ALINERY LALNGILNEII : Mizoram Youth Commission buaitsaih Youth Summit & Road Show 2018 district khawpui tinah neih mek a ni a, he program pawimawh, Mizo thalaite kawng chi hrang hranga kaihharhna tur atana Mizoram Youth Commission buatsaih Youth Summit & Road Show 2018 closing function rawn hmang tur hian Mizo nula chhuanawm, Alinery Lalngilneiia chu UK atangin a rawn haw dawn.
Mizoram Youth Commission bultum leh hmalakna hnuaia Youth Summit & Road Show 2018 chu district khawpui tinah neih chho mek zel a ni a. He hun hi Mizo thalaite hmasawnna tura infuihna leh inzirtirna hun a tan te, Skill Development lama thalaite hmasawnna tur thil tul hrang hrang in hrilhriatnan te, lehkha zirna leh hnathawhna tur thlenga kawng inkhawh hmuh nan tangkai taka hman tura buatsaih a ni. Sawrkar department, Private agency leh NGO ten stall neiin "Youth Empowerment" thupui a hmangin Film tawi siam, thlalak leh lemziaka inelna buaitsaih a ni bawk.
A closing function, 23-24th May hmanpui tur hian kan thalaite zinga chhuanawm leh kan ram nghahfak, Sangau nula, Alinery Lalngilneii Lianhlawng, tuna University of Sussex, United Kingdom-a master zir mek chu a rawn haw dawn a. Ani hi Mizo thalai te zinga Social Entrepreneur hmasa leh Entrepreneurship field-a pioneer/zira practice hmasa te zinga mi a tih theih awm e.
Alinery hi Zirlai ni chungin social enterprise NGO-ah nasa taka inhmang in high school thleng a zirna hmun, Sangau-ah Zirlaite tan Library dinin lehkhabu leh computer/laptop te a chhawp chhuah sak a, Aizawl, Champhai leh India ram hmundangah he project hi tihlen leh tihmasawn mek zel a ni.
Sangau local medium a high school thleng zir ni mahse a tumruhna leh a taimakna in a hruai thui hle a, undergraduate kum 5 chhung a zirna senso merit scholarship hmuin Abbott Scholar a ni a, tuna master a zirna, Development Studies subject bika World No-1 nihna hauh mek University of Sussex-a a zirna pawh hi AUW-Sussex Einhorn-Oestriecher Scholar niin a zirna senso tumsak vek a ni. International Conference leh internship te UN, JICA Japan, EXIM Bank- South Korea, Hong Kong, China, leh Europe hmun hrang hranga thla tin kal chhuak deuh reng a, University of Oxford-a professor leh zirlai te nen social project an ti ho mek zel bawk.
Heng a experience leh thiamna te hi midang te tan pe chhawnga chhawpchhuak reng duh mi a nih avangin NGO a din thar, "Rochun: Pay it Forward" chu a kal chhoh pui mek zel a, he organization in a tum chu-
Mizoram school tinah library (online leh offline) din leh Mizoram thalai ten zirna sang zawk leh khawvel pawn an dai ve theihna tura platform siamsak leh chumi a tana kawng khawhmuh, workshop leh guidance neiin Mizoram thalai te tana movement neih a ni.
April thla khan, "Integrating and Empowering Women in Partnership with Social Enterprises" tih thupui hmanga University of Oxford-a Acumen buatsaih workshop-ah Wedu represent tura thlan a ni a. He hmunah hian Company lian hotu lu leh NGO hrang hrang dintu, founder leh CEO te inhmu khawmin Rotary club president te, Pakistan rama hmeichhe school naupang sing chuang nei a din te, Africa ramah project hrang hrang champion puitu, dinchhuak tu te bula awmin Mizoram leh thalai te hrerengin hun a han hmang a ni.
An University Enactus society-ah business advisor a ni mek a, he society hi university level a zirlai ten social project an zirna leh an apply na hmun a ni a, UK national levelah semi-final an thlenpui bawk. ~ Kiddy Vanchhawng Vanchhawng
Post a Comment