Chief Minister Pu Lal Thanhawla’n ruihhlo do hna chu mi tin mawhphurna a ni, a ti. Vawiina khawvel pum huapa hman, damdawi hman sual leh ruihhlo tawlhruk dona ni AIzawl Sipai Lammuala hmannaah he thu hi sawiin Chief Minister chuan, ruihhlo chi hrang hrangte chu ram hmasawnna tithuanawptu leh mihring hrisel lova siamtu, khawtlang tibawlhhlawhtu a ni a. A do kawngah sawrkar pawhin nasa taka hma lain sum tam tak a seng tawh a, a tulnaah chuan sen belh zel a la ni ang, a ti a. Ruihhlo dona kawngah kawng hrang hranga hma lak ni mah se, do rem tak tak tur chuan tuna thalaite hian ruihhlo laka fihlim duhna leh tumna rilru an put a pawimawh em em a ni, a ti bawk.
Social Welfare Department buatsaih ‘International Day against Drug Abuse & Illicit Trafficking’ hmannah hian Chief Minister bakah Minister pahnih - Pu H. Rohluna leh Pu R. Romawia leh Deputy Speaker Pu R. Lalrinawma te pawh an tel a. Excise & Narcotics Department-in ruihhlo a man, Court-in a chinfel tawh Heroin Kg 4.388, Cheng Nuai 84 Sing 3 Sang 7 man halral a ni a. School naupangte’n ruihhlo laka fihlim tur leh ruihhlo do turin thu an tiam a. School naupangte Placard siam intihsiakna buatsaiha a titha pathum hnenah lawmman hlan a ni bawk.
Khawvela ram hrang hrang inthlunzawmna, United Nations General Assembly chuan December ni 7, 1987 khan khawvela ruihhlo hman khawloh leh a tawlhrukna dona ni atan kum tin June ni 26 hi khawvel pumah hman thin nise tiin a rel a. Kum 1988 June ni 26 atang khan khawvel ram hrang hrang sawrkar, mipui vantlang leh pawlhovin ruihhlo hmansual leh tawlhtute dona ni atan an hmang ta a ni. - AIR News Aizawl
Post a Comment