Hei hi Pawi Pasaltha huaisen hmingthang Ralbilha thattu Lal Nikuala pasaltha Chawnglûta thlân a ni. Khawhai hmun hlui Kanghmun rama awm a ni.
Pawi pasaltha huaisen hmingthang Ralbilha leh a hote chuan Lusei Lal leh Pawi hnam thenkhat te chu an run thin a, chutih hun lai chuan Ralbilha hi an țih em em mai a ni. Ral lu 9 a la tawh a, lu 10 lak leh phawt hnuah nupui neih a tum niin an sawi.
Lal Nikuala pasaltha Chawnglûta Thlân - Khawhai, Kanghmun
Lal Nikuala run turin Ralbilha a rawn thawk chhuak leh ta a, Biate Lal Kairûma (Hetih lai hian Biate a la luah lova, Karmualh an la awm) chuan zu lo zukin Ralbilha te ram mu tur chu a lo chelh khawtlai a, tlangah mei detin a rukin Lal Nikuala hnenah lamkal a tir ta a. Lal Nikuala chuan a pasalthate khawmin silai 70 zet a lakhawm a, pawl pathumah inthenin; Thlikva kai, Chehrep kawn leh Khawhai tlangah te Ralbilha te hi an lo chang ta a ni.
Khawhai tlangah hian Pasaltha Chawnglûta leh a hoten an lo chang a, helai hmun hi a khan lo ber tura rin a nih avangin, Chawnglûta pawh a lunglawi lo hle mai niin an sawi. Ni 7 zet an chan hnuah ralkhat atangin Ralbilaha leh a hote chu an lam panin an rawn inzui an hmu ta! Ralbilha hi a malpuiah kah hliam a ni a, a tlanchhia an umzui a, a lu an la ta a ni. A thiante zawng zawng pawh an kaphlum vek a, an lu an la vek a, Chawngtlai Sahlamah an lu hi an tar ta a ni.
Lal Nikuala British sipai ten an man a, Burma Jail-ah a tang. He inbeihna atang hian mi lulak leh inrun a lo tawp phah ta a ni.
Kan report hi 3rd August, 2018 zan dar 7-ah LPS1-ah tihchhuah a ni ang. Lo thlir ve ngei ang che. ~ Vanneihthanga Vanchhawng
Post a Comment