Thenzawl khaw chhehvela rannung seh, Scrub Typhus leng chungchangah vawiin khan Health Department chuan thuchhuah an siam a.
Kumin January thla atanga vawiin thlengin Thenzawl CHC huam chhungah Rannung Seh natna vei mi 64 hmuhchhuah tawh an ni a, an zinga mi 54 hi June thla leh vawiin inkar chhunga hmuhchhuah an ni a. May thla khan mi pakhatin a lo thihpui tawh a, hetiang a nih avang hian May ni 23 & 24 khan Scrub Typhus leng chungchang enfiah turin Health Department hian Integrated Surveillance Team pawh a lo tir chhuak tawh a. Anni hian investigation hrang hrangte uluk leh chipchiar takin an nei tawh a. Thenzawl mipuite hnenah pawh awareness campaign thlengin an lo va neih tawh bakah report pawh Central IDSP-ah theh luh a ni.
Scrub Typhus hian Mizoram hmun hrang hrangah bu a khuar nghet tawh hle tih hriat a ni tih an thuchhuahah chuan tarlangin, Mizoramah kum 2012 atanga july thleng hian mi 1710 vei hmuhchhuah ni tawhin heng kum 6 chhung hian vanduaithlak takin mi 41 in an lo thihpui tawh a. Kumin January atanga vawiin July ni 6 thleng hian Mizoram pumpuiah Scub Typhus vei mi 721 an awm tawhin mi 5 in nunna an lo chan tawh bawk.
Scrub Typhus hrik hian sazu-ah bu an khuar a. Scrub Typhus hrik pai sazute atang hian tuhrikin la chhawng ve lehin mihringin an lo kai ta thin a. India ramah hian furah intanin favang leh thlasik-ah te a hluar zual a. India hmarchhakah hian he natna hi a tam zual bik bawk a ni.
Thenzawla scrub typhus leng chungchangah hian a tul anga hma lak mek zel niin district CMO leh a thawhpuite hmalakna thu ngaihchan mek zel a ni. -AIR News Aizawl
Post a Comment