Mizo basketball sulsutu zinga langsar ber H. Laldinsanga chu Basketball Federation of India chuan Indian U18 Men's Basketball Team coach ni turin an ruat. Saron Veng tlangval Mapuia hi Mizo zinga India aiawha khel hmasa ber a ni a, senior team coaching staff-a tel hmasa ber ni lehin junior team coach hmasa ber a ni leh dawn.
BFI secretary Chander Mukhi Sharma chuan June 6 khan Mizoram Basketball Association hnenah Mizo basketball tana thu lawmawm hi ziakin a thawn. Mapuia hi June 10, 2018-ah training-na hmun tur Bengaluru thleng tura hriattir a ni a, June 11-July 7 inkar hian SABA Zone Qualifying Round for the FIBAU18 Asian C'ship 2018 atan training an ṭan ang.
Qualifying Round hi July 9-13 ah neih a ni ang a, FIBAU18 Asian C'ship an thleng thei a nih chuan July 15 - August 2 inkarah training an chhunzawm ang a. Final round hi August 5-11, 2018 inkarah khelh tur a ni.
Sulsutu Mapuia
Mizo basektball-in tun dinhmun a thlen theih nan Mapuia hi sulsutu pawimawh a ni a, Saron Veng tlangval hi kum 90's tawp lamah basketball khel ṭanin a rualpui zingah a thiam pawl a ni a, a danglamna bik erawh midang aia a tei rei peihna hi a ni.
Kum 2004 leh 2005 khan India senior team tan 23rd FIBA Asia C'ship Qualifying Round-ah a inlan a, Mizo basketball tan hun pawimawh a ni a. Nikum November khan FIBA World Cup Qualifier-ah India senior team asssistant coach hna a chelh.
Mapuia chuan, "India team enkawltu zinga ka tel khan junior team kaihhruai ka châk thu ka sawi a, ka duhthlanna min tih hlawhtlin sak hi ka lawm hle. Tuna ka hlawhtlinna hi keima tan chauh a ni lo a, Mizo tan a ni. India team-ah Mizo basketball khel thiam an awm theih nana kawng sial sak turin theihtawp ka chhuah ang," tiin Vanglaini a hrilh.
TBL coach leh player ni kawp Mapuia hian Khatla TBL hi MSL awm hmain kum sarih chhung a zawnin a champion pui a, MSL ṭantirhah MVP ni nghalin season hmasa pahnih a champion pui leh bawk.
Mapuia a lawm
Mizo basketball-a player leh coach anga hlawhtling ber Mapuia chuan, "Pathian vang a ni a, MBBA hi kawng tinrengah pa nih an tling bawk. SYS leh Sports Council aṭangin thlawpna ka hmu ṭha ṭhin a, an chungah ka lawm hle. Tuna ka thawhna DIET, Aizawl leh School Education Department(SCERT) lama kan hotuten min hriatthiamna leh puihna zawng zawngah ka lawm takzet a ni.
"Sawi hmaih theih miah lo chu ka chhungte an ni a, anni puihna tel lo chuan basketball-a ka thlen tawh zawng zawng hi thlen theih a ni lo a. Anmahni vanga tun dinhmun thleng thei chauh ka ni," tiin Vanglaini a hrilh a, Mizorama a khelhpuite leh ṭhiante a hlawhtlinna atana an ṭangkai thu a sawi tel bawk.
MBBA-in hma a sawn
MBBA Technical Committee chairman Dr. Lalrinawma Hnamte chuan "India U-18 coach tura Mapuia koh a ni hi a ropui khawp mai a, Mizoram basketball-in hma kan sawn a ni. Mapuia hi Mizoram basketball tan a hlu em em a, amah hi player ṭha tak a nih bakah naupang zawk chher chhuaktu niin India tan player leh coach a ni thei hi kawng engkimah sulsutu a ni. MBBA chuan kan lawmpui em em a, duhsakna sang ber kan hlan a ni," tiin a sawi.
MSL awm hnuah MBBA hmasawnna a lang ṭan a, MSL4 MVP Lalrina Renthlei chu India senior team-a tel tura koh a ni a. MBBA leh BFI thawhhona a ṭha a, inelna duan thar 3BL-ah Mizo pawhin club an nei a, 'Aizawl Legends' chu club 12 zingah an tel. Nakkum hian India ram pum huap inelna Federation Cup a thleng dawn bawk.
Mapuia leh Ber
* Mizo zinga India basektball junior leh senior team tana inlan hmasa ber
* Mizo zinga India basketball senior team coaching staff-a tel hmasa ber
* MSL-a coach leh player nichunga champion thei hmasa ber leh awmchhun
* MSL-a MVP hmasa ber
* Mizo zinga FIBA Basketball Coaching Certification Course- Level 3 certified hmasa ber.
* Mizo zinga topper nichunga NIS diploma certificate (basketball) nei hmasa ber
-Vanglaini
-Vanglaini
Post a Comment