Pi B.Sairengpuii(L) te in Hunthar Veng Aizawl district bawrhsap Dr. A Muthamma chuan Hunthar lei tawlh avanga chim mai thei dinhmuna ding Pi B. Sairengpuii in chu a rang thei ang bera a zavaia thiat turin nimin khan thupek a chhuah.

Tunhnai ruahsur nasa avangin Hunthar veng lei tawlh chu a che leh nasa hle a, Bawrhsap hian vawi tam tak a hmuna enfiah a nih hnua Pi B. Sairengpuii in hi mipui vantlang tan a hlauhawm a ni tih a puang a. Nimin khan leitawlh chhaka ding B Sairengpuii in hi a tawlh hnan titih tawh a, a ban thenkhatte chuan innghahna lei sakhat mumal an nei tawh lova, tun dinhmunah a building veilam ban thenkhatte chauhvin lei nghet innghahna an nei tawh a, a building chhung hmun engemawzahah khi tlang a awm bawk a, chim mai thei dinhmunah a ding mek a ni.


Hunthar Local Council thuneitute chuan hetianga lei tawlh leh avanga mipui vantlang himna atana hlauhawm nia an hriat thu hi Aizawl bawrhsap, District Disaster Management Authority Chairman ni bawk Dr. A Muthamma hrihin mithiam a tirh hnuah amah ngeiin a enfiah a. Inrinni khan SE, Hazard Safety Cell, PWD & NDRF te nen a huhovin an enfiah leh a.

Report leh rawtna siam tura tih a nih angin SE, Hazard Safety Cell, PWD chuan a building-in innghahna mumal a nei tawh lova, lei a chet reng avangin a building bang pawh a vang tan zawngin a khi tlang a, a innghahna lei ala che reng a, engtik hunlai pawha chim thei a nih avangin a rang thei ang bera thiah ni se tiin rawtna a siam ta a ni.

Nimin khan uluk takin drone camera hmangin thla lak a ni a, a building lai vela a innghahna ban te chuan tanchhan mumal an nei tawh lova, building chhunga step thenkhatte pawh a inkhai ringawt tawh tih a lang a, a building vei lam chu lung sakhat deuhah a la innghat a, a building chhung hmun tam takah khi a awm tawh tih hmuhchhuah a ni.


Hetiang a nih avang hian Disaster Management Act, 2015 Section 34(k) leh section 26 in thuneihna a pek ang leh he dan behchhanin Dr. A Muthamma, District Magistrate leh Chairman, District Disaster Management Authority, Aizawl District chuan vantlang him zawkna’n Pi B Sairengpuii in hi a zavaiin thiah nghal a ngai a ni tih a puang ta a, hemi chungchangah hian thuchhuah siam nghal a ni. 

Aizawl district SP Pu C. Lalzahngova chuan Pi B. Sairengpuii in hi sorkar lam chuan an la thiat tan lo niin a sawi a, in neitu lam erawh chuan an thiat tan tih a sawi. Helaiah hian lirthei tlan dan ruahman fel turin Police dah a nih thu a sawi bawk. 

Helai hmunah hian ruah a tlak chuan lei hi tawlh deuh reng ni a hriat a ni a, a thlang lam NH 54 kawngpui ah chirh leh lei in hnawl thla a awm reng avangin PWD lamin thenfai hna an thawk renga lirthei veivak te pawh traffic Police te kaihhruaina hnuai ah a in chhawk a tlan tir an ni. 

Hunthar lei tlahniam avanga lei tawlh hi nikum June thlatir vel atang khan nasa taka tawlhin in engemawzat a chhia a, chhungkua engemawzat an insuan chhuak tawh bawk a ni.

Hetihlai hian Mualthuam khaw hnuaia leimin avangin Lunglei leh chhim lam district-te chu tlawh pawh theih lohva a awm hnuah vawiin khan sial tlang a ni a, leimin vanga tangkhangte pawh an tlan tlang thei tawh nia thudawn a ni. Ningani-a Ramlaitui khua a leiminin a hnawh nawn thenfai a nih hnu-ah nimin zing khan Mualthuam khaw bulah hian a min leh a, nizan khan kawng hi an siam tlang hman lova, vawiinah lirthei chitin kal tlang theihin then fai a ni ta a ni.

Aizawl district-a Darlawn khuaah pawh lei tawlh avangin chenna in 5 chu luah ngam lohvin an bungrua lak chhuah a ni a, in pakhat chu chim mai thei a nih avangin thiah a ni. 

-AIR Aizawl News

Post a comment

Powered by Blogger.