawrkar hmalakna te kalpui a ni chu lawmawm a tih thu a tarlang bawk. District hmasawn zelna atan zirna leh hriselna a pawimawh hmasak thu sawiin Chief Secretary chuan Kolasib District mipui hriselna dinhmun te, damdawi ina khawl awmte, faina kawnga hmalakna te, zirna lam dinhmun te, kawlphetha leh tui supply dinhmun tlangpui te official kalkhawmte a sawipui a.
Kolasib district bawrhsap Dr. Arun T chuan Kolasib Dist a Administration leh Department hrang hrang hmalakna lian zual bakah Kolasib District ina theihna hrang hrang a neih te a sawi a, chak zawka hmalak a nih theihnan harsatna hrang hrang an tawh te sutkian pui turin Chief Secy hi a ngen bawk a ni. Hemi bakah hian District official-ten an hmalakna tlangpui te sawifiahin an hnathawh kawnga harsatna an tawh te Chief Secretary hnenah hian an thlen bawk a, hnathawktu indaih lohna avanga harsatna an tawh te an tarlang a, Khawtlang hruaitute te pawhin Kolasib leh Kawnpui inkara Sunshine Company tena Kawngpui an enkawl thatloh avanga mipuiin harsatna an tawh thu an tarlang a, hemi chungchangah hian hmalak pui tura ngenin CS chuan District Bawrhsap kaihhruaina hnuaiah hmalak thuai a nih tur thu a sawi ve bawk ani.
Inkawmhona neih zawh ah hian Chief Secy hian Venglai a Sports Stadium sak mek te, Dihmunzawla Bawlhhlawh sawngbawlna hmun leh Kolasib District Hospital te a tlawh a, Sawrkarin hmasawnna ruhrel leh mipui mamawh thil hrang hrang a siamte chu duat tak leh neitu rilru pu chunga mipuiten an enkawl a tul thu a sawi a ni.-AIR News Aizawl
Post a Comment