Vanlalsanga Tochhawng
- Khawbung.

Tunisia ram hi kan Lal Isua krawsa an khenbeh dawna, kraws putpui tu Simona te khua kha a ni e an ti a, khatih hun lai kha chuan, Kurini tih a ni ṭhin bawk awm e, tunah chuan- TUNISIA tih alo ni ta a ni. An ram hi Africa hmar tawp Mediterranean tuipui kama awm a ni a. A chhim tawpah hian Sahara tlang a in ṭan a, a chhak lamah Libya, thlang lamah Algeria te a ri a. An ram hi Sq. Km. 1,64,150 laia zau niin mihring pawh maktaduai 10 chuang an awm bawk a ni. An ram hi Muslim ram niin, Kristian leh Jewish mi tlem te an awm bawk. An rama tuipui kam hi amawi em avangin, a ram hmar lam ni eng mawi tak leh tuipui mawi tak tlawh tur hian khualzin mite an tam ṭhin hle a ni awm e.


vanlalsanga tochhawng

He ram hi tun hma BC 1200 lai chuan Suria leh Lebanon ten an awp ṭhin a, chumi hnuin Rome sawrkarin BC 146 thleng khan a lo awp ve tawh bawk a ni. Tin, Tunisia hi kum 1881 aṭang khan French sawrkarin a awp leh a, kum 1956 khan French hian independent a pe ve ta a ni. An ram chhim tawp Algeria nena an inrina laiah hian petrol an lai chhuak nasa hle a. A ram hi 1974 a Libya sawrkarte nena inremna anneih hnu kha chuan an ram hi a ralmuang ta em em a ni. Arab sawrkar zinga sawrkar moderate ber an ni hial a ni. A ram chhim lam Mediterranean tuipui kam vel hi paizawl zau tak ni mah se, tlang te pawh an awm nual a. Tin, an tlangah te hian ram ngaw a la ṭha hle bawk a, Oak thing hnah hring dup leh Cork thingte hi an tam em em a ni.


Tin, an khawpui Tunis chhak lam Capebon Peninsula vel hi huan zau tak mai an ni a, heng huan aṭanga an thar chhuah tam zawk chu orange te, lemon te, nimosa te, majnoleus te, jasmine te, rosa te, orchids te leh olive te an ni a. Tin, heng an thil thar chhuah an zawrhna tur hian market ṭha tak tak an siam bawk a ni. An ram mainland bul mai ah hian Islands- Gerba Island te, Kerkenah Island te an awm ve a, heng Island te hi an ram ti nuam tu leh sumdawnna ti hlu tu an ni bawk awm e. An ram hmar lam hi a ram a ṭha in mihring pawh an tam zawk bawk. An ram mihring hian Arabic ṭawng an hmang uar ber a, French ṭawng hmang pawh an awm tho bawk. An ram chanchinbu pangaa pathum hi French ṭawnga tih chhuah a ni nghe nghe bawk a ni.

Tin, an khawpui pahnih Tunis leh Gerba- ah hian Jewish te pawh an awm nual a, black decendent (mi hang) sal thlahte pawh an awm nual bawk a ni. Tunis ramah hian an living standard pawh a sang viau mai a, mahse mi hausa leh rethei te nunphung leh khawsak erawh a kar a hla ve hle thung a ni, hei hi sawrkarin siam ṭhat tumin a bei nasa hle bawk a ni. Health facility a ṭha a, tin, educational system hi Africa khawmualpuiah hian a ṭha ber bawk a ni. Primary school aṭanga University thlengin zirlaite hi free education pek vek an ni bawk. Kan ram nen chuan in ang lo haih haih tak zawng kan ni e.


An ramah hian iron, lime, phosphate industry te a ṭha a, tin, agriculture lamah pawh wheat, barley, vegetables te an thar ṭha hle bawk a, zu(wine) siamna an nei ṭha in an zu te hi a tuiin hralh a kal bik em em a ni an ti. An hmeichhiaten cushion seat chhah tak takah te ṭhu in carpet mawi tak an tah a, handloom embroider cloth te, pangpar chi hrang hrang, hnah lem te leh rawng chi hrang hrang hmangin an thawk chhuak nasa em em a ni. Heng bakah hian copper work te, leather leh pottery te hi khawvel hmun hrang hrangah an thawn chhuak nasa hle bawk a ni. An ram hmeichhia te hi industry hrang hrangah hian an ṭangkai em em a, mahni phak tawk hna thawh an tum deuh vek a ni. Hei vang tak hian Arab ram tam zawkte angin an hmeichhia ten puanin an lu an kuh ve lo a ni.

Kum zabi 9-naa an Mosque sak "Grand Mosque at Kairolen" an tih ropui leh lian tak hi khawvel Muslim biak in zingah Mecca tluk hiala ngaih a ni. Tin, Rome sawrkarin a awp laia in an sak tawh ropui tak takte pawh hmuh tur a la tam hle bawk a ni. Hetianga sakhaw hmun hlui tam tak awm na leh, khawpui upa tawh tak an nih vang pawn hmun hlui a tam hle a. Heng en tur hian khualzin mite pawh an kal fo a ni awm e.

Post a Comment

Powered by Blogger.