NT Lalbiakkima infiammiNT Lalbiakkima'n 2016 Olympics champion leh world number one Dusmatov hnehin international medal a hnek chhuak

NT Lalbiakkima'n Mizo boxing chanchina sawi zui tham hnuhma a hnutchhiah a, vawiin (June 8) hian Astana, Kazakhstan-ah Uzbekistan boxer Hasanboy Dusmatov hnehin lightflyweight-ah President's Cup semifinal a lut.

Mizo boxer hian rin kai zo lo mah se 2016 Olympics champion leh amatuer world number one Dusmatov-a hmaah huaisen takin a theihna a lantir. Inlehthalna thlentirin round thum an inbeih hnuah hnehna ban a phar a, hnehna a chan tawha ropui ber pawl a hnek chhuak.

NT Lalbiakkima'n international medal a hnek chhuak - Infiamna Chanchinthar

Siaha fighter Biakkima hian semifinal a luh rualin a chhe berah India tan bronze medal a awrh dawn tih a chiang nghal. Inrinni (June 9) tlai dar 3-ah tournament thlengtu Kazakhstan boxer Ezahn nen inbeiin final luh an inchuh ang.

2014 atanga kum li LPS Pro Fight lightflyweight champion ni zawn mek Biakkima hian International Boxing Association (AIBA) hriatpuia Kazakhstan buatsaih International Elite Boxing Tournament vawi ruknaah champion turin rin a hlawh zui viau a, Dusmatov a hneh hnuah ngaihven a hlawh phah hle a ni.

Kum 24 mi Dusmatov hi AIBA hnuaia lightflyweight number one a ni mek a, 2016 khan Rio De Janeiro Olympic Games-ah Uzbekistan tan gold medal a awrh. 2015 leh 2017 Asian Championship-ah a champion ve ve a, 2017 World Championship-ah silver medal a la bawk.

India coach Jaisingh Patil chuan Biakkima chungah beiseina a neih san thu sawiin, tute pawhina an rin Dusmatov a hneh hnuah 'a inhnek tawha a chet that ber' a ti a, gold medal chuh tura a inlan zui ngei a ring bawk.

Boxing India pawhin hnehna ropui a ni tiin Biakkima leh an coach Patil an lawmpuina an tar lang nghal a, Mizoram boxing pawhin Indian Navy boxer hlawhtlinna hi chhuanawm a ti hle a ni.

NT Lalbiakkima'n international medal a hnek chhuak - Infiamna Chanchinthar

Feet 5 vel awrha sang Biakkima bakah Mizoram boxing chuan Olympic Games-a tel thei turin Mizo zingah beiseiawm tak tak an awm niin a hria. Tuipui tlangval pahnih Johnkenty HC Vanhlimpuia leh Laldinmawia bakah tunhnaiah Vaivakawn nula Lalfakmawii Ralte a che tha hle bawk.

Mizo coach Sete Lalchhuanawma (Sete Konvicted NW Renthlei) chuan Biakkima thuawihna leh inhlanna a fak a : "Mizo boxer dang ang bawkin national camp-ah a lut fo tawh. Mahse, Mizo coach-ten a that lohna lai kan hrilhin lawm takin a pawm thei reng.

"Thlen san a tum tak zet a, insiam that tumin a bei zui char char thin. Mizoram boxing-a kan hmelhriat tirh leh India aiawha a inhnek hnu thlengin Mizo coach leh hruaitute a zahna leh thu a awih theihna a la danglam lo," a ti.

~Thang Khuma T-a
 

Post a comment

Powered by Blogger.