Mizo Zirlai Pawl: Vawiin chawhma dar 11:30(Zirtawpni) hian MZP General headquarters buatsaihin Vanapa hall, Aizawlah hnamdang nupui/pasal neilo tura inzirtirna leh Zirlaite tan Career Awareness Campaign neih a ni a. He hun hi Tv Michael Lalramsanga, Treasurer MZP in a kaihhruai a. Hnamdang nupui/pasal neilo turin MZP President Tv L. Ramdinliana Renthlei chuan Aizawl khawpui chhunga School sawmbik zirlai kal khawmte chu a fuih a ni. Pu Lalnunmawia Pautu General Secretary chuan MZP hmalakna leh hnamdang nupui/pasal neilo tura inzirtirna an hman dan leh hman chhan report a pe bawk a ni. Chawhnu lamah zirlaite tan mithiam sawm bik Pu Clement Liankunga, IAS(Rtd.), Pu Lt. Col. Clement Lalhmingthanga, Pu LP Changkima, Chief Manager, SBI leh Pi Laldinpuii Sailo, M.SC Nursing, tutor-te chuan zirlaite tan an zirna leh puitlin huna eizawnna kawng atan tangkai tur zirtirna leh fuihna anneih bakah zirlaite zawhna leh chhanna hun siam a ni bawk.
MZP huaihawta hnamdang nupui/pasal neilo tura inzirtirna hi kum 2015 atang khan Kum tin 2nd September apiang hian hman thin a ni a. Kumin bik 2nd september hi Pathianni anih avangin a remchan angin vawiin 31st August hian hman a ni ta zawk a ni. Aizawl a hman anih rual hian Mizoram hmun hrang hrangah hman a ni bawk.
He huna thusawitu L.Ramdinliana Renthlei MZP President chuan, "Kawppui nupui/pasal atana mahni hnam pui ngei te neih hi ram leh hnam humhalhna kawng pawimawh tak a ni a, Mizote hi hnam tlem leh humhalh ngai kan nih avangin ram leh hnam humhalh kawngah thikthu kan tihchhiat telh telh a ngai a. Hnamdang nupui pasala neite chu Mizo hnam phatsantu leh ram leilung fate chanvo chuhpui thei a hnamdang siamtute an nih avangin, Mizo zirlaite leh thalaite chu mahni hnam pui te ngei nupui pasal atana nei turin ka sawm che u a ni." a ti a ni.
L.Ramdinliana Renthlei chuan, "Mizo Hnam Dan (Mizo Customary Law) Chang 74 ah chuan ti hian a inziak a. 'Mizo mipain hnam dang nupuia a neih chuan Mizo Dan angin engkim a kal thin. Anmahni inkarah intiamna bik neih pawh lo duh sela, roluah thu leh fate thuah Mizo Hnam Dan kalhin ati thei lo. Mizo hmeichhiain hnam dang pasala a neih chuan hnam dang chhungkuaah a lut a ngaih a ni.' A awmzia ah chuan MIZO hmeichhiain hnamdang pasala a neih chuan heng dan te hi a hman theihloh a, a hmantheihloh bakah an fate kha inti MIZO in Mizo hming pu mahse MIZO niloin HNAMDANG an ni tho tho a ni. Kan ram leh hnam him nan mahni hnampui ngei kawppui a nei turin zirlaite ka sawm che u a ni."a ti bawk.
Pu Clement Liankunga, IAS(Rtd) chuan “Zirlaite chu mahni taksa leh thinlung vawn thianghlim mai piahlamah Pathian tihna nen lehkhazir a, retheihna leh beidawnna inhneh tir lo a, kan nih tum hre renga kan beiha kan zir chuan engpawh kanni thei, zirlaite chu kan hnam rohlu in ni a. kan hnam chawisanga vawng nung zel tur chuan hnamdang nupui/pasalah kan nei tur a ni lo.” tiin zirlai kalkhawmte chu a fuih a ni.
Pu Lt. Col. Clement Lalhmingthanga chuan, “ Engang pawhin lehkhazirin bei thin mah ila Pathian tihna tak tak kan neihloh chuan hlawhtlinna tak tak a awm thei lo a. Engkawng pawh zawh dawn ila nu leh pa thuawina leh tunlai thalaite ti buaitu ruihhlo leh mipat hmeichhiatna laka fihlim hi a pawimawhin Pathian duh dan pawh a ni a. Zirlaite chu sorkar hnain min daih vek dawn loh avangin Sipaia thalaite lut tam” turin a fuih bakah sipai luh dan kawngte a sawi a ni.
Pu LP Changkima, Chuan “ Mizoram khawi hmun atang pawhin zirna bul tan mah ila keimahni hi kan pawimawh ber a. Mizo thalaite hian hna rintlakleh tha kan hmu anih chuan khawi hmunah pawh nise kal hreh tur a nilo a, tumruhna leh huaisenna nen taima takin engkawng pawh kan zawh ngam tur a ni. Mizo thalaite hian mut hun leh thawh hunte hi kan hriat angai a ni.” tiin zirlaite a fuih bakah Bank loan leh student loan lak dan kalphung zirlai kalkhawmte a hrilh fiah a ni.
Pi Laldinpuii Sailo, chuan “ Mizo thalaite hian nurse hna hi kan ngaihniam thin hi thalo atiin, Nurse chu mite rawngbawltu leh tunah pawh hian India ram hmun hrang hrangah Sipaiah Mizo hmeichhiate eng emaw zat an awm thute, promotion a chak dante, eizawnna tlak leh tha thianghlim” zirtirna a pek bakah Nurse luh theih dan kawng hrang hrang zirlaite hmaah a sawi a ni.
Sd/-
(LALNUNMAWIA PAUTU)
General Secrtetary
Post a Comment