~Thang Khuma T-a

infiamna khawvelTunah hian Iceland ramah mihring 3,48,580 vel an cheng a, Mizorama mihring awm zat hmun thuma thena hmun khat aiin an tlem zawk.

FIFA World Cup khel thei ram te ber hian June 16 (zirtawpni), 2018-ah Russia khawpui Moscow-ah a vawi khat nan World Cup an khel a, Lionel Messi-a telna Argentina nen 1-1 in an inhnehtawk.

Euro 2016 khan football khawvel an barakhaih tawh a, Icelandic football chanchina hun ropui ber hmangin mekin Nordic thliarkar hian 'Football Hun Rangkachak" an hmang chho zel.


ICELAND-IN PROFESSIONAL FOOTBALL CLUB A NEI LO

World Cup khel ram 32-in player 23 awmna squad an nei vek. Iceland pawhin Russia-ah player 23 an hruai a, heng zinga 15 hi ram dang league-a la khel ngai lo leh an rama football khel thin an ni. Chuti a nih chuan an national team player zinga 35% chiahin ram dangah football an khel chhuak tihna a ni.

Chutih laiin Iceland hian professional club a nei miah lo nia maw le ? Mahse, Europe ram te reuh te hian football player a intodelh viau a, dan ang thlapa inziak lut (rigister) player 21,500 vel a kawl.

An player langsar leh hlawh tam ber chu English Premier League club Everton-a khel midfielder Gylfi Sigurdsson a ni a, Iceland tana goal khung tam ber a ni mek bawk.

An captain inzuah buk leh pa chhep chhawp tak Aron Gunnarsson-an English second division team-ah a khel a, Iceland tana khel tam ber ni mek Birkir Sævarsson chuan Swedish league-ah a khel ve thung.

RUAHMANNA THA LEH THAWHRIMNA RAH

Mihring an tlem em em a, Iceland tan harsatna lian tak a nih avangin football-ah hriat tham chanchin an nei ngai lo. 2000 chho tir lamah Football Association of Iceland (KSÍ) chuan ruahmanna thar a kalpui a, mipui hnenah football coach nih theih dan thiam takin a zawrh.

An mi leh sa zingah European football thuneitu UEFA hnuaia coach license nei an awm theih nan hma a la a, awlsam leh tlawm zawka an zir theih dan tur kawng a dapsak bawk.

Tunah chuan UEFA A leh B license nei coach 600 chuang daih an kawl tawh a, an ram mipui 550 zelah UEFA pawmpui coach pakhat zel an nei tihna a ni. (Khaikhinin England-a mihring cheng 11,000 zelah coach pakhat an awm ang a ni ve thung)

An coach zinga a tam zawk hi UEFA B license nei ni mah se 2003 thleng khan Icelandic coach zingah UEFA B lisense nei phak an la awm lo. Tunah chuan an intodelh hle a, hmasawnna atana pawimawh a ni tih KSI-in a hria a, naupang talent awmze neiin an tipung.


AWMZE NEIA HMALAKNA

Tuna Iceland football hlawhtlinna hi kum 15 chhunga KSI-in ruahmanna a neih bawhzuia hma a lakna rah chhuah anga sawi a ni. Thla sik reina leh ram vawt a ni a, an rama khaw lum ber thlaah pawh khawchin chawhrualin celcius degree 10-13 chauh a ni a, Mizorama thlasik vawt pangngai tak ang vel a ni.

December-ah phei chuan ni khatah darkar 20 deuhthaw zan hun an hmang thin. Chuvangin KSI chuan sum hlawm hmangin indoor stadium chhunga football khelh theihna a buatsaih a, an kheltual pawh tihlum theih a ni a, heng football khelh theihna indoor stadium-te hi school bul deuh zelah dinin school naupang chhawr theih turin a ruahman.

KSI hian sum a seng nasa hle na a, hmasawn ngei tumin awmze neiin hma a la. Tunah hian eng hunah pawha inkhelh theihna tur football field puitling 30 an nei tawh a, heng zinga pasarih hi indoor a ni. Hei bakah hian indoor stadium 150 deuhthaw an nei tel a, hetah hian phullem phahin khelmual pawh a pangngai aia te deuh hlek a ni ve thung.

2010 atangin a rah duhawm tak an hmu tan a, Icelandic naupang tam takin indoor stadium-ah football khelh an tuipui a, "indoor kids" tia sawi an ni a, football boruakin an ram a tuam. 2011 khan European Under 21 Championship khel theiin an tling a, khawvel huap football inelna liana an tel hmasa ber a ni nghal bawk.

2014 World Cup an khel teuh hle a, qualifying playoff-ah an chak loh avangin an tla. Mahse, 2016 Euro-ah tlingin 1966 world champion England an hneh a, quarterfinal an lut. Tunah a vawi khat nan World Cup an khel a, fuh takin bul an tan a, tuna an player pariat hi 2011 Under 21 squad zinga mi an ni.

HMASAWNNA A ZUANIN A ZUANG

Football bupui leh an ngaihsanna khawmualpuiah Iceland an awm a, an te em em bawk si. Eng lai mahin Europe khawmualpuiah hriat tham an ni ngai lo. 2012 khan FIFA ranking-ah 131-na an ni a, mahse, KSI hmalakna hautak leh harsa tak rah a lang zui.

2014 khan FIFA ranking sang 25 zingah Iceland a tel tawh a, tunah hian 22-na ni mekin kum ruk kal ta aiin position 110 deuhthawin a sang tawh a ni.


HA DOCTOR-IN TEAM A ENKAWL

Icelandic zinga UEFA A license coach hmasa ber chu Heimir Hallgrimsson a ni a, ha doctor (dentist) a ni. Mipui 5,000 vel chenna Heimaey thliarkarah hna a thawk thin. Ha doctor ni chungin KSI-in Icelandic football chawikanna tura hma a lakna hlawkpuitu hmasaah a tang.

2011 khan Icelandic team a zawm a, football team tana a thawh hnuin nuam a ti hle. Mahse, ha doctor nih nen a kawp a, doctor hna a thawh changin football team lamin an khel thei lova inbuatsaihna pawh an kalpui thei lo.

Tun World Cup-a an coach Wolf “The Dentist” Stansson tia a hming lem an vuahsak Hallgrimsson hian Iceland national team a zawm tirhin mipui thlawptu tak tak an nei lo niin a sawi. Team a zawm hma kum ruk chhungin Iceland-in inelna tak taka mikhual an thlen tumin vawi li chiah hnehna an chang.

Hallgrimsson hian mipui a chawk phur a, team thlawp turin a ko lut bawk a, an ram khawpui Reykjavik-ah nuam ti takin Icelandic mipuiin inkhel an en thei tawh. A hova qualifier hrang hrang khela mikhual an thlen thinah kum li chhung tlawm nei lovin vawi 10 an chak a, tum thum an inhnehtawk a ni.

Post a comment

Powered by Blogger.