DJ Lalvenhimi channa Mizo Musical Feature Film 'Ni Thar Duhawm'
Lam, zai leh hmuhnawm chitin reng awmna, ṭhalaite lawm hlawh tur chi - Mizo Musical Feature Film 'Ni Thar Duhawm' tih chu 'Ber' thlaah tlangzarh a ni dawn. He film-ah hian zaithiam DJ Lalvenhimi chu a chang a, a zai ngaithlak tur a awm nual dawn bawk.
DJ-i hian he project hi kum thum kalta aṭang khan a lo buaipui tawh a, peihfel a ni dawn ta. June thla aṭang khan Aizawl khawpui chhung leh pawn hmun hrang hrangah shooting neih a ni a, August chhung hian zawh hman beisei a ni.
Tlangzarh hun tur hi la chiang lo mah se, a hla tawh dawn lo a, 'Ber' thla hi chuan DJ-i audio album nen a ruala tlangzarh tura ruahman a ni.
DJ-i hian music video siam lovin, hla leh video inkawp awmna musical film hi a buatsaih a ni. 'Ni Thar Duhawm'-ah hian DJ-i hi a changtunu a ni nghal dawn a, hla pariat vel a awm dawn bawk a ni. Ani bakah hian ṭhalai hmel thar engemaw zat hmuh tur a awm dawn a ni.
Mizo Musical Feature Film 'Ni Thar Duhawm'
Film lama hnuhma nei ṭha tak - Adama leh Hruaia Sailo ten part pawimawh tak an la dawn a, film tihmuhnawmtu tur zinga mi an ni. Lam thiam tak tak hmuh tur an awm dawn bawk a, Alan Rinawma leh a pawlte 'Mizo Dance Camp' hmuh tur an awm dawn a ni.
Mizo ten kan la neih zen zen loh he musical feature film hi uluk taka buatsaih niin, enman hla tur tak a ni. Video hi 'Dinagrafix' kutchhuak a ni dawn a, hei ngawt pawh hi en tichakawm zualtu a ni.
'Ni Thar Duhawm' audio album leh musical film ni bawk hi IFB, Zothan Autoworks leh LBS Suzuki ten an sponsor a ni.
Post a Comment