KAN RAM ZIRTIRTUTE BIH CHIANNA

KAN RAM ZIRTIRTUTE BIH CHIANNA 

(A hua hua sih hlawkah)

26th June, 2018

~ David Sailo

High Sikul chin hnuailam hrut tawk tawk teh ang.

THINGTLANG HEADMASTER

Headmaster in chu in țha ber a nih loh pawhin in lian ber pawl chu a ni hrim hrim. Pension thlenga in benbel an tum tawhna a ni a, an in chu a lian a, a țawp bawk. Thil an nei ve fir fer a; an khawsak erawh a hniam viau. YMA President leh Kohhran Upa nih an kawp a, lal ber an ni tawp!! An khaw Sumo Service neitu an la ni zui. An Pay Scale ah an chiang hle a, chumi SDEO, DEO, Dy.Director chuan hlawhah min pha lo tih vel hi an țawng uanna ber a ni.

Kohhran an thunun a, khawtlang an thunun bawk a, Election lam khawihtu an ni bawk a, Sumo neitu nen..an in luh chhuahtu an tam thei hle. An nitin eizawnna Sikul aiin sawhthing huan etc in an rilru a luah a, hawhma leh kal loh phah nan an hmang zeuh zeuh. An fate chu an sikulah an kal ngai lova, Aizawlah emaw Phaiah emaw Hostel ah ngaihngam takin an dah thin. An sikul te chu a țawp thei hle. Sports lam thil atanga Computer thlengin a lang tun vek mai. An naupang lah Uniform a bal.

THINGTLANG ZIRTIRTU -

A ngheta thawkte zingah khaw mi nupui/pasala neite chu an nghet leh zual.Sikul aiin khawtlanga in vaivung nuam an ti zawk a, MLA,Minister leh District Official ten an khua an tlawh changin VC benghawng lo tak tak ten hmatheh berah an nei a, an lo ngaisang bik teh chiam ngailo. An Pay Scale ah an chiang tlat !!

Sikul tlakbalna te, zirlai neih tlemte hi an thenga thawngah a lut vak lo. Luphut hiat leh kuhva/zial lei tura tirh tur khawp zirlai an neih chuan an duh tawk viau. An in leh Bank Account a țhang tual tual a, an Sikul erawh a tla bal telh telh a, inchei taka sikul kal pawh a zahthlak a, chapal nen ti hnik hekin nitin an kal thin.

KHAWPUI HEADMASTER -

Kohhran upa an ni duh khawp mai. Khawpuia awm manah zirtirtirtu pawl(Association) ah a kul a tai an ni duh. An dikna chanvo an hre em em a, Sorkar tih theih bak thleng an hria!! Nitin eizawnna aiin zoram pum huap pawl hruaitu nihna changchawiin Office dawr, Minister hmu leh Meeting tih chhuanlamin Sikul an thulh tam hle a, heng ti kher lova chhuanlama an siam hi a tam zawk a la ni zui. Class an la țha ve peih lova, inti Official takin an awm țhin.

An Pay Scale, GPF tih vel hi an thupui ber a ni. Sikul an kal ve chhunin Discipline nei berah lan an tum leh thin. Kohhran, Association leh khawtlang an chhuanlam fo avangin an Staff ten an ei lo duh viau bawk. Result a chhiatin Zirtirtute mawhpuh tur an zawng leh țhin.

KHAWPUI ZIRTIRTU -

Kohhran hmeichhe lam ah hruaitu an ni duh viau a, Section YMA velah hruaitu lawk an ni duh viau bawk. Hmeichhe valai zaipawlah Contralto Part an sa duh. Loan la in Complete lo tawk vela insak an thiam a, Secondhand Car țha ve deuh tak an nei fur bawk.

A inti fing vek vek chu fing tak an ni. An Service ah an chiang em em a, Department danga thawk, an Level pui an hlawh pha lo fe fe te hi an thur chhuak nalh nalh thei. Sikul naupang hi an rilru luahtu ber an ni lo. YMA, Kohhran, Sunday School Committee tih velah hian an rilru an hmang zo a, an tuina ber zawk a ni. An fate chu English Medium School țhaah an dah daih a, an Sikul pawha kaltir ngamlo kha fate Result țha an chapo pui leh viau thin.

Senior tawhte chu vengchhungah chhiattawk, Mitthi ral leh Secondhand thingin duh hun hunah an chhuak mai țhin. A zelthel zawng leh ban hma dan zawng an rawt chhuak thiam hle. An dawhkanah hian in chhiar belh leh zirlaite tana chhawrnahawm taka awm an tum loh zia hriat nan eng teh ual chhawp tur an nei lo.

HINDI TEACHER -

A nghet ho chu an hlawh tam a, an thawk tlem thung. An Course chu kum chanve ah an zo a, thingpui lumtu leh Office a pawt zuah zuahtu ber an ni fo. Zahmawh incharge an ni duh viau bawk. Academic a Degree dang nei kawp te chu Subject dang lak kual tir an ni a, hetiang Hindi zirtirtu nei Sikul chu an vannei a ni mai.

Subject dang thiam lo an intih tlat chuan Sorkar hnathawk azawnga hahdam ber leh thawk tlem ber an ni. Taxi/Auto an nei a, an Service bawk thin. Hindi Subject chu Grade Mark ringawt a nih avangin an la thu tak lova, an zirtir chhuah Hindi a țawng zet zet sawi tur lah awm suh!! Headmaster tam tak aia hlawh tam zawk a, Hindi zirtirtu pa ho tak tak an kuh fur awm e.

SSA/RMSA -

Kum lama naupang zawk an ni a, thingtlanga thawkte chu mi inhnuai, VC in leh Sikulah te an khawsa thin. Khawpui leh District Capital atanga thawkte an nih tlangpui avangin an awmna khuaah an insawithei ve hle a, an inpui ah chuan engteh chiam an ni bik lo. Politician leh Department hotu challang an inti hmelhriat tha thei hle. Engamaha an ngaih lem loh an thawhna khua te chuan engah teh vak an ngai chuang lo.

Rilru nei takte chu ngawi rengin hna nghet zawk MCS thlengin an lut a, in ti fing leh inti hre pawl Whatsapp Group vela pawt pawt ho hi an SSA in an RMSA reng mai chu a ni. Pawl Social Media vela in hrosa, midang hneha fuihpawrh thiam tak tak an kuh țul a, midang Pay Scale ah an chiang hle. Hma latu tak tak ni ngam si lovin dikna chanvo hmachhuan pawl an tam hle bawk. Heng inti fing tak tak ho hrechiang mang si lote hian an pawl an kaihruai ve a, hmina mual mual leh fuihpawrh theih mual mual chu an nei ve thin. A ngheta thawk Senior thluak dam zán maite né pawh an ek pha lo.

An pawl hruaitute chu khawn lamah an chak duh tlangpui a, hmalakna leh sut kuak sawi tur an nei lo hle. In tih fin leh in hriat siakna in an Group a luah a, an in rual tlanga, mi diriamna leh hmuhsit lamah an chak hle bawk. Thla 2/3 hlawh lak theih loh an nei fo a, Sorkar ah a mi i thawh? an tihin aw nge aih ti a chhan tur pawh an chiang lo. A nghet te aia in ti Sorkar hnathawk hi a tam zawk an ni a, dik tak chuan Aizawl Taxi Driver, mahni ta ngei khalh te ai hian an hlawh tlem fe zawk a ni.

RMSA bikah chuan Sikul Building țha takah naupang an neitlem thei hle a, Room 3/4 luah loh a awl a awm ngei ngei. Naupang 10 vel bawrah zirtirtu 7/8 vel an awm tlangpui thin. SSA zirtirtu te chu hlawhlak a mumal loh avangin an ro ngawih ngawih a, chawhmeh kharchhawng nu an awh ngawih ngawih chang a tam mai.BRC Building luahlum loh tih hriat tak tak hmuh tur a tam a, CRCC(Cluster Resource Centre Coordinator) te chuan SSA hmalakna an endik thin a, Senior Middle leh Priimary Head te hian a nghet lo tih an hria a an lo ngaisang teh chiam ngai lo.