CHIEF MINISTER HOVIN CRICKET ASSOCIATION OF MIZORAM HRUAITUTE THUKHAWM
Nimin chawhnu khan Cricket Association of Mizoram (CAM) chuan an Chairman, Chief Minister Pu Lal Thanhawla hovin CM Office Cabinet Meeting Room-ah Board of Control for Cricket in India (BCCI) in CAM chu affiliated member atana a pawm hnu a hmalak zui ngai hrang hrangte sawiin an thukhawm.
Chief Minister chuan cricket chu Mizo te thiam chi tak a nih thu leh, tuna BCCI nena inthlunzawmna nghet zawk a neih takah phei chuan thalai infiammite tan eizawnna tlak a nih piah lamah thiam leh taima tan hausakna kawng a inhawng chho tak zel thu a sawi a. CAM hruaitute pawhin thahnemngai taka thawk hova, player leh hmunhma tha zawk neih chhoh zel theih nan hmalak ho zel tha a tih thu a sawi a ni.
Meeting hian BCCI member CAM a nih hnu a bawhzui tur pawimawh hrang hrang sawiho a ni a. Tun inkhelh season atana tournament BCCI in a ruahmanah Mizoram team pawh tel ve in, chumi atan chuan state pawn player Mizoram team a khel tur lakluh chungchang te sawiho a ni a. Suaka Cricket Stadium chu BCCI tournament match thenkhat pawh thleng tura ruahmanna awm a nih tawh avangin BCCI standard/ duh dan anga cheibawl hna kalpui mek chungchang leh hmalak zel dan tur sawi a ni bawk.
BCCI Fixture siam ah Mizoram chuan Under-19 One Day Tournament Vinoo Mankad Trophy, state team te inelna One Day Vijay Hazare Trophy, Under-19 Multiday Cooch Behar Trophy leh domestic first class championship Ranji Trophy (Multiday) ah te a khel ve dawn a. One Day Vijay Hazare Trophy hi September ni 19 atanga October ni 8, 2018 thleng khelh tur niin, Mizoram chuan Arunachal Pradesh, Meghalaya leh Puducherry te a tum dawn a. Vinoo Mankad Trophy hi October ni 5 atanga ni 24, 2018 chhung a khelh tur niin, Mizoram chuan hetah hian Arunachal Pradesh, Meghalaya, Puducherry, Sikkim, Manipur, Uttarakhand, Nagaland leh Bihar te a tum ang. Cooch Behar Trophy hi November ni 19, 2018 atanga January ni 17, 2019 thleng khelh tur niin, Mizoram chuan Meghalaya, Uttarakhand, Bihar, Manipur, Puducherry, Nagaland leh Sikkim te tum in, match 4 a thleng/ host dawn a ni. Regional leh State Association hrang hrangte intum thinna Ranji Trophy chu November ni 11, 2018 atangin January ni 10, 2019 thleng khelh ni dawn in, Mizoramah match 4 khelh a ni ang a. Mizoram team chuan he championship ah hian match 6 a khel dawn bawk a ni. -DIPR
Post a Comment