Miss Zofa International hmasa ber R. Lalhmangaihpuii chu Zobawk, Lunglei, ah a title a thlenpui ta.
Lunglei Zobawk-ah R. Lalhmangaihpuii chuan Miss Zofa International title hmasa ber chu Ningani khan a thlen pui a. Miss Zofa hmuahna hi Joint YMA, Zobawk, Lunglei chuan buatsaihin, Community Hall-ah mipui khat tlat hmaa lawmna inkhawm neih a ni a. Aizawl lam atangin tawiawmtu an awm nual.
R. Hmangaihpuii hi Lunglei khaw kawtchhuah, Pukpui-ah Lunglei Photographers Assn. huaihawtin an lo hmuak a, Lunglei Thunder Bike rual in hma hruaiin khawpui chhung fan kual pui a nih hnuah, Zobawk lam panpui zui a ni.
Zobawka hmuahna pui berah chuan school naupangin poster leh banner nen kawngsirah an lo hmuak a. Community Hall-ah khuallam nena an lo lawm a ni.
Joint YMA Zobawk President kaihhruaina in lawmna inkhawm hi hman a ni a, an veng chhunga tlawmngai pawl leh Kohhran thalai pawl hrang hrang bakah, mimal angin thilpek hlu tak tak an hlan.
Lawmna inkhawmah hian Miss Zofa International Chief Organiser C. Dinthanga chuan contest kalpui dan leh Zofa te insuihkhawmna tura hmalakna pawimawh tak a nih thu te, Miss Zofa International hmasa bera R. Hmangaihpuii thlan a ni chu a lawmpui thu a sawiin, Zobawk khaw mipuiin ropui taka an lo chawimawi thiam avangin entawntlak an nih thu sawiin a fak zui bawk.
Lunglei Photographer Assn. a an president C. Lalhmingmuana pawhin, Lunglei dist. atanga anmahni kaltlanga contest-a tel tura an thlan chhuah pathum zing a mi ngeiin Miss lallukhum a hawn chu ropui an tih thu leh an lawmzia uar takin a sawi bawk a ni.
Miss Zofa International lawmna pualin Zobawk YMA Chhang te’n cheraw kan hmuhnawm tak an entir a, YMA in Mizo pasaltha Sakhi kapin hla do a chham a, a silai a hmeh puah ang an entir chuan a ti ropui dangdai hle. Miss Ahmaa hi bialtu pastor-in lawmpuina’n Bible a hlan a ni.
R. Lalhmangaihpuii hian Miss Zofa International 2018 lawmman sun fai cheng nuai thum bakah, Hyundai car mawi tak mai a hawn bawk a ni.
Source: Lunglen
Post a Comment