R. L. Thanhnuna, Secretary CWBYMA

Mihring hi nungho tur leh khawsaho tura siam leh inmamawh tawn vek kan ni a. Chenhona reng rengah hruaitu nei lovin a awm theih tak tak loh a ni. Hruaitute a zir hian pawl chu a chakin a chak lo mai thin a ni.
HRUAITUTE MAWHPHURHNA

    Hruaitu nihna leh dinhmun hrang hrang a awm a, a pawl a zirin mawhphurhna hrang hrang a awm a, tun tumah chuan pawldang hruaitute lam sawi lovin, kan Branch YMA chhung a Committee hrang hrangte kan zavaiin kan tel a ni tih kan hriat a tha awm e.

    Mi tam tak chuan YMA hi ‘Non Government Organisation’(NGO) tam tak zinga pakhatah an ngai a, a dikna chen chu a awm tho awm e. Amaherawhchu a hnathawh leh Mizo Society a a dinhmun han thlir hian NGO satliah mai ni lovin, khawtlang nena inngheng tlat leh kal kawp tlat a ni tih chu kan hre vek awm e.Hetianga khawtlang nena kalkawp tlat a nih avang hian YMA Hruaitu nihna leh mawhphurhna chu a sang em em a ni. YMA nihphung hrechiang mang lova, he pawl ropui tak kaihhruai hi a hlauhawm hle a ni. 


Tunlai khawvel (Computer Age)ah hian YMA nihphung, hruaitu nihna leh mawhphurhna a sang zual tawh hle a, kan memberte kan hruai dik leh dik loh, kan kawhhmuh fuh leh fuh lovah hian kan ram leh hnam hi thui tak a innghat a ni tih hruaitute chuan kan hriatreng a ngai a ni.

1. YMA NIHPHUNG:
    YMA nihphung hrechiang tur chuan YMA Flag rawng pathumin a entir hi kan chian a ngai a, a nihphung pawh Flag rawng atang hian a chiang ber awm e. YMA Flag rawng hi Mizo rawng neih hmasak ber a nih piahlamah awmze thui tak nei vek an ni.

    a) A sen : YMA chu pawl lar tak a ni. Kan Mizo Society-ah chuan YMA hi a bet tlat a, khawtlang nun hi YMA tellovin a kalh a kim thei lova, a bik takin chhiatniah a ni leh zual. Chutiang taka dinhmun pawimawh luahtu a nih avangin pawl lar tak leh pawimawh tak a nih avang hian, a hruaitu nih leh member nih chu inchhuanna tham a tling a ni. YMA hmalakna leh a thiltihna avanga mi zah a kai kan tih rualin, YMA lar vang leh thiltihtheihna avang a YMA hmachhuan leh nihna hmanga mimal emaw Sorkar emaw nawr vak vak erawh thil mawi ber a ni lo. YMA hi Pressure Group ni lovin tlawmngai pawl a ni tih hi kan hriatreng a tul a ni.

    b) A var : YMA chu pawl thianghlim, mitin huapzo, Politics rawngkai lo, tlawmngai pawl a nihna hi a ropuina pakhat a ni a, mitin huapzo tih hi YMA Member atan mitin a huapzo tih lam erawh a kawk lo a ni. YMA hmalakna leh thawhna hian mitin a huapzo a, mi lian leh mi te,rethei leh hausa pawh a diknaah chuan a thliar hrang lovin, angkhat rengin a en tih pawh kan hriat thar leh a tul hle. Kohhran chuan anmahni Kohhran chauh emaw a huap a, Mizote min phuarkhawmtu chu YMA hi a ni. Mizote kan insuihkhawmna chu YMA hi a ni a, kan lakah hian mipuite thikthu pawh a chhia a, thianghlim taka kal turin min beisei a, chutiang tur chuan min en reng a ni.

    c) A dum : YMA chu mi chanhai, riangvai leh lusun te thian a ni.YMA ten kan rawngbawlna langsar leh pawimawh tak, mite ngaihsan a nihna pakhat chu VIP atana mi chanhai, riangvai leh lusun te kan dah pawimawh tlatna hi a ni. Chhiatni eg thihna, leimin, in kang, mibo zawn etc a lo thlen hian a buaipuitu bera YMA a tan avangin, chhiatna lo thlen chang pawhin mite inthlamuanna, innghahna leh belh ber a la ni fan. YMA thuvawn ‘Tanpui ngaite tanpui’ tih kan kalsan hun hunah YMA hi a kehchhiat a rinawm a, chutiang a lo thleng palh a nih chuan a tuartu tur chu Mizo te tho kan ni.


2. YMA  KALPHUNG :
    YMA hi pawl danglam tak, a ang dang pawl awm leh thei tawh lo, nghet taka ding tlat mai, namthluk palh vaih erawh chuan tho leh thei tawh lo tura ngaih a ni. A len avangin a tlu har a, a tluk palh vaih erawh chuan sawp nasa tak tur a ni a nga, kan Mizo Society hian a pherh phah vek thei a ni. YMA hi a hlut em avangin hruaitu tam tak chuan a kal chak zawng aiin, a din ngheh leh ngheh loh an ngaihtuah a, chak taka kal anga a lan lai hian a dinna hmun a chhe ve mek a ni tih hriain, nghet tak a kal dan an zawng fo thin a ni.

    a) Pawl a rinawm : Sum leh paia rinawmna hi awlsam taka lang leh hmuh theih a nih laiin, pawl a rinawmna hi chu rei tak a thup theih a, thenkhat phei hi chu finfiah ngaihna awm lo a ni fo mai.Tlawmngai pawl a nih avangin kawng engkimah Sorkar leh vantlangin kan ring a. Chutianga Sorkar leh vantlangin a ngaih pawl a hruaitu nih hi thil chakawm tak a ni mai thei. Mase a nihna leh a thil tum te hrereng chunga hruaitute kan kal zel a pawimawh hle a ni.
    b) Thiltih a rinawm : YMA te hian kan thiltihah mite mit a tlun chhoh thin avangin mite thinlungah kan tla na a, thangthar zelin chu hming mawina leh mite rin ngamna chu an la seng dawn avangin,kan thiltihna apiangah kut tlingin thil kan ti tur a ni. Sawi fel thiam te, phatmar thiamte hi a tul chang chu a awmna meuh mai. Mahse kan tih chu kan tih nise la. Kan tih a nih chuan rintlak turin i awm ang u. YMA phiah chu fai sela, YMA siam chu tlo sela, YMA sawi chu dik sela, YMA in ‘NI’ a tih chu ‘NI’ chhunzawm zel sela, chu chuan zahawmna a keng a, chutah chuan dikna leh rinawmna a awm a ni.

    c) Tlawmngai pawl satliah a ni lo: YMA hi tlawmngai pawl satliah mai a ni lova, tlawmngaihna vawng nungtu pawl a ni tih hi kan theihnghilh loh a tha. Pawl thianghlim a ni tih kan hriat rual hian, a hruaittu leh member te hi chu mimalah mi thianghlim kan tling hauh lo rual hian; pawl ang chuan pawl thianghlim a nihzia kan hriat fo thin a ni. Tlawmngaihna leh inpeknaa innghat YMA hi tung nung zel tur chuan hruaitu thlan atanga kan fimkhur a ngai a, kan fimkhur loh chuan kan hmuh lai reng hian vuiliam a tul mai ang.

    d) Mi min hmuh dan : YMA-ah hian Mizo kan nih avang mai a tel ni lovin, midangte tanpuitu pawl, pawl thianghlim tak a ni tih kan hriat avanga tel tur kan ni. YMA hi zu daptu pawl, ruihhlo do pawl, mi vuak hrat pawl leh mi rikrap thin pawl angin mi ten min hmu ang tih a hlauhawm hle. Tin, hruaitu leh memberte hi YMA hlimthla kan ni a. Mite tanpuitu, mite tana malsawmna thlentu, mite thlamuanna thlentu kan ni tih hi miten an rawn hmuhtheih nan tan lak chhoh zel kan ngai a ni.


3. HRUAITU NIHNA
    Pawl a kan lo insiam hian hruaitu neih a tul a. Pawl chak leh chak lohna hi hruaitute tlin leh tlin lovah thui tak a innghat a ni. Hruaitu dinhmun a ding thenkhat chuan a hna leh mawhphurhna lam thawk peih lova, a nihna duh avanga hotu anga awm tum kan awm fo thin. YMA ah hian hotu kan awm lova, hruaitu kan ni tih hi kan hriatreng a tul. Hruaitu ni lova hotu nih duh hi chuan pawl a ti chak lo thei a, pawlin harsatna leh bahlahna a lo neihin tute emaw dem kual a, mawhphurhtir tur kan zawng leh ruai thin a ni. Hruaitu tling chuan an pawlho tan tha leh zung, sum leh pai thlengin an seng huam a, pawl thiltih that leh hmingmawina a lo thlen changin, thiante avang a ni tiin midangte a chawimawi a, pawl thiltih sualah leh hlawhchhamna harsatna a lo thlen chuan amah leh amah thiam loh a in chantir a, a mawh a la ngam thin. Hruaitu tha lo leh tling lo chuan pawl thiltih thatah “ka” an tizing dup a, a tha lo lamah erawhchuan “an” ‘in” emaw a ti hlauh thung.

    Hruaitu nihna leh dinhmun heng atang hian mahni theuh i lo in enfiah dawn teh ang u.

1. Hruaitu chu tihtak zeta thil ti mi a ni: Eng pawl pawh hian thiltha tih kan tum theuh a, a hlawhtlinna chu a thawktu a zir a ni fo. Hruaitu berin tihtak zeta thil a tih chuan tumah an dawngdah ngam lo. Tih tur rela pass zet a, zuzi san leh hruaitu dinhmun a ding chuan reiloteah hruai tur a nei lo mai thin.

2. Hruaitu chu a insiamrem thiam tur a ni : Kan khawvel hi a inher danglam chak em em a, naupang thanglian zelte hi an fing chakin an rilru thlek hmang leh zeiziate pawh a danglam chak em em a ni. Hruaitu chuan hengte hi a hmuthiam tur a ni a, hun inher danglam zelah, a in siamrem thiam tur a ni. 

3. Hruaitu chu mi dawhtheih a ngai : Mi tam tak chu kan dawhtheih loh avangin kan hlawhchham fo. Hruaitu chu sawiselna karah pawh tuang tihchhah a ngaih hunah tichhah a, rilru kawih her mai mai theih loh, nghet taka ding thei mi nih a ngai.

4. Mahni inthunun : Tanpui ngaite tanpuitu kan nih rual hian, sual kan dova, thil tha lo tih kan khap a, chhiatna a min hruai lut thei thil kalsan tul hun a awm. Hruaitu chu entawn tlak in a awm hram hram tur a ni.

5. Sawiselna hlawkpui : Hruaitu nih hi a famkim lova, thil a ti diklo ve thei a, midangin an sawisel pawhin a ngaihtuah a, insiamthat a tul a ni tih hriain haw mai lovin kawng dik leh thu dik ngaihtuahin chung sawiselnate chu a tan hlawkna a ni zawk hlauh thin a ni.

6. Midang chher chhuah : Hruaitu chuan mahni hmasial lova, a awm loh hnu pawha fel taka pawl hruaitu tur a chher chhuak thin tur a ni. Hruaitu tha chuan a awm loh hun pawh a hruaitu tha a chher chhuah loh chuan hruaitu tha tak tia sawi harsat chang a awm fo thin.


7. Hmahruaitu : Hruaitu chuan hnathawhah te, thawhlawm thawhah te, rorel kenkawhah leh bawhzuina kawngah te, sual dona kawngah te leh thil tha tihna kawng tinrengah hma hruaitu a ni fo tur a ni. Kawktu leh mite thawh atana reltu ni lovin a taka hma hruaitu a ni thin tur a ni.
8. Hna sem : Hruaitu chuan thil zawng zawng a maha tih a tum chuan a in daih thei lo. Chuvangin hruaitu tha chu hna semzai thiam, mite rinna chang hria leh rin tur tha hre mi nih a ngai.
9. Taimakna : Hruaitu kan nih ang ngeiin kawng tinrengah memberte aiin kan taima in, hma kan hruai thin tur a ni. YMA hruainaa Qualification pawimawh ber chu taihmakna hi a ni. Kan memberte hian hruaitu nge kan nih hotu tih hi min chikna a ni fo thin. Hnatlan nikhua a hotu ang mai a kawh kual reng mai leh memberte tirh ngawt hi YMA ah hi chuan a remchang lo fo tih kan hriat a, a rimchhe lai, a hrehawm lai leh a pik lai tawn hmasa ngam hruaitu kan nih a pawimawh hle.

10. Committee thurel ngaih pawimawh : Hruaitu mawhphurhna pawimawh tak pakhat chu Committee ngaih pawimawh a ni. Committee a kan rel fuh chuan hmasawnna tak tak a tling a, kan rel fuh loh erawhchuan pawl chhiatna leh mualphona a thleng thei. Heti taka pawimawh a nih avang hian Committee ngaih pawimawh loh hi a pawi hle a ni. Pumpelh theih loh rokhawlhna kan nei a nih chuan,pawngpaw thulh mai lovin kal theih loh tur thu hriattir thin a tha. Committee a hun taka tan leh a hun taka kal thin hi mi puitling nihna pakhat a ni. 
Tin, hruaitu kan nih chuan Committee-ah ngaihdan sawi thei tura ngaih kan ni a, thenkhat chu ngaihdan pawh sawi lova thu tluan thak thak kan awm thin. Tin, thurelah kan ngaihdan a tluk loh changte hian kan rel a nih miau avangin kan pawm thiam tur a ni. Hruaitu thenkhat chu a ngaih dan a tluk loh avanga hmundanga sawi thin leh bawhzui phur lo an awm thin, hei hi hruaitute tan chuan kan tih loh tawp tur a ni. Tin, Committee a kan thurelte hmundanga lo sawi chhuak thinte a awm theih a, hruaitu chuan zep tur leh puanzar awm chu a thliar fel thiam tur a ni.

    Tin, hruaitu tha chuan a rel a ngaih pawimawh tluk chiahin thurel bawhzui a taima thin. President/Leader mawh-phurhna a awm a, Secretary mawhphurh-na leh OB dang mawhphurhna leh Committee Member te mawhphurhna turte pawh rel chang a awm thin a, mawh-phurhna nei tura ruat ten tha taka kan hlenchhuah hian hruaitu tha nihna pakhat chu a ni.
11. Hruaitu chuan pawl thil tum a hre tur a ni : YMA hruaitu chuan YMA thil tum a hrereng tur a ni. Kan pawl thil tum kan hriat loh chuan engtinnge kan memberte kan hruai that theih ang. Hruaitu chuan “Tanpui ngaite tanpuitu”thuvawna neitu kan nihna te, kan pawl thil tum leh a dinchhan pathum - Hun awl hman that, Zofate hmasawnna ngaihtuah, Kristian nun dan tha ngaihsan te hi kan hre reng tur a ni.


4. HRUAITU  CHAK LOHNA
a) Chapona leh mahni chauh in rinna : Hlawhtlinnaah chapo a awl hle, mi min fakna reng reng hi mahni inhmuh ropui nante, midang sit phah nante hman a hlauhawm. Thawhpuite aia fing leh hre zawk a inhmuh te hi chetsualna awlsam tak a ni. Hruaitu fel leh tha thiamna sang deuhte,hruaitu senior leh kum tam deuhte zingah midang rin tawk lohna leh mahni ngeiin tih kher duhna a awm awl a, chu chu thawkho zingah harsatna siamtu a ni thei tih hriatreng a ngai.

b) Lar duhna : Mitin hian lar hi kan duh thlangpui theuh awm e,hei hi mitin thinlungah hian a awm hlawm a ni.Hruaitu tha chu a that avangin a lar lo thei lova, mahni intih lar tumna erawh sual hnathawh a ni thei. Lar duh avanga hruaitu nih chuh a awm theih a, chuting mite chuan chet sual hun an nei chawk thin.

c) Itsikna leh thiante rel : In itsikna hi hruaitute zingah a awm thei a ni. Thawhpuite itsik emaw dinhmun tha deuh an chan avanga thik emaw hi hruaitu chak lohna hlauhawm tak a ni. Miin kan thawhpuite an chak lohna lai leh an rahpelhte an sawi lo sawi zawmpui mai a awl hle.Miten kan thawhpuite rel leh sawichhiat an tum pawhin kan lawm zawng a ni lo tih an hriatthiam tur zawnga awm a tha. Tin, thawhhona kawngah inphut lutuk avangin thawhhona a chhe thei tih pawh kan hriatreng a ngai a ni. Engemaw hlekah hruaitu te zingah a awm lo a mualpho zawng a sawi vak thin te hi hruaitute tih tur a ni lo. Hruaitute zingah hman lo tak tak, thildanga buai tak te a awm theih a, thil engkimah an lang hman lo ang, chutiang kara midang harsatna hrethiam duh lo leh a mualpho zawnga phut tlat thin YMA hruaitu leh member nih a tha lo. 

d) Inkawp lutuk : Hruaitu bawr thenkhatah thawhpuite leh memberte leng lek lova inkawm ngeih lutuk te, inkawp bik lutuk te hi a that rualin that lohna a awm theih avangin a chin tawk hriat thiam a tul hle.

e) Ngaia neih : YMA hruaitu nih hi ngaia neih a awl hle.Kan mawhphurhna hi thla tin kumtin a thar zela lak thiam a pawimawh. Kan lo tih tawh thin a nih avanga kan phur surh lo a nih pawhin, midang phur taka ti turte tihhnual rawihna tur siam loh hram a tha. Ngaia neih tawh avangin hmalakna turah in thlahdah a awl hle, kan thawh hi mahni tana thawk kan ni lo a, midangte tana thawk leh malsawmna an lo dawnna atana thawk kan ni tih i hre reng ang u.
    A tawp berah chuan, YMA hi tlawmngai pawl, hlawh pawh awm lova tlawmngaihna a hruaitu kan ni a. Heti chung hian hruaitu tha kan nih theihna tur chuan thalaite rilru put hmang hre chung leh ngaihtuah chunga kan khawtlang leh ramin hma a sawn theih nana thalaite hruaitu kan nihna theihnghilh lova, ‘Vawiina thalaite hi kan hruaitu turte an la ni dawn a ni’ tih ngaihtuahna nena kan hruaitu nihna kan hriatreng a, midangte tan malsawmna ni ngei hi angai a ni.

Post a Comment

Powered by Blogger.