
Vawiin khan Mizorama luh tum foreigner 20 chuang manchhuah an ni a. Tlaidar 3 thleng khan Vairengte-ah 10, Saiphai-ah pasarih, Bairabi-ah pali manchhuah an ni.
Nimin atang khan he'ng khaw pathumah hian foreigner 233 manchhuah an ni a, a hmain Vairengte-ah 16, Aizawlah panga dapchhuah an ni tawh bawk. Foreigner 200 chuang dapchhuah a nih hnuah Mizoram sorkarin Vairengte, Bairabi leh Saiphai-ahte hian police a dah belh a, thuneitute'n lo chawl tawh turin MZP hi an ngen bawk a, mahse MZP chuan Mizoram sorkarin theihtawp chhuaha ram ven a tum tih a chiang a nih loh chuan chawlh mai hi tunah rih chuan thil ti chi-ah a ngai lo tih vawiin khan thuchhuah siamin an sawi.
Assam state hian July ni 31-ah khan NRC-a hming chuangte a puangchhuak a, MZP chuan kumin kum tirah khan NRC-a hming lang lo foreigner-te an rawn luh loh nana hmala turin Mizoram sorkar a ngen tawh bakah tun thla ni 4 khan thuthar lakhawmtute kawmin Mizoram sorkar chu August ni 15 thleng ngaihchan a nih tur thu a puang leh bawk. Mizoram sorkar a mutthluk tlat avangin MZP hi a penchhuak ta a ni, an ti.
Assam atanga Mizorama lut tawh hnam dang zingah hian NRC-a hming lang lo foreigner pawh an awm ngei tih finfiah a ni tawh a, MZP chuan hei pawh hi umzui zel a tum tih sawiin, Bairabi Railway Station-a ILP pekchhuahna tur counter pawh a hmingin awm ve mah se a ding mumal lo a, thawktu hmuh tur an awm loh avangin tun dinhmunah chuan he counter hi hman tlak lovah MZP chuan a ngai an ti a. Mizoram luhka pawimawhah pawh duh tawkin ILP tel lova hnam dang an vei tlang thei a nih chuan Mizo thalaite bawk an penchhuah leh a ngai dawn a ni.
MZP chuan Mizoram sorkar a muthlu tlat mai hi pawi a tiin vanduaithlak an ti tih an sawi a, foreigner laka ram leh hnam venhim hi sorkar hna pawimawh a ni tih hre turin Mizoram sorkar a beisei a, Mizo police te'n ram venhim an duh ang tih hi MZP chuan a ring a, thuneitute'n thuneihna an chan chhan an ngaihsak loh avangin che thei lovin police-te an awm ang tih an hlau an tia ni. -Press Statement
Post a Comment