Vanramchhuangi PIL thehluh a ngaihtuahnaah HC-in sorkar-in beneficiary thlan danah langtlang tak leh Danpuiin intluktlanna chanvo a siam angin hma a la tur a ni a ti.
Gauhati High Court, Aizawl Bench chuan vawiin (August 3) khan thu pek (interim order) chhuahin Mizoram sorkar-in New Land Use Policy (NLUP) hnuaia hamthatna a sem tur chu kalphung fel tak duang hmasa lovin sem a khap lailawk a, he khapna thupek hi Vanramchhuangi (Ruatfela Nu) Public Interest Litigation (PIL) thehluh a ngaihtuahnaah a siam.
Varamchhuangi hian NLUP dawng tur beneficiary-te thlan kawngah hmalakna langtlang a awm lova, mamawh tak tak te leh dawng tlak ngei ngei mi sang fe in an dawn loh phah niin court hmaah hian a thlen a. Tin, MLA ni lai paruk lai beneficiary-te thlang tur panel-a telh si lovin MLA ni lo mi pali lai a telh chu a sawisel bawk.
Vanramchhuangi leh a ukil C Lalramzauva te chuan an thu thlen piah lamah hian Comptroller and Auditor General of India (CAG) in kum 2011-12 leh 2015-16 inkara NLUP hamthatna sem leh sum dahhran danah dik lo leh felhlel tam tak a hmuchhuahna te court hmaah an pharh bawk.
An thu thlen hnu hian Justice Suman Shyam leh Justice AM Bujor Barua te thutna Division Bench chuan sorkar ukil Samuel Vanlalhriata chu sorkarin beneficiary thlan dan kalphung (guidelines) a neih leh neih lohte a zawt a, ani chuan chhan dan tur (instructions) a lak hmasak theih nan hun pek a dil a.
Sorkar ukil dil ang leh PIL-in a hekna thu pawimawh tak tak te ngaihtuahin, High Court chuan Mizoram sorkarin langtlang tak leh Danpuiin intluktlanna chanvo mitin a tiam angin beneficiary te hi thlang se la, a thlan tum dan chu court a hriattir leh hma chuan engmah sem hrih suh se tiin thutlukna a siam a, sorkar chuan sum a hman dan felfai takin a chhinchhiah (accounts) bawk tur a ni tiin chawlhkar li hnu ah PIL hi ngaihtuah chhunzawm leh atan a dah.
PIL a thehluh chungchangah TFD zawhna chhangin Vanramchhuangi'n MLA-te chu mipui tana rorel tur an nih laiin an thuneihna hmang sualin an party (Congress) tan liau liau an thawk a, chu chu Mizoramah a vawi khat thlenna ni-a a hriat thu a sawi.
“Anmahni dan siam an kalh a ni. NLUP-NEDP dawng tur anmahniin an thlang mauh mai a nih hi, MLA ni ve lo – H Liansailova, S Hiato, Tlangthanmawii, Dr Lalmalsawma Nghaka – te hnena cheng nuai 400 theuh pek an ni hi dan pawngsualna tawp tak a nih avangin pawi ka ti a.
"Mipuiin an thlan ve tho eptu MLA-te erawh chu cheng khat pawh pek an ni ve lo hi hleih nei taka rorelna lantirna a nih avangin hetianga mahni tan chauha thuneihna hman sual hi dan ang taka roreltute’n khap ngei se, Mizoramah dikna in ro a rel theih nan he mipui sum, anmahni Congress MLA-te hamthat nan chauha an ruahman hi tihpuitlin a nih loh nan Court-ah mipui aiawhin PIL hi ka theuhlut ta a ni,” a ti a.
MLA-te chu thlan tlin an nihin Bible nemin dik taka rorel turin an intiam a, an intiamna pawh an zah zo lo chu pawi a tih thu a sawi. ~ Ramtea Chhangte
Post a Comment