~ Rev.LB Khawpuimawia

ROPUINA LAL Kraws-a khenbeh a nih lai khan thu ropui tak tak pasarih lai a sawi a. Khawvêla thusawi ropui berte an ni ang. Chutih lai chuan a khêngbettute leh mipuiten Lal Isua hnênah thu pasarih an sawi ve bawk a, chûngte chu i han sakhi chul ram fan thuak thuak teh ang.

KRAWS CHUNGA ISUA THUSAWI PASARIH-TE1.”Ka Pa, anni hi ngaidam rawh, an thiltih an hre lo a nih hi” (Luka 23:24): Kraws chunga Lal Isua thusawi hmasaber chu Ngaihdamna thu a ni. Amah khêngbettute chu phuba la lo va ngaidam tûrin a pa hnênah a ngensak a nih chu. Kraws-a khenbehte chu mangang leh thinrimin an au ruai ruai thîn a, khêngbettu sipaite chu chil chhâkin ânchhia an lawh bawrh bawrh thîn. Lal Isua hian engnge a sawi ve, a va danglam bîk êm! ” I hmêlma hmangaih rawh.. biang lehlama bêngtu che chu lehlam pawh dawh rawh’ titu chuan a zirtîrna a zâwm thlap mai a nih hi. Mihringten kan mamawh ber chu sual ngaihdamna a ni reng a, ngaihdam i ni ve tawh em?

2.”Ka hnênah Paradise-ah i awm ve ang” (Luka 23:43): Chhandamna thu ropui a ni, a dawngtu tân a va thlamuanthlâk dâwn êm! Mi sualte zawnga an zînga tâl thîn Isua chu a hun tâwp thlengin mi sualte nên tlar khatah dah a ni zêl, a vei lama miin a hau va, a ding lama miin ngaihdam a dîl thung. Dinhmun in ang thinlung in ang lo kan hmu. Pakhat zâwk chuan a sualna te, a tuarna te a pawm a, ‘Isu, i ram i thlen hunah mi hre reng ang che ” tiin a dîl a, chawp leh chilhin chhânna aw mawi tak a dawng nghal. Ni khat êm pawh a rawng la bâwl lo pawh a chhandam duh zuk nia. Hmangaihna mak tak a va ni êm!

3. “En teh i fapa kha…en teh i nu kha” (Johana 11:26-27): Chhûngte ngaihsakna hmangaihna aw a ni. Lal Isua hian a hringtu a nu Mari chu a lainatin a hmangaih a, a kalsan hnuah pawh a nu lo enkawl zui tûrin a zirtîrte zînga mi Johana mawhphurhna a pe a, nufa an ni tih hrilhin a suih zawm a. Isua thusawi chu hre thiamin Johana chuan Mari chu a inah a hruai nghâl tih kan hmu.

4.”Ka Pathian, ka Pathian, engah nge mi kalsan” (Matthaia 27:46): Thlaphâng leh lungngai aw a ni thung. Naupang thlaphâng leh mangangin nu leh pa an koh lawm lawmna au aw ang hi a ni. A va lainatawm êm! Lal Isuan mihringte dinhmun dik tak, Pathian hawisan ram, Pathian awm lohna ram reh, hmêlmate leh ramhuaite chauh awmna ram han dai meuh chuan mangang leh thlaphângin a pa Pathian a au lawm lawm mai a nih hi. Hei hian bawhchhe tawh mihringte dinhmun râpthlâkzia a tilang chiang hle a ni.

5.”Ka tui a hâl e” (Johana 19:28): Hei hi na tuar au aw a ni. Hliampui tuarte chu taksa atanga thisen leh thlan a chhuah tam avângin an tui a hâl huam huam thîn. Lal Isua pawh an sawisakna leh an vuaknate avânga thisen leh tui tam tak a hloh avângin dang ro dang charin a awm a ni chu. Tuifinriat siamtu, tui hna zawng zawng siamtu vân lal fapa chu kan sual avângin tui hâlin a au a nih hi. Vân lal fapa tui hâlna hi khawvêl hian a tuar zo dâwn em ni? A râpthlâkin a va mak êm!

6. “A kin ta” (Johana 19:30): Hei hi hnehna au aw a ni thung. Lal Isua chu kan sual avângin lungngaihna leh mangannate tuar mah sela, chu chu a tâwpna a ni lo, hnehna chu Lalpa ta a ni tlat. Setana chuan a tih theih zawng zawng a ti zo tawh, engmah tih theih a nei tawh lo. Lal Isuan chu chu a hria, a chunga thil thleng tûr zawng zawng a thleng famkim tawh a, tlanna hna chu a thawk zo tawh, tih leh chuan tûr a awm ta lo. “Ka hneh ta, ka thawk zo ta, ka artelukâwn ta, Setana chu hneh a ni ta” tiin kraws lêr atangin hnehna hlado a chham khum ta zâwk a ni.

7. “Ka Pa, i hnênah ka thlarau ka kawltîr e”(Luka 23:46): Thlamuang leh lungawi aw a ni. Hna thawk zo lungawi taka châwl ta au aw a ni hi. A va ropui êm! Naupang thlahlel leh lung muang taka nu mal chunga a tlu lût ang leh hna thawktuin rim taka a hna a thawk zo hahdam taka a mu siai siai ang maiin Isua chu Pa ângchhûngah inkawltîrin Pa ropuina leh thiltihtehihnaa kaihthawh leh tûrin a thlarau a thlah ta a ni.
Bible kan en chuan kan Lal Isuan Kraws atanga thu ropui tak tak pasarih a sawi lai hian a khêngbettute leh mipuite lam atanga Lal Isua lam hawia thusawi pasarih kan hmu bawk, chûngte chu i han thlîr leh teh ang:

1. “Nang Pathiang biak In thiata ni thum chhûnga sa leh theitu, intidam rawh. Pathian fapa i nih chuan kraws ata kha lo chhuk ta che” (Matthaia 27:30,40): He thu hi mipui kawnga vei vâkte thusawi a ni. Hêng mite hian ennawm thlîrin an thlîr a, thinlunga ngaihtuahna tak tak pawh nei lovin an kal pah thusawi mai mai a ni. A nihna tak an ngaihtuah peih lo va, malsâwmna chang tûrin kraws bulah an nghâk peih hek lo.

2. “Krista chu i ni lo vem ni, intidam la, keini pawh min tidam ta che” (Luka 23:39): Hei hi a vei lama mi sual khenbeh thusawi a ni. Hnai set sawtah hmun leh hmunah a chuahchhâl a nih hi. Lal Isua tuarna chhan a hre phâk lo, Krista a nih pawh a hre chiang hek lo. Taksa damna chiah a ngaihtuah a, amah tidam tûrin a duh ber a ni.

3. “Mi dang mah a tidam thîn a, mahni intidam thei si lo. Israel lal a ni alâwm, tûnah hian kraws ata lo chhuk ang hmiang, tichuan amah chu kan ring ang…Pathian fapa ka ni, a inti si a” (Matthaia 27:42): Hei hi puithiam lalte leh lehkhaziaktute sawi a ni. Hmuhsitna leh tihelna thu dengkhâwng tak a ni a, chhân a va châkawm dâwn êm!

4. “Judate lal i nih zet chuan intidam rawh” (Luka 23:37): Hei hi khêngbettu sipaite thusawi a ni. Hêng mi hrang hrangte thusawi palite hi a in ang tlâng hle mai. An thupui ber chu “Intidam rawh, kan ring ang che” tih a ni. Intidam ta se an ring tak tak ang em? Lal Isuan mihring thinlung a hmu tlang vek, huatna leh tihelna mai a ni tih a hria. Taksa damna hi a thupui ber a ni hek lo. Lal Isuan a mission a hria, khawvêl sual tân a nun a pe dâwn a ni, chûng chu hêng mite hian an hriatpui lo. Tin, intidam ta se, keini hian rin tûr Isua kan nei lovang.

5. “Isu, i ram i thlen hunah min hre reng ang che” (Luka 23:42): Hei hi Lal Isua ding lama mi sual khenbeh thusawi a ni. Kraws chunga Lal Isua lam hawia thusawi Isuan a chhân nghal awm chhun a ni. “Keini zawng hremzia reng kan ni, kan thiltihsual man chauh hmu kan ni” tiin a sualna a pawm a. Mi sual nih inhria thinlung lungchhia leh inchhîr hi Lalpan a ensan ngai lo. Kraws lêrah pawh chhandamtu a la ni zêl, a ropui e.

6.”Ngaiteh u, Elija a ko a ni … amah la thla tûrin Elija a lo kal emaw i en ang u” (Marka 15:35-36): He thu hi Lal Isua khenbeh a nih laia kraws bula dinghote thusawi a ni. Lal Isuan mangang taka “Eloi Eloi lama sabakthani” tia a au an chhânna a ni. Hei hian a manganna leh lungngaihna an tuarpui lohzia a tilang hle.

7. “He mi hi Pathian fapa a ni ngei mai” (Marka 15:39): He thu lâwmawm tak sawitu hi sipai za hotu a ni tlat. Kraws-a khenbehte hian sipaite hi ânchhia an lawh bawrh bawrh a, chilte chhâkin an thinrimna an hri thla ve thîn. Lal Isua erawh chuan chutiang rêngin a ti ve lova, ngaihdam a dîlsak.”Mi hauhva a awm laiin a hau ve lo va, a tuar laiin a vau lo va, fel taka ngaihtuah thîntua hnênah chuan a inpe zâwk a” (I Petera 2:22).

Kraws-a khenbehte hi an thi thuai ngai lo, eng emaw chen na tuarin an awm thîn. An thih thuai theih nân sipaiten an ke an vaw tliak thîn a. Lal Isua erawh chu a bula an rawn kal khan a lo thi reng tawh tih an hria a, “..a ruh pakhatmah tih tliah a ni lovang” (Sâm 34:20) tih chu a lo thleng ta a ni. Sipai za hotu hian hêng thil thleng zawng zawng a hmuh hian mak a ti a, “He mi hi Pathian fapa a ni ngei mai’ tiin Pathian a fak ta a ni.

Aw le, Kraws chunga Lal Isua thusawite leh Isua lam hawia thusawite kan hre ta, engnge i sawi ve dâwn. Lal Isua hnênah engnge i sawi ve dâwn? Zawhna pawimawh tak a ni. Hmuhsitna emaw engahmah a ngaih lohna thu i sawi dâwn em ni? “Isu ka hmangaih che, ka lal leh ka chhandamtu i ni” i tih theih nân Lalpan malsâwm rawh se.

Source: BCM

Post a Comment

Powered by Blogger.