Silhfen hi a awmzia sawi dawn chuan khawi atangin nge kan sawi tan ang a, engtiang taka chipchiar in nge kan sawi ang tih hi ka ngaihtuah thiam chiah lo. Eden huana Mihringten nunna thei an ei avanga an mit alo var tak avanga saruak an nih zia an inhria leh an saruakna khuh bo tura Theipui hnah an fen te, chuta tanga Pathianin Silhfen a siamsak dan te chip chiar taka sawi nghek pawh angai chuang lovang.
Saruak kan nih avanga kan taksa khuhmawina leh kan taksa ti na thei thil laka in ven him nan a kan inbel thin hi silhfen chu a ni. Mizo tawngah chuan saruak tih tawngkam ringawt hi chuan kawh hrang hrang a nei thei a, Bawhchhiatna sual avanga Pathian laka Saruak kan nih zia te, Engmah silhfen in bel loh avanga Saruak nih te, kawng tam takin saruak tih tawngkam hian awmzia a nei thei a ni. Tun tuma kan thupui erawh hi chu Pawn lam kan lan dan min ti mawitu leh, kan taksa ti na thei laka in ven nana kan hak thin silhfen chung chang kan sawi dawn a ni.
Hmanlai kan pi leh pu te hunah khan Mizote hian silh leh fen tur design dang leh rawng dang pawh an nei meuh lo. An neih chhun chu a dum leh a var a ni mai a, a design pawh a dang lem lo, tichuan kum a her a, Mizo te pawh culture lamah nasa takin hma kan sawn a, 1600AD chho ah phei chuan Lal pawh 13 lai kan nei tawh a, incheina pawhin hma a sawn a, kan hmeichhia te pawhin Hmaram, Tualtah kawr leh Saiha bengbeh te pawh an lo nei chhova, Tichuan 1900AD a lo her chhuah meuh chuan Sailo Lal leh Lal dang hnuaiah in awpna mumal tak kan nei der tawh a, Kawlphai leh Silchar lam atangin rawng leh tlereuh dang dang te pawh kan lo lalut tan ta bawk a, kan incheina leh kan silhfen te pawh hma a sawnin Fungki leh Silai nen kan ri rup tawh mai a, kan nula te pawhin silhfen dum leh var chauh inbel tawh lovin, Puanlaisen (Zehmawi awmlo) te an bih tawh a, Saiha bengbeh chauh nilo Thival leh ngun bun te pawh an lo ching chho ta a ni.
Tichuan Indopui I-na leh II-na a lo chhuak a, Keini Mizo te pawh nasa takin min nghawng ve phak a, kan Mizo pa te ngei, foreign ram hla tak takah te kalin Germany, China etc. ah te khawvel ram hrang hrang incheina an hmu zau tawh hle a, chu chuan kan Culture lamah pawh nghawng nasa tak a rawn nei chho ta a ni. Kum 1966 ah Mizoram buai a rawn chhuak a, Sipaiin min awp a, Cenema leh minawptu Thlangkawrvai ho te Silhfen te avangin kan incheina leh kan silhleh fen te chuan khawthlang incheidan kan la nasa ta hle a ni.
Hun a inher a, khawvel a vir angbawkin hmasawnna in min nuai a, kan mit chak zawng leh kan thil hmuh thin te, kan nuam tih zawng leh kan ei duh zawng te pawh chu hmasawnna thlipui chuan min nuai danglam sak ta vek mai. Kum 2000AD a rawn her chhuah meuh chuan kan khawlai nun leh kan hawiher, kan silhleh fente chu khawvel hnam changkang ho incheina nen a danglamna a awm ta bik lo. Eng hian nge kan Culture leh kan Mizo zia tamtak hi min nuaibo sak tiin inzawt ta ila, a chhanna chu Media hmasawnna hi a nih ngei a rinawm. Television a rawn chhuak a, Bollywood Star ho incheina rang takin kan copy nghal a, chumi hnuah Internet leh thil changkang tak tak a rawn chhuak leh a, tunah meuh chuan Nimin lawka Japan-a an kawr design thar an zawrh chhuah kha a tuk lawkah kan Mizo nula te ngei pawn kan lo ha ve thei ta. Hmasawnna kal kan leh a thlawhkhum ram kan ni lo hi kan va han vannei teh lul em.
Heng hmasawnna te hian kan Culture tam tak min nuai bo sak leh min tih riral sak erawh hi chu tu thiamloh mah a ni lo, a chhung a cheng a fa hrin keini te ngei hi kan ni miau si. Tunah chuan kan thang harh tan ta niin a hriat. Zirna kawngah pawh hma kan sawnin Designing lamah kan thang chak em em a, Kan hnam zia leh kan hnam incheina chawinun tum a theihtawp chhuah mek Designer thiam tak tak engemaw zat kan nei te hi a va lawmawm em. Silh leh fen chung changah heng kan hnam incheina kan Traditional Dress chawinun tuma bei tu te hian fimkhur taka an hna an thawh loh chuan kan hnam tan hian thil pawi tak thlentu pawh an ni thei tih hi in hre lul teh se.
Kan hnam incheina anihna tak anga lanchhuah tir hi kan zavaia mawhphurhna a ni. Mizo te hi hman atangin kan hnam incheina leh kan silh leh fenah mipa inbel chi leh hmeichhe inbel chi nei hrang hnam kan ni a, kan Traditional Dress chawikan kan duh anih chuan hei hi kan ngaihpawimawh ber tur a ni. Tunlai a kan Designer thiam tak tak ten mawi tak tak a kan hnam incheina an design chhuak ah hian Mipa hak tur ni si, hmeichhe thuam a an han zep ang chi hi kan hnam incheina dimdawih miah lova nghaisakna a nihial awm e.
Hnam dang in a an neih ve loh, kan hnam incheina zinga mawi ber ber heng Thangchhuah kawr te, Puan chei leh Vakiria etc. te hi keini Zofa te hian a hmanna tur diktaka kan hman loh chuan tu nge hmang chuang ang. Thangchhuah kawr hi hmeichhe hak tur a ni lova, Puan zeh hi mipa bih tur a ni hek lo, Thangchhuah diar tial hi dara bah tur a ni lova, khim tur a ni. Tin, Vakiria pawh Mipa khim tur a ni hek lo. Heng te hi hre reng chungin lan dan danglam leh design danglam hret kan duhna ah hian kan hmang dik lo tam hle. Hmun dang atanga lo kal kan hnam incheina hre lo te hian copy ve ngawt sela kan phal ang em. Kan hnam incheina hi anihna ang taka hmang chhuak tur leh ti danglam lo tur hian tan lak thar nise a va duhawm em.
He kan hnam incheina hi Mizote tan a Pathian min pek a ni a, chu a thil thlawnpek kan dawn chu keini hian kan duh dan dan a kan lo tih danglam hi a chi dawn em ni. Reality Show pakhat a ka hmuh kan mizo nula ngei maiin Thlangkawrvai nula ho hak thin Sari pawl ha chunga kan hnam incheina hnamdang reng rengin an neih ve loh Vakiria a rawn khim chhuak ka hmuh hian he ngaihtuahna hi min neih tir a, Vai Sari kawr leh kan hnam incheina puan zeh mawi tak te hi thui zawm chi a ni dawn em ni. Reality Show leh Fashion Show lian thamah phei chuan hetiang hi hmuh tur awm tawh lo sela Mizo nih pawh anuam zawkin ka ring.
~Ziaktu : Lalhluzuala
Times of Mizoram adds exclusive pictures of Mizo sunday dress.
Post a Comment