Mizoram Pradesh Congress Committee (MPCC) General Secretary ni lai mek, Lalrinliana Sailo, Tuichang bialtu MLA ni bawk chuan whatsapp group hrang hrangah a bial mipuite thlahna thu thawnchhuakin, Tuichang Constituency a chhuahsan tur thu a sawi chiang ta a. Thlahna thu a thawnchhuah thenkhatah chuan a bial a chhuahsan dawn tak avanga a lung a len thu te, a bial mipuite a ngaih tur zia thute, Khawruhlian-a VCP hoa an inkawm khawm laia a bial chhunga tawngtaimi thenkhatten an rawn phone tuma a insum zo lo a tah thute a sawi a ni.
Lalrinliana Sailo hian MPCC-in an hnawtchhuak lo a nih pawhin inthlan puan fel hnuah MPCC atanga banna a thehlut dawn niin Hillsgate thudawnna chuan a sawi a. Rina Sailo hi Congress Legislature Party meeting-ah pawh a tel tawh lo a, congress MLA ho awmna whatsapp group atang pawhin remove a lo ni tawh a ni. Tin, a bial chhung, Khawhai a MLA Fund leh NEDP atanga Congress party-in Indoor stadium an sak zawh tawh pawh a ban hma ngeia hawn a tum laiin MPCC thuneitu sang lamin an remti lo a, a hawng lui dawn a nih pawhin Congress party hruaitute chu an inhnamhnawih dawn lo niin Congress block hruaitute chuan an sawi a ni.
Zodinpuia, MNF Secretary, Lalrinliana Sailo, MLA leh Lalruatkima, MLA
Lalrinliana Sailo hi MNF ticket-in Chalfilh Constituency-ah a ding dawn tih a chiang tawh niin Hillsgate chuan thu a dawng a. He thu nemnghehna atana ngaih theih tur hian amah ngeiin Chalfilh bial Khawruhlian leh a chhehvel a tlawh thu pawh a bialte bulah a sawichhuak ta bawk.
Tawnluia tan Tuichang a vawnghim?
Chanchinbumi engemawzatin September 21, 2018-a an kawmnaah Lalrinliana Sailo chuan Tuichang bialah MNF ticket a ding tur MNF Sr. Vice President Tawnluia chu vote 3000-4000 vela chak tawha a hriat thu a sawi a. Hei hian Tuichang bial chhunga Congress Party dinhmun a hril chiang viaua a lan rualin, Rina Sailo hian he bial a chhuahsan dawn avang leh MNF-a a luh dawn avanga he a kalsan tur bial hi MNF ticket a ding tur Tawnluia tan bial hima dah a tumna thil a ni thei bawk. Tin, he a thiltih hian MNF Senior Vice President Tawnluia duhsakna a dawn zui zel theih nan kawng thui tak a sial ngei dawn niin a lang bawk a ni.
Image result for Lalrinliana Sailo
Tuichang-ah Congress-in Candidate tur an vai em?
Hemi hnu lawk September 26, 2018-ah MPCC General Secretary, Health Minister ni bawk Lal Thanzara chuan Republic Veng, Aizawla Congress Local Council thar lawmnaah thu sawiin, Saitual leh Khawzawl biala din chak an tam thu leh ding dawn lo a in ngai a lungawi lo pawh an awm thu a sawi a. Amaherawhchu, beisei ang ngawt a ni dawn lo niin a lang.
Tuichang Constituency-a Congress ticket-a ding tur chungchang buaipui hian he constituency chhunga Congress block hruaitu engemawzat chu he thu buatsaih lai hian Aizawlah an cham mek a, MPCC President, CM ni bawk Lal Thanhawla hovin meeting pawh an nei tawh. Amaherawhchu, candidate tur chungchangah la lungrual thei loin, candidate tura rawtchhuahte zinga block lehlamin an rawt, la naupang tak pakhat chu block lehlam hruaitute mi hriatchian a nih ve loh avangin mutan an la nei deuh niin Hillsgate chuan thu a dawng a ni. Hemi chungchanga Hillsgate-in Congress block hruaitu a biakte chuan an hotuten an dah apiang lungawi taka an pawm tur thu an sawi hlawm a ni.
MLA Election hnuhnung bera Chalfilh bial dinhmun
MLA Election 2013-ah khan Chalfilh bialah hian vote 17,239 a awm a, vote 14,112 tlain vote tla zat percentage hi 81.86% a ni. Candidate hrang hrangte vote hmuh dan chu hetiang hi a ni:
Dr. Ngurdingliana, INC – 7174 votes
LT Kima Fanai , MPC(+MNF) – 3446 votes
J.Lalchhanhima, ZNP – 3368 votes
NOTA – 123
Inthlan hnuhnung berah hian thlan tlin tak Dr.Ngurdingliana hian MNF leh MPC tangdun candidate L.T.Kima Fanai chu vote 3728 zetin a hneh a. Amaherawchu, Congress sorkarah nihna pawimawh chelh lovin, MLA fang a dah a ni. Tun tum election-ah hian MNF hi an maldin dawn bawk si avangin thingtlang politics man tak ni a sawi thin Lalrinliana Sailo hian thla 2 chhung velin a Politics lehkhachaih hi a chaih sang hman ang em tih hriatthiam a har hle a. Bial ngaihnawm tak tur niin a lang. ~ Ramtea Chhangte
Post a Comment