Nimin khan Mizo Zirlai Pawl MZP chuan Mizoram hmun hrang hrang-ah Inner Line Permit ILP nei lo, Assam National Register of Citizen (NRC) a chuang lo, dan lova Mizo hming hawh a sumdawng thahnem tak an hmuhchhuahte chu thuneitute kutah an hlan nghal.


MZP in ILP leh Assam NRC a chuang lo leh permit neilova sumdawngte dapchhuah hnatlang a neih ah hian Aizawl bikah mi 150 man chhuah an ni a, mi 23 thuneitute hnenah an hlan nghal a ni. MZP chuan Sorkar leh thuneitute pawhin theihtawp chhuaha hma an lak mek lai a, nikhat hnatlanna-a mi thahnem tak manchhuah tur an awm chu pawi an ti hle tih an sawi a, heng hnamdang dan lova khawsa te hi permit neilo bakah anmahni leh anmahni lo in sponsor te leh hnamdang vekin an lo sponsor te an ni hlawm tih an sawi a ni.




Mizo Zirlai Pawl MZP - Latest News
MZP chuan India danpuiin a bik taka Mizo-te a humhalhna dan ILP chu a nihna ang taka hmang tur leh a pekchhuah dan chungchangah pawh fimkhur leh zuala kalpui turin thuneitute a ngen nawn leh a. Thenawm state Assam sorkar in an state chhunga foreigner te thawn haw an nih theih nan NRC a tih chhuah ah hming chuang lo nuai 40 chuang an awm a, heng foreigner te hian Assam chhuahsan in an state thenawm ah an tlan chhe khawm mek niin MZP chuan a sawi a. Megalaya, Tripura, Arunachal Pradesh, Manipur leh Mizoram ah te an tlan chhe hlawm ni a hriat a nih thu leh Mizoram ah pawh thahnem tak an lo lut ve ngei a an hriat thu an sawi a ni. 





MZP chuan sorkar thuneitute chu ILP pawh NRC a chuang lo chu tun hnuah pe chhuak tawh lo turin a ngen nawn leh a. Mizoram chhunga Local Council/Village Council thuneitu zawng zawng te hnamdang ILP issue chungchangah document felfai lo chu hriatpuina lehkha lo pechhuak lo turin a ngen bawk a ni.

MZP chuan hnamdang dan lova khawsa a hmuhchhuah te chinchang chu ngun takin a enzui dawn tih pawh an sawi a, thawn kir an nih dan pawh Vairengte thleng a umzui dawn a. Mizoram chhung a dan lova hnamdang sumdawng te dapchhuakin a tul angin hma a la zel dawn a ti.

(PR)

Post a comment

Powered by Blogger.