Zarzokima Khiangte
Madarnting, Shillong-21.
Upala Sen chuan 2014-a inthlan Campaign laia Modi-a thusawi, hlen a nih leh nih loh chungchang a sawi a, chungte chu tawite in han tar lang ve ila.
Kum 2014-a Lok Shaba inthlanna awm tura a campaign-na ah chuan, BJP rally vawi 400 neihna ah 3D-Hologram vawi 1350 hmangin hmun 5390 ah thu a sawi a. Hologram chu 3-Dimention hmanga thla thawnchhuahna ti ila a fiah mai awm e. Thingtlang kilkhawr tak tak a awmten Modi-a thla lian hrek hrawk a an hma a lang a thu a han sawi chuan an rilru pawh a hneh hle ni pawhin a lang.
A Thutiam Pakhatna: November 2013 a Agra-a a thusawi kumtin Hna mi Maktaduai 10 tan ka siam ang. February 2018 a Center for Monitoring Indian Economics pvt.ltd. leh Business and data base leh Research Company te report dan erawh chuan hna hmu lo te hi an pung zel a. Unemployment rate hi 7% ani a, kum 2013-14 khan 49% ani thung. TV-a interview a neihna ah P.M chuan thalai nuai 70 tan EPF (Employees Provident Fund) siam ani tiin a sawi a. Upala Sen chuan hei hian Employment a siam chuang lo ati.
China erawh chuan kum 2016 khan mi maktaduai 10 tan hna a target a, tunah hian mi maktaduai 13 tan hna a hawn sak tih Upala Sen chuan a sawi.
A Thutiam Pahnihna: Pathankot, Panjab-a April 2014-a a thusawi mak in tih tur chu lo neimite mahnia intihlum te hi sipai indona a thi aiin an tam zawk . Lo nei mite hnena a thutiam , an thil thar atangin 50% vela an hlawk theih nan puih an nih tur thu a sawi a, hei bakah an pawl hian National Land Use Policy (NLUP) leh Farm Insurance Policy siam an tum thu a sawi bawk. Amaherawh chu; kumin 2018 January a NGO pawl hrang hrang Asha Kisan Swaraj Alliance te, Jai Kisan Andolan te,NREGA etc. te hian Kisan Green Paper a report an siam naah chuan Minimum Support Price (MSP) hi sawrkarin a tiam ang in a pung lova, UPA (Congress) Sawrkar ai khan a tlahniam an ti.
Sum tam tak hman ralna Mahatma Gandhi National Rural Employment Scheme (MGNRES) hi tihbo a tum laiin, mipui leh Supreme Court ten an dodal avangin nuai bo theih ani ta lova. Lo neimite khawkhen avanga an tuarna lak atanga an in tundin lai mekin sum hlutna (demonetization) a sawrkarin a rawn puan tak avangin leh sum hlutna nasa taka a tlak hniam avangin lonei miten an tuar nasa hle a. Lonei mite loan rulhna leh mawhphurhna state sawrkar kutah a dah tak avangin state sorkar te tan ritphurhna nasa tak a siam sak a, anni lahin chak tak in hma an la thei lova. Loan rulh leh theih lohna avang leh khawkhen avangin lo neimite zingah mahni intihlum an tam phah em em ani. BJP Preisdent Amit Shah-a chuan a thusawina ah lo nei mite intihlumna chhante chu depression leh mahni mimal (Personal) thil avang mai a ni a tiin sawrkar thiam a chantir hle thung.
A Thutiam Pathumna: Corruption do chungchangah May 2014-a Amethi-a thusawi, Curruption ah ka inhnamhnawih lovang a, tumah tih ka phal hek lovang (?).
UPA sawrkar laia corruption awmte, 2G Spectrum Scam (2008), Commonwealth Games Scam (2010), Chapper Scam (2012), Cash for Gold Scam (2011), Coal Scam (2012) te nasa takin a sawisela, Sawrkar ka siam chuan engkim hi langtlang vekin a awm ang (Transparency in Governance) a ti a, Demonetization leh Black Money umbo a tumte chu, thil tha lo umbo a tumna kawngah thil te tham te tiah Upala Sen chuan a ngai ani.
Modia sawrkar chhung kum 4 vela corruption thleng te, Billionaire, Diamantaire Neran Modi-a chuan Punjab National bank atangin Rs 11,000 Cores a tlanbo puia, a pu Mehul Choksi-a pawh a inhnamhnawih a. Nirav Modi thil tih hriat chhuah a nih hma hian ram dang mite nena intawh khawmna pawimawh taka PM (Modi-a) te nen thla an la ho nghe nghe. Vijay Mallya pawh nikum khan sum tam tak eiru in a tlan bo mek. Amit Shah-a fapa company sum pawh kum khat chhungin Rs 16,000 cores velin a pung hman tih ani bawk. Special CBI Court chuan Nirav Modi-a leh a Pu Mehul Choksi manna turin non-bailable warrant a issue ta.
A Thutiam Palina: “EK Bharat Achhe din hone wale hain”, “Hun tha India tan a lo thleng mek”, may,16,2014 BJP ten hnehna an chan hnuah Modi-a thusawi “India mi zawng zawng tan hun tha, lungrual tak leh hlim taka kan chen ho dial dialna tur hun tha a lo thleng ang” a tihna ani. Kum 4 dawn ro an rel ta, hun tha chu a thleng ta em le!
Kum 2012 atang khan bawng venhim tumtu pawl Gauraksack-cow vigilante inti hote kut, Muslim ho leh Dalit ho ten an tuar nasa hle, bawng chungchang ah hate Crime vawi 78 a thleng a, za zel a 47 chu BJP lalna state a thleng ani a. Ghar Wapsi (In a kir leh) tih hi Hindu atanga mi sakhaw danga lo inlet tawh te lak kir lehna ani. Telangana leh Adhra Pradesh ah mi 8,000 inleh tir leh an ni a 2014-2017 khan mi 53 inleh tir leh an ni bawk. Bawng talh leh ei chugnchang ah pawh Muslim ho ten an tuar nasa hle, eptu pawlte chuan BJP policy hi Anti-Dalit policy an ti hial a ni.
Kristian te pawh kan bang chuang lo. Pawn lam atanga tanpuina pawl thenkhatten an hmuh thinte pawh tih tawp tumna thawm riva te pawh a awm tan mek niin a lang. India Danpui (Constitution) clause thenkhatte pawh tihdanglam tum thu te hriat ani. Veda chhiar tura infuihna leh yoga practice tura infuihna pawh a lian a, National Anthem te pawh cinema hall ah zaitir tih te pawh a ri ta a. Amaherawh chu Supream Court in a pawmpui chiah lo niin a lang. UP-a Dalit mi BJP MP ngei pawh, Chief Minister in a hnuaichhiah avangin PM hnenah a vui leh vaina thu a thlen hial a ni. Tripura a BJP an chak khan BJP supporter ten Stalin-a lim kum tam tak lo ding tawh chu an suasam a, Hmun dangah Syama Prasad te, Vivekanmanda leh Ambedkara limte pawh suasam zui ani bawk. Tawng chhuah hun awm pawha tawngchhuak duh lo, PM meuh pawh a rawn tawng chhuak ve ta hial a. Hetiang thil tha lo titute hi man chhuah an nih chuan na taka hrem an ni ang a ti ve.
Nikum khan Unnao, Uttar Pradesh a BJP MLA leh Unaupa te chuan hmeichhe kum 19 chu an pawngsual rawn a. Diklo takin chu hmeichhe naupang pa chu an leh tan tir zawk a. Kumin April 3 khan hmeichhe naupang pa chu tan inah sawisak hlum niin a lang ta a. MLA unaupa Atul Singh Sengar-a chu man a ni a, he mite nufa lungawi lo hian, chief minister Hindu puithiam leh kulmuk tak Yogi Adhiyanath kawt ah inhal hlum an tum nghe nghe. He mite nufa hian police te hi an ringlo hle a, CBI investigation an ngiat nghe nghe ani. Tun hnaia an thil hmuh chhuah leh chu MLA te unau hian diklo takin he hmeichhe pa Thump impression hi lain inremna siam ang in lantir an lo tum a ni. BJP te hi in tan tak an nih avangin, he MLA te unau chunga sawrkar hma lak dan tur hi mipui ten an ngaih ven hle.
Post a Comment