Mizoram sorkar leh HPC (D) hel pawl inremna thuthlung zulzui a Sinlung Hills Council (SHC) a sorkar lailawk chu tun thla chhung ngei a din hman tum a ni.
Home department atanga thu dawn danin SHC Interim Council chief executive member leh member dang turte hi rawtna siam fel a nih hnu-ah rawtna thar a lut a. Chumi kalh chuan HPC (D) hotute lamin a hranpa-in a hma a mi ang rawtna an siam leh a. Chu chu sorkarin a ngaihtuah tawh a, thutlukna siam fel thuai a nih a rinawm thu dawn a ni. Interim Council hi thla ruk aia rei lo a ding ang a, chumi hnu lamah chuan inthlan buatsaih tur a ni dawn a ni. Nilaini, June ni 27 khian Mizoram Assembly special session koh a ni a, hetah hian Sinlung Hills Council dinna tur dan duan, the Sinlung Hills Council Bill, 2018 chu putluh a, ngaihtuah a, pawm theih tum a ni dawn a. He bill hi Cabinet in a pawm tawh a ni.
Kum 1994 a khatihlaia rammu HPC leh Mizoram sorkar inremna thuthlungin a hrin Sinlung Hills Development Council (SHDC) chu kumin April ni 2-a HPC (D) leh sorkar inremna angin a hming thlak a ni dawn a. Sinlung Hills Council hi SHDC aia politics leh sum lama thuneihna sang zawk leh helai bial mipuite duhdan anga her rem a nih thu dawn a ni. HPC (D) leh sorkar inremna ang hian HPC (D) mi 112 te chuan April ni 13 khan Sesawng a Central Training Institute (CTI)-ah ralthuam an tung tawh a. Tunhnai mai khan chhawmdawlna leh an inbenbelna atan sorkar chuan cheng nuai 3 theuh a pe tawh bawk a ni. -AIR Aizawl News
Post a Comment