Mizo Ex-Servicemen te chuan Ex-Servicemen lo awm zel tur te tan leh an tu leh fate tan, sipai takin, an chungah engpawh lo thleng se, a tul anga hma la turin an pen chhuak dawn tih an sawi.
Vawiin khan Mizoram Ex-Services League (MESL) chuan Aizawl Press Club-ah thuthar thehdarhtute kawmin, Ex-Servicemen te chu an that lai zawng-a mahni in leh lo kalsana ram tana in pe an nih thu an sawi a, Mizoramah lo haw leh in, an tana hamthatna awm ve thei te bakah an neih chhun tlem pawh chhuhsak an ni dawn tih an sawi a.
Home Minister in kumin Assembly Session a Home Guard-a Director General Post chu MPS ten Secretary level post an neih ve theih tura tan siam a ni dawn tih a puan tak chungchangah Mizo Armed Forces Officer te chuan Mizoram Home Guard Department te tak te, Police Battalion pakhat ai pawha te chu kaihruai thei turin an tling tawk tih sawiin, Commandant General awm tho si a, a chunga thu tur sorkarin MPS tan bik 'Director General' permanent cadre Post a siam ta chu hriatthiam a har thu an sawi.
Central Sorkarin kum 1979-a thuchhuah a siamah Sorkar hna Group 'C' ah 100-a 10 leh Group 'D' ah 100-a 20 Ex-Servivemen tan reservation siamsak tura a lo tih tawh chu Mizoram-ah hman a la ni ve loh avangin harsatna an tawk mek zel niin an sawi bawk a. Central Sorkarin State Sorkarte hnenah Ex-Servicemen te tan Property Tax awl thei tura a tih pawh Mizoram Sorkar chuan tun thlengin a la awl lo tih an sawi bawk a.
Heng bakah hian Mizo World War II veteran leh 2nd Assam Regiment Disband mi tlemte la dam te, kum upat tawh avanga tei chhuak thei tawh lo te lawmman Cheng 6000 a tih pun turin kum 2017-a RSB Meeting-ah Mizoram Governor leh Chief Minister te'n tawngkaa ti pung tura an sawi chu tun thlengin tih pun a la nih loh thu an sawi bawk a.
Tun dinhmunah Ex-Servicemen te chan a chhiat tak em avang leh dawhthei taka Sorkar laka an thil phut te an ngaihchan mek chuan awmzia a neih tak loh avangin a tul anga hma la turin an pen chhuak dawn tih an sawi a ni. Mizoram Ex-Services League Headquarters hnuaiah hian mi Sing 3, Sang 9 leh 700 member inziaklut an awm a ni. (AIR News Aizawl Correspondent)
Post a Comment