INFIAMNA CHANCHINTHAR: Asian Games neih mekah India hmeichhe Hockey team chuan Silver medal lain final-ah Japan hmeichhiate an hneh zo ta lo va, Gold medal hlawhchhuak zo lo mahse India forward Lalremsiami chuan Mizo tan mellung pawimawh tak a phun.

Siami hian kumin Asian Games-ah hian goal li a khung a, Kazakhstan an hmachhawn ṭumin hattrick a siam.


LALREMSIAMI ZINKAWNG

lalremsiamThenzawl Hockey Training Centre-ah in zir ṭhinin kum 2016 khan National Hockey Academy, New Delhi a zawm a, hnungtawlh lovin hma a sawn.

Siami hian India Under-18 tan intihsiakna hrang hrangah a khel tawh a, Under-18 team-a a awm lai hian kum 2016 khan Asia Cup an khel a, Asian Youth Olympic Games qualifying round pawh khelin goal sarih (7) a khung a kum 2017 khan India senior team a zawm.



India senior team hi kum 2017 khan Women's Hockey Asia Cup-ah a champion pui a, kumin May thla khan Asian Women's Hockey Champions Trophy-ah pahnihna nihpui bawkin Silver medal an la a goal hnih a khung.

Kumin August ni 13 leh ni 20 inkara neih Women's Hockey World Cup-ah khan India tan khel lehin quarter-final an thleng a, India player zinga naupang ber (kum 18 mi) ani nghe nghe.

Asian Games neih zawk takah pawh Siami hi India player pawimawh a ni chho zel a, India hmeichhe Hockey team hian game ruk khelin goal 40 an khung a goal thum chiah an chhuah.

Final-ah beisei sang viau mahse India hian Japan an hneh zo ta lo va, Silver medal lain Siami hian goal li a khung.

Kolasib nula hian club lamah chuan Sports Authority of India (SAI) tan a khel a, hlawhtling tur hian harsatna tam tak a paltlang.

Hindi leh Sapṭawng thiam lovin Mizoram a chhuahsan a, chhungkaw neinung tak aṭanga lo seilian a nilo bawk nen hrehawm tam tak a hmachhawn.

Harsatna leh hrehawm a tawrh avang hian hnual lovin hlawhtlin a tum ruh tlat a, hlawhtling chho zelin Mizo zinga Asian Games medal la thei hmasa ber a ni ta hial a ni. 

Source: inkhel.com

Post a comment

Powered by Blogger.