MIZO NATIONAL YOUTH FRONT
HEADQUARTERS, AIZAWL

PRESS RELEASE

"Pathianin Mizote sawrkar a din dawn" - MNF President

mnf president thusawi

MNF President Pu Zoramthanga chuan, "Pathianin Mizote sawrkar a din dawn ta a, Mizo zawng zawngte huapzo sawrkar min dinsak dawn ta," a ti. He thu hi vawiin May ni 31, 2018 (Ningani)-a MNYF Headquarters huaihawta 'Aizawl City Block Workers' Meet, Chanmari YMA Hall-a neihah a sawi a; MNF party zawmtu college zirlaite leh zirlai hruaitu mi 57 a lawm lut nghal a ni.


Pu Zoramthanga chuan, "Tun hmaa Mizote sawrkar dinna tur harsatna kan tawh chu, Mizo nationalism dotu chak tak hi a ni. Sipai hmang te, Airforce hmang te, Laipui leh Machine Gun te, politics hmang tea dovin mipuite min tirethei te tein pawisain min thlem a. Chutiang awpbehna chu a rit em a, kan zo lo a ni. Keinin 'MN ka sawi thei lo, Zoram hi kan ram a ni' kan tih laiin anni chuan 'Delhi buhfai ring ṭheuh ṭheuh, engah nge kan zah bik lem ang le' tiin chal an hnawihsen a, rui chungin an lam a ni. Chutiang a nih laiin hmanraw hrang hrang hmanga Mizo nationalism dotu Congress chu a lo tluchhe ta a, Mizo zirlai leh ṭhalaite zingah nationalism thinlung lo ṭiakin, tun hmaa mi ṭhenkhatin an sawi ṭhin 'kekawr mawng ṭet, mautuai haka thi mai mai tur, zalenna an sual lo, Aizawl an bomb lo' tih pawh sawi ngam a ni tawh lo. Chutianga a dotu ber a chhiat tak avangin Mizo nationalism champion-puitu MNF hmangin Mizote sawrkar a ding dawn ta a ni," a ti.

MNF President chuan, "Zoramah party dang tih tlak an awm tawh lo. BJP chu CADC inthlan han enin, party thuthlung pawh nei lo, power-a tuihala hmelma lian ber pawh thawhpui duh an ni. Zoram Kohhran leh Mizo Kristiante mentality kan enin Mizoramah hmun la thei an ni lo va. Central-a kum 5 sawrkarna an siam lai pawhin Mizoramah MLA pakhat pawh an nei lo a ni," a ti a. "ZPM chu party hrang hrang ṭangrual kan ni an ti a. Hmun hrang hrangah an zin a, tute emaw ko khawmin committee an din a. Party khatah inhlawm khawm ang u tiin mahni party kawr ṭheuh phelh ang u an ti a, MPC lamin Pu Laldenga thlan bula an office hmun cheng nuai tam tak man hlan an phal bik si lo, 'nangni chi fun leh keini vawksa fun i fak khawm ang u in ti tlat a' an ti a, party khatah an inhlawm khawm thei lo. Party pawh an nih loh avangin Unit an din thei lo va. Unit khat mah nei lova MLA sawrkar tum chu har tak a ni," a ti.


MNYF President Er. Lalrinawma, MLA pawhin thu sawiin, "Mizoram hian stadium ṭha kan mamawh takzet. Khelmual ṭha nei kan intih laiin vawiin niah Asian league club Aizawl Football Club-in home ground-a Mizoram pawh an hmang thei lo hi a pawi takzet a. MNF kan sawrkar chuan stadium ṭha leh changtlung zawk, eng level pawh thleng thei tur hi siam kan tum a ni," a ti a. MNYF President chuan, MNF a sawrkar chuan SEDP hnuaiah health care scheme ṭha leh changtlung zawk a awm theih nan te, zirna ṭha zawk a awm theih nana zirtirtu transfer & posting rules mumal zawk a awm theih nana MNF-in hma a lak tur thu a sawi bawk a ni.

He hun hi Pu Lalremruata Chhangte, Vice President, MNYF Hqrs chuan a kaihruai a, Rev. Vanlalbela, ram tana zalenna lo sual tawh chuan hunserh a hmang a. MNYF Vice President Pu H. Ramdinliana'n thu sawiin, Pu Lalzahawma Khiangte, Treasurer-in lawmthu sawiin hun a khar a ni. He hunah hian Aizawl khawpui chhunga MNF Ṭhalai ṭhahnem tak an kalkhawm a; Lawngtlai, Serchhip leh Mamit MNYF hruaitute chu he hun hmangin a rawn kal bawk. Kalkhawmte hian tlai lamah ruai an kilho a ni.


Sd/-
(K.C. LALTHANSANGA)
General Secretary
Publicity Department
Memo No. 083/MNYF/PR/2017-18
Dated Aizawl 31st May, 2018

Post a comment

Powered by Blogger.