BRU HRUAI KIR A HLAWHCHHAM LEH


Ziaktu : HC.Vanlalruata, Principal Correspondent, PTI

Kum 1997 tawp lama Tripura a pem thla, Bru hote Mizorama an lokir leh theihna atana sorkarin ruahmanna a siamah an lokir duh leh ta lo chu a ni a. Sorkar laipui leh Mizoram sorkarin ruahmanna a siam dan hnuhnung berah chuan August ni 25 leh September ni 25 inkar chhung khan Tripura relief camp 6 a awm Bru hote hi Mizoramah lo letin Mamit, Kolasib leh Lunglei district a an lo awmna thin khua theuhva inbengbel leh tur an ni a. Mahse, a hma lama an tih dan ang bawkin tun tuma sorkar ruahmanna siam chu an zawm leh duh ta chuang lo a ni.

Sorkar laipui, Ministry of Home Affairs hotute chuan tun tum hi Tripura a pem thla Bru hote lokir lehna tura ruahmanna siam hnuhnun ber tur a nih tawh thu an sawi a. Tunhnai khan Ministry of Home Affairs a Special Secretary chuan Bru relief camp 6 hi October thla bula khar a nih tawh dawn thu leh sorkar thuawih lova Bru chhungkua la cham bang lui an awm pawhin sorkarin tanpuina a pek thin pawh tihtawp vek a nih tawh tur thu a sawi a. Hetianga sorkar laipui a official-te’n thu an sawi hi July ni 3 a Union Home Minister hova Delhi a inremna an siam hnu-ah a ni a. He inremna an siam hi relief camp a Bru awmte aiawh pawhin an hming an ziah hnan a ni.

July ni 3-a an inremnaah hian Union Home Minister Rajnath Singh, Mizoram leh Tripura chief minister te, official dangte leh Tripura relief camp a Bru awmte aiawh pawl lian ber leh pawl dangte khaikhawmtu Mizoram Bru Displaced People’s Forum (MBDPF) president Pu A. Sawibunga te an tel a. Inremna hi ziakin chutah chuan tuna relief camp a la awm mek Bru chhungkaw 5,407 a mi 32,800 chuangte hi September ni 30 hma ngei a Mizoram hruai kir tur tih a ni a. Hetah hian sorkar laipui chu a thil phal hle. Bru ho hi an lokir phawt chuan a lokir chhungkaw tin a chhungkaw hotu ber bank account-ah cheng nuai 4 dah sak vek a, nakina la lak chhuah theih tura tih a nih bakah in an sakna senso atan cheng nuai 1 leh sing nga pek an ni dawn a. Kum hnih chhung a thlawna buhfai an dawn dawn bakah kum hnih chhung vek chhungkaw tinin thla tin cheng sang nga an dawng ringawt dawn bawk a ni. A hma lama kir tawhte kha chuan an dawng tlem hle a, chhungkaw tinin cheng sing riat chauh an dawng a nih kha. Chumi avang tak chuan sorkar thuawih taka Mizorama kir tawhte khan lokir turte dawn ang hi an phut ve ta a nih kha.

Tripura lama Reang/Riang ti a koh, Mizorama kohhran hote’n Bru tia an vuahte hi hman atang tawha Tripura a khawsa reng thin an ni a. Bru hel pawlte chet hluar laia Mamit district SP ni thin Pu L.T. Hrangchal lehkhabu ziah atanga a lan dan chuan Bru ho hi hmakhawsang ata tawh Tripura a awm thin an ni a. Kum 1800 vel khan Arakan lalin Tripura lal (Reng) hnehin Bru tam tak hi Arakan lamah sal atan an hruai a. Burma lalin Arakan lal a hneh tak avangin sala tang mek Bru hote chuan Tripura an pan leh ta a. Tripura chhim lamah an inbengbel a, heta lokir tlemte hi Bangladesh-ah leh Mizoramah an lut ni a ring an awm bawk. Mizote chuan Bru ho hi Tuikuk tiin an ko thin a, chu chu ‘inbual’ tihna a ni awm e. Anni erawh chuan inhmuhsitna angah ngaiin Tuikuk ti a sawi chu an duh lem lo.

Bru ho buaina lo intan dan leh Tripura lama an pem thlak dan hi sawi dan inang thei miah lo a ni a, an chhuk thlak huk hun kha a la rei loh ngaihtuahin tam tak chuan kan chik loh avangin kan hre chiang tawh lo a ni ber. Bru lehkhathiam zingah hnama thanharhna a lo awm a. Kum 1994 a din Bru National Union (BNU) chuan Mizoram chhim tawp lama Lai, Mara leh Chakma te anga thuneihna hrang nei a autonomous district council hrang neih an ngiat ta a. An thil ngiat an puan chhuahna hi kum 1997 September ni 23 leh 24 a Saipuilui khua a BNU inkhawmpui-ah a ni a. Hei hian Mizo tam tak a tithinrim a, boruak tha lo awm thei tur ring lawkin Bru chhungkaw engemawzat chuan Mizoram chhuahsanin Tripura an pan a ni.

Mizoram Police chhinchhiah dan chuan hetianga boruak a awm lai hian BNU leh Bru Students Association (BSA) hruaitute chuan an hnam puite chu Tripura lama pem turin an tur a. Chutih lai vek chuan hel pawl –Bru National Liberation Front (BNLF) a ding tawh tih chu mipui mimirin an hre lo. Kum 1997 October ni 21-a Dampa Tiger Reserve chhunga ramngaw leh nungcha humhalh hnathawk, Pu Lalzawmliana chu BNLF ho hian Persang khuaah an kap hlum ta a. Hemi avanga chi leh chi inkara boruak sosang awm thei hlauvin Bru sang telin Tripura an pan ta a. An rauhsan khaw thenkhata in engemawzat chu a kang zui a nih kha.

Tripura-ah hian Mizoram ami chauh lo, Assam atang te pawhin Bru chhungkaw engemawzat an lut thla ve a. Mahse, Tripura a sorkarna chelhtu CPIM chuan khua leh tui a ziaklut a vote neih tir lovin raltlan angin a enkawl ta tlat a. Chutianga relief camp a kum 10 chuang an awm hnu chuan sorkar laipui nawrna lo awm bawk nen Mizoram sorkar chuan kum 2009 November ni 16 atanga Mizorama hruai kir leh turin ruahmanna a siam ta a. Mahse, hruaikir hna tan a nih hma ni 3, November ni 13-ah Bru hel ho bawkin Bungthuam tleirawl Zarzokima an kah hlum leh tak avangin lokir chu sawi loh, la pem thla ve lo engemawzat Tripura an an pem belh leh phah ta zawk a ni.

Hemi hnu hian vawi tam tak Bru hote hruaikir hna hi thawkin ruahmanna siam a ni a, engemawzat lokir mahse, a nawlpui chu relief camp-ah an la awm nghet tlat a. Sorkar laipuiin an relief camp khar a tanpuina tihtawpa an vau pawhin an la awm zui zel a, kum 20 chuang an awm ta. Thil ngiat an nei nual a, a thar an ngiat zel bawk a, zualko theihna zawng zawngah chuan an zualko a ni ber e. Mizote pawh an hekin an hek dan pawh an duhtui teh chiam lo. Engpawhnise, hnam tlem zawk, hun engemaw chen Mizorama lo awm tawh thin an nih avangin dimdawih pawh an hlawh thawkhat a, tlawmngai pawlte pawhin Mizoram mi dik tak chu an lo lawm thu an la sawi reng a ni.

Chutiang a nih lai chuan a tam zawk khu chuan lokir an tum lo niin a lang a. Bangladesh mi, ramdangmi ni lovin India mi ngei an ni a. Tripura a awm tam zawk Bengali-te aia awm hmasa leh a ram leilung fa zawk an ni bawk a. An pi leh pute ram Tripura hi an ngaiin awm hlen tawh zawk an duh tih a lang reng a. Chuvangin sorkar laipui pawh hian Tripura a lungmuang taka an awm ngheh dan tur hi a dap a hun tawh zawk a, awm nghet mawlh teh se.

Post a comment

Powered by Blogger.