VAL UPA COUNCIL - ZORAM PEOPLES’ MOVEMENT - TIMES OF MIZORAM

Breaking

Home Top Ad

Post Top Ad

VAL UPA COUNCIL - ZORAM PEOPLES’ MOVEMENT

~ Mahmuaka Chhakchhuak


 ZORAM PEOPLES’ MOVEMENTZORAM PEOPLES’ MOVEMENT ten an Pawl hruaitu ber (Apex Board) atan VAL UPA COUNCIL an ruat hi a awmzia ber chu Collective Leadership tihna a ni. ZPM hian Sorkarna a chan chuan MLA zawng zawng chunga thunei turin an chungah an awm ang tihna a ni. ZPM in Sorkarna a chan hunah pawh hamthatna engmah an dawng lo ang a, chanvo engmah pawh an chang lo ang. Chutiang atan chuan mahni inpekna avanga he VUC ah hian tel an ni. Kan Sorkar hrawn mek – Congress hian an hun hmasa lamah khan anmahni enkawl turin ETHICS a din ang deuh kha a ni a, nimahsela, ETHICS ang kha chuan an kut phuarin a awm ve dawn lo a ni. 





ETHICS dinhmun kha han sawi chiang hmasa ila : Congress Party chuan a hmalama MNF ten term hnih lai mai Sorkarna an lo chan tawh avangin Sorkarna chan ve ngei tumin mipuiah an theih ang angin vote zawn nan mipui ei theih turin an in zuar a nih kha. Khatah khan Kohhran rawngbawltute ngei pawh an dah pawimawh thu an sawi nasa a, tichuan anmahni enkawl turin ETHICS pawh din an tum thu an sawi a ni.

Tichuan, kum 2008 kum tawp lamah chuan MLA kan han inthlang ta a, Congress Party chuan seat 40 awm ah seat 32 ngawt lain Sorkarna an siam thei ta mai a, mipuite ngei pawhin an lakah beisei kan nei sang a nih kha. Tichuan, Congress chuan Sorkarna an chan atanga thla thum hmel a hmuh hnuah chuan hetiang hian CM Office atangin ETHICS Committee member tur te chu an han puang ta a :

1. H. Raltawna IAS (Rtd)
2. Rev. C. Rosiama
3. Rev. C. Lalsangliana
4. Rev. R. Lalrinsanga
5. Maj. J. Thanruma
6. K. Sapdanga
7. Lalbiakzuala ( CYMA aiawh )
8. Lalbiakengi ( MHIP aiawh )

Nimahsela hetih hunah hian terms of reference anla neih loh avangin engmah an ti thei rih lo a, dinhmun leh chanvo lian tak ; Sorkar thar (Congress party)a thuneitu ber ber te Chief Minister leh Minister dang zawng zawngte pawh a tul huna thunun thei tur anga dinhmun sanga awm si, nimahsela tihtheih engmah nei bawk si lo an ni. A awmzia berah chuan Mobile handset manto taka Sim card activated loh thun ang vel hi a ni ber mai.





ETHICS chuan committee an han nei thin a, sorkar lam atangin an thingpui inna man tur an rawn pe leh thin ringawt a, chutiang chuan hun rei tak an awm a, a hnuah chuan anmahni Committee memberte zawk chu term of reference duang turin an ti ta a, anni chuan an han duang a, an theh luh chuan a reh ta vang vang mai a, kumhnih zet a reh chuan ETHICS chu an tiltiak tan ta mai a, a hnuah chuan Sorkar zawk chuan a thar a ruat ta a. Heng ETHICS committee te hian an hunlaiin thiltih an nei tam lo hle mai a, tumkhat erawh C.M ber chu an luhchilh a, member zinga senior tak pakhat chuan Pu Lal Thanhawla hnenah chuan ‘ Ka pu, vantlang hmuh theih tura TV-a tawngkam uchuak deuh sawi i ching te, i hmel hlim hmuh tur awm lo lutukte hi chu insiam that a va tha em?’ a tih chu C.M chuan ‘ Pastor thankin leh politician thankinin ka chhiatna ber zawngin min bei a, ka rilru hi a la na em a ni. Tun hnaia press conference-ah khan zawhna buluk lutuk min zawt a, a chhanna pawh a buluk lo thei lo a ni,’ a ti ta daih mai a, midang awmve te leh a hrilhtu Pastor senior ngei pawh chu a hrilhhai ngei mai.

Hetiang hian he ETHICS Committee, a pawnlam landana lian leh pawimawh hmel tak hian awmzia a awm ta vak lo a, Ni 27; 6; 2011 ah I&PR Auditorium ah Sorkar hotu liante nen inkawmna hun an nei a, hetah hian ETHICS hruaitute chuan ‘ nungchang mawilo laka ram hruaitute leh sorkar hotu liante lo venpuia, thurawn lo pe ve thin turin Sorkarin ETHICS Committee hi a din a ni ‘ tia pawimawh hmel taka an in ngaih hman hial kha. Nimahsela an beisei angin thil a kal ta si lo a, thil tihawm tak tak an ti ta lo a, a hnuah phei chuan kan hriat angin Pu Lal Thanhawla CHAL HNAWIHSEN thuah pawh Chanchinbu mite’n an zawh pawhin ‘kan lo hre lo reng reng a,’ tih mai maiin an chhan tak kha! Hetiang hian he Committee pawimawh hmel tak hian thiltha tih a nei thei vak lo a, tumkhat khawthlang lamah phai buh seng an zuk sengpui lai news ah kan hmu a, Vanapa hall ah ni 11 Sept 2012 ah ‘Rorelna Dik’ tih thupuia hmangin programme hman a ni a, Lunglei ah ni 03 Oct 2012 ah Saikuti Hall ah ‘Rorelna Dik’ tih thupuia hmang bawkin Seminar an va hman bawk kha. Heng bak tarlan loh pawh a awm ang. Behind the scene lama ETHICS Committee hruaitute leh Congress hruaitu thenkhat inzawmna social media lama darh chiam pawh a awm kha!





ETHICS Committee chungchang chu hetiang hian kan hrethiam mai awm e. A awmzia berah chuan Congress hian mipui laka hmaiphihnan an hmang a, lemchanna atan an hmang a, hmingthat duh vangin kan Sakhaw hruaitu leh pawl aiawh, mi zahawm tak takte hmathehah an hmang a ni. Kha Committee kha a tirah chuan thahnemngai takin Pu Lalzirliana leh Pu H. Liansailova te chuan hma an la a, nimahsela Chief Minister berin Dictator takin rorelna a kalpui takah chuan an thahnemngaihna chu a thamral lo thei ta si lo a ni.

ZORAM PEOPLES’ MOVEMENT chuan hetiangah hian VAL UPA COUNCIL hi a din lo a, a kalpui dawn lo. Tun atangin VUC hruaitu a ruat a, an kutah hetiang hian thuneihna a hlan bawk a ; -

1. MLA Candidate tur te reng reng chu ziakin thutiam an neih tir vek ang a, tawngkamin an neih tir bawk anga, chu chu video-a coverage vek a ni ang. An thutiam chu mipui hmuh theih turin tlangzarh a ni ang.
2. Chief Minister tur an ruat anga, Cabinet tur pawh an ruat ang.
3. Chief Minister leh MLA ten dik lo taka thuneihna an hmang emaw zilh ngai an nih chuan an zilh thin ang. 
4. C.M leh MLA ten mipui hnena an inzawrh angin hna an thawk em? tih an en reng anga, mipui nen an inkarah an ding ang.
5. Tul an tih hunah MLA te kokhawmin meeting an neihpui thin ang.
6. Thla thum danah Party hruaitute hnenah an hmalak dan report an pe thin ang.

Hengte hi a pawimawh zual te a ni.





VUC term chu kum nga (5 yrs) atan a ni a, Office pawh nei loin mahni awmhmun atangin zalen takin Sorkar kal dan an lo thlir thin dawn a, Sorkar chu mipui tana tangkai thei ang bera a kal theih nan an ngaihtuahna an hmang reng thin dawn bawk a ni. Hetianga Collective Leadership hi kan rama kan la practice loh avang hian hrethiam lo tam tak kan awm ngei ang. State kan nih atanga tun hun thlengin Party Leader chu Sorkarna changtu Chief Minister a nih zel thin avangin an Lal em em thin a, an that leh that lohah ramin kan hmasawn danah a kar a hla thei a ni. Tin, anmahni ngei pawh chu felin tha hle mahsela a hnuai ami te, mipui thlengte hian kan ti khawlo thei bawk a ni. Hetiang a nih avang hian kum 30 chuang Party Leader Chief Minister na hnuaia awm tawh loin Val Upa Council thuneihna hnuaia Chief Minister leh MLA te awm hi he kan Zoram hian a mamawhin a tul takzet tawh a ni.

No comments:

Post a Comment

Post Bottom Ad