Hman hmawh taka an kal lai chuan patling thinrim in hrosa thawm leh Sakei rum ngal ngal ni awm tak hi an hre ta thut a, an ding ngawi țhap chutah thawm lo chhuahna chu an hma lawk kawi a ni tih hriain hmanhmawh takin an tlanthla a, kawi an chhuahchiah chuan Darchawngi pa leh keimi chu an lo inbei mek hi a lo ni a, Darchawngi pa chuan a chem chu a han vilik khum a lo kalteh bungthumah ka han chhuah teh ang che. Sakei pawh nila keilo pawh nila ka hlau chhete eihlo che” a han ti chheu chheu a. Keimi chu a rum ngal ngal a, a tinhriamtaka Darchawngi pa pawhsawm vek tum chuan a rawn zuan ta mai a, a ni pawh chuan a darah tak chuan a lo sat ve a, chutia a sahtak avang chuan a tum ang chuan a che theilo, a kut hnunglam chuan Darchawngi pa chu a han beng let tawp mai a, a leng dawrah lungah chuan a va in sawh rawp rawp a.
Chutah tak chuan silai hi a rawn ri nghal țhawt a, silai mu chuan keimi pawh chu a deng vir ve sawk a, chutah in siamremin Chawngkunga te lam chu a rawn panphei ve ta, silai mu han sawhna hun a tawm tawhlo an chem chu phawi in keimi lamah chuan an tlan phei ve ta, an han in bawhchilh nghal rawp a, Siakenga chuan a han sat pawp a, mahse keimi chuan a lo bum hman tlat, an beng hlawm tawp a, khawthira chuan a pumah chuan a sat hlawih a, Khawthira kun laitak chu a hnungah an ben chilh bur mai a, a awp rawk a, a hma a Tawia lo awm beih tuma a kut a tih san lai tak chuan a ban chu Chawngkhuma chuan a rawn fik sakta hmawk a, na tiin a te ruai ruai a, thawk leh khatah sangtakah a zuang chho ta dawrh a, thingah chuan a, han fu ta vung a, a leh lam zawng ah chuan a rap awm duh kher mai. a rawn melh run a, thingdangah chuan per kai leh in a pilbo ta daih a.
Chawngkhuma chuan Keimi ban a sahchhum chu, la in a iptepuiah chuan a khung a, an țhiante chu a han enkual a, tumah hliamna an lo awm lova, Darchawngi pa Pu Thankeua chu an han bawihsawm a, a ni pawh chu hliamna em em a lo tawk lova, a tlukna lama lung a, a insawh vang khan a lo thidang ringawt hi a lo nia, Pu Thankeua lo harh chuan “Hmeichhia kha a țha em?” a rawn tichhuak hmasa ber a. Pu Thankeua an buaipui a talangin tumah rengin hmeichhia kha an lo hrechang tawh lova, an han zawng vat vat a, hnimpik karah chuan a lo lethlawm reng a, remlai deuh a an han pawmchhuah chuan a darah hian a lo sehsak chu niin mahse chu erawh a thuk lutuk lo bawk a, thihpui tham tur chu a ni lova, a zawnna tur hlang an siam zung zung a, khawlamah chuan an hawngchho ta.
Kawngah chuan Pu Thankeua chuan “Chakai khawrh a, ka kun kat kat laiin ka chhaklam hi a rawn ri leh sun sun țhin a, ka dinga ka han hawichhuah pawh in engmah ka hmu lova, chutiang chuan thawm hi ka hre leh țhin a, engmah ka hmuh loh avangin ngaihthat lohna em em pawh ka nei hranlo, chutia ka chhoh hret hret lai chuan hnimpik kar ațanga hmeichhe ban lo lang hi ka mei eng ațang chuan ka hmu ta thut a, eng nge maw ni le ti a, ka panphei dawn laitak chuan keimi kha a rawn zuangchhuak ta phut a, ka hma taka rawn din pah in mi rawn hahum khum ta nghek a, a rawl lah kha a ring em em mai leh nghal, han tlanchhiat ngaihna awm tawh hek lo le ka chempui la chhuakin kei pawh chu ka han in hrosa veta a, ka lo sah țhelh a leiah ka hriat leh chu min rawn kaih harh kha a ni ta mai a” tiin an khaw tlangvalte chu a hrilh a.
Kawng chanve aia thui mah an let hnu chuan an țhiante dang an mah ni rawn umtute nen an in tawk ta nawlh a, an ni ho chuan an mizawn chu chhawkin khaw lam chu an pan ho ta a.
Khua an thlen chuan an hmeichhe zawn chu bawlpu inah an luhpui a, Tawia leh Chawngkhuma erawh chuan Lalinah an lutchho ve nghal a, inchhung an han lut chu a pa leh upate ho chu an lo la țhukhawm țhap a, Chawngkhuma-te lolut an hmuh chuan “eng nge in chanchin ni ta le, a țha lam a ni ang chu maw” an lo tithuai a.
Chawngkhuma chuan an kalna chanchinte leh keimi nen a, an inbeih dante chu tawikim takin a pa leh upa ho chu a hrilh a, a pa chuan “Keimi i ti ringawt a, keimi a nih leh nih loh i chiang a mi?” a lo ti khauh a. Chawngkhuma chuan “Hei bak baka keimi a awm theichuang dawn em ni ang, in awih loh leh hei a ban ka sahbun pawh ka lo hawn a lawm en ta che u” tih leh a iptepuiah chu chhuat laiah thehthlak a rual a.
Banbung chu an han phawrh chuan, mipa ban pangai hi a lo ni reng a, Chawngkhuma’n a sahbun laia, tin hriam tak zum venvun ang kha a lo nei tawh reng reng lova, mipa kut bung pangai hi a lo ni reng a. mak titak chuan an en he haw a. Ropuithanga chuan “Ava mak ve, min rawn beitu hi mihring pangai a ni reng tihna emaw le aw” a ti vang vang a, Lal upa Theihthawnga chuan “Kan thawnthuah kha chuan keimite kha chu mihringah pawh an in tichang thei a nih kha maw le” a lo ti ve bawk a. Lalpa chuan “an nih phawt chuan thahtheih an ni tihna a ni mai a, leh lamah hah pawh a tidam huai a lawm le, kan khawtlang hian thah theih loh huai hi kan buaipui chiam ang tih ka hlau hman rum rum a” a ti a. Midangte pawh chuan lal thusawi chu an lo țawm ve nak nak a.
Lalpa chuan, “Khawnge a hah pawh inhah a nge, zan a ni vang vangin i tlaivar law law mai teh ang u, khua pawh avar dawn hnai tawh ang, ka rap chungsang a, hahzu ka bilh kha i lo zu ang u, in țhian hruaite pawh Tawia zuk ko teh ka inah hian zu ka lo zuk teh ang che u” a ti a. Rangtakin Tawia chu a chhuak ta nghal a, Chawngkhuma chu a pa chuan a zu bel chawithla tur chun a ti a, a ni pawh chuan phur takin a chawithla a, a nghat fel chauh tih chuan Tawia leh midang pathum bakah Darchawngi pa pu Thankeua te ho chu an rawn lut khawm țak țak a, Lal chuan “E khai lo kal teh u, a hah pawh inhah ang tiin hah zu ka lo zuk ang che u, ka ti a, lo thu ve rawh u” tiin a lo lawm vat a.
Zu an han in a, tlema an țawngte a lo kal takah chuan Pu Thankeua chuan Keimi nen an intawn dan chanchin chu a han sawi leh ta a, pa țawngkam thiam tih takah kawng an kal lai aia uar deuh hlekin a han sawi leh zet chu, Tawia te ho chuan ngaihnawm tiin an ngawi thap mai a, Lalpa pawh chuan “nang nge nge awm lo la chuan kan tlangvalte ho pawh in rawn hmu lek lo tur, khawnge ka han pek belh leh ang che” tiin a no dawmah chuan a han chhunbelh sak leh a. A ngai tawh lo ve a tawk tawh a tih lawm lawm pawh chuan “A kha a la ho em mai in leh rawh in leh rawh” an ti a, a duh aia tam mah chu a in ta nghe nghe a. Chutia an hlimlai tak chu chukin Tawia chuan “Mak ka tih deuh chu silai a, kan kah kha haw awm reng reng in ka hre lo mai ka ti, kei phei kha chuan a lu takah khan ka fuh chiang hle in ka in hre sia” a rawn ti chhuak ta phawng a. Chutia a han tih takah chuan a țhian dangte pawh chuan mak an tih thu chu an lo sawi ve tliar tliar a, upa ho chuan asahuatah in kap fuh lo mai mai a, niang an tihsak takah chuan a nih pawh ani mai thei e, an ti tlang ta mai mai a.
Keimi ban an sahthlak sak hnuah kha chuan hringzawl khua pawh a pangai in a ralmuang leh tawh hle a, thla thumlai a liam leh tawh a ni.
Tunah chuan pawltlak thla lo thleng leh tawh in mi tin mai chu an buh ram lama an chheksa thiar hawng chuan an buai a, pawl delh ruah han tlasek chuan khua a ti hnawngin khua a ti vawt ang reng hle a, tlangval zan lengte chu puan lum tak tak sin hian an in pel zut zut țhin a.
Zing takah tho in rama an buh chheksa chu an phur hawng nguah nguah țhin a, pachak deuh hi chuan zing tukțhuan ei hma hian vawi hnihte an thlen hman a, mi țhenkhat tlem a buh neitlem deuhte chuan an thiar zothuai a, an tlangvalte erawh chuan thiarzo tawh mahse chawl a awm hah dam mai lovin an lawm la zo ve lo chu an phurhpui tel tel țhin he tihlai hi zofate nunah chuan a nuam in tu ate pawh in hmangaih tlang taka an nunza dial dial hun lai a ni a, khawtlang an lungrual in an hlimthei hle thin a ni.
Buhte an han thiar zawh fel hnu chuan lalthu nghakin khawtlang mipui chu an chawlthuap a, hetia thlawhhma thar an lakna tura an chawl mai hi kum dang a, an tih dan chu a ni lo mahse an ram neihna tur hi tute pawh hian an țih ru deuh vek hlawm a, tunkum chu lal hian thlawhhma an lakna tur hmun a tan an lo tih tawhsa hi sawn leh se tih rilru pu in an chawl țhup a ni ber.
Chutia khawtlang mipui in lalthu an ngaihchan tak țhup si ah chuan lalin ah chuan lal leh upa te ho chu an in hmukhawm zur zut ta mai a, an thu lah chu a rual hlei thei mawlh lo, a țhenin hmundang a thlawhhma lak mai an duh a a chhan pawh keimi an hmuhna hmun ber anih vang a ni a, khu tilai khu a him lo, in a hrisel lo tih chu an țanchhan a ni a. a țhenin a țullo kum liamta maiah kan duhin kan en vek tawh a, ram neih dan tur pawh kan in sem fel vek tawh hnu, a nih avangin thlawhhma thar kan lak lehna tur hmun dang zawn buai a ngailo, titawk lah an awm ve bawk nen an thu chu a rual thei mawh lova.
An lalpa ber pawh chuan rilru siamthiam har a ti in thutlukna neih har a ti hle a, a han ngaihtuah in a khawtlang mipui ten an țih leh an hlauh hmun a, thlawhhma han lak ngawt pawh chu dik theiin a hre lova, leh lam zawnga a thlir in, an pi leh pute hun ațang tawh a, mihrang sahrang lakah pawh zam ngailo ni leh thla hnuai a leng ti a lo in chhal ngat ngam hnam an nih ve țhin avangin khu tilai keimi hlauh vang mai mai a, hauhuk mual thlawhhma atana han neih loh ngawt chu tlawmthlak a ti hle bawk nen, a rilru chu a buai hle a.
A tawpah chuan a khaw mipui tam zawkte ngaihdan chu hriat ve phawt țha in a hre ta a, a tlangau pa hnenah chuan “Hei Thangtin kan tunlai boruak hi ka thlirin rilru siamte pawh har ka ti a, ka khaw mipuite hian eng rilru chiah nge an put tih ka hriat duh avangin, zaninah mipa ram țangtual tawhphawt chu zawlbukah kal khawm vek tur thu, pawimawh tak ngaihtuah ho tur a awm e, tiin va au mai teh khai” tiin. Tlangau pa chu a tirchhuak ta ringawt a.
Tlangau a han au meuh chuan engthuah nge lalin a kohkhawm tih hrilh ngai lovin rin dan an lo neisa nghal vek hlawm a. Nu țhenkhatte chuan an pasal leh an fapa te bulah chuan Hauhuk mual chu lalin neih a rawt pawn nei duhlo lamah țangtlat ang che u, tiin an chah mawlh mawlh a.
Zanriah eikham chuan chhungkhat a, mipa awmho tawhphawt chuan zawlbuk lam chu an pankhawmta tak tak hlawm a, an lal lo kal hun chu an lo nghak ta țhap a, nakinah chuan lal leh upate ho chu an lo thleng veta a, zawlbuk a lo luh chuan lal țhutna tur chu an lo kian sap sap hlawm a, țhut hmunte a han in rel fel lai chuan Chawngkhuma leh Tawia pawh an lo lut ve mek bawk a.
Lalpa chu a rawn ding chhuak a, aw a han thian kharh kharh a, chutah tihian thu a han sawi tan ta a, “Aw le. Hei ka khua leh tui a mipa ho chu inkim thawkhat turah chuan ka han ngai a, zanin a ka han kohkhawmna chhan che u chu hauhuk mual khu thlawhhma thar han lak leh nan a kan lo rel tawhsa hi kan sut leh in tlangdang kan zawng mai dawn nge, kan rel tawhsa hi kan titlang dawn tih hi ngaihtuah tur leh thutlukna tawp siam turin ka kokhawm che u a ni. A hmasa in midangten in ngaihdan in sawi ve hma in, ka ngaihdan leh duhdan ka han sawi hmasa phawt duh a” tiin a han sawi a. a ngawih deuh vang vang hnu chuan tihian a han sawi zawm leh a, “Hei le, ka khua leh tui mi țhenkhat te chuan khu tilai hauhuk mual khu neih loh mai duh tawkte pawh in awm tih ka hria a, an duh loh chhan an țanhmun chu sawi nawn leh ngai kher lo pawh in kan hre vek tlang awm e, dikna lai chen pawh a awm, mahse kei ka ngaihdanah chuan heng min rawn tibuaitu, keimite țuanna a ni, tih vang mai mai a, neih loh rel hi fuhberin ka hre thei lova, tih tak emah chuan keimi kan hriat hma daih tawh pawh in ral leh sa vangin kan thlawhhma neih, kan țhulhin kan suan ngai, ka hrelo tuna taka hetiang vang mai mai a, thlawhhma kan lakna tur, sawn tur a, ka ngaihtuah hian awih har ka ti a, ka khua leh tuite hi engvang a lo dawih zo ta nge an nih, tianga ka khua leh tuite rilru a lo dawih zawh maite chuan ral in min rawn runin sa huai pawh lo che sela, ka pasalțha leh ka mipa te hi kan tan chuan an thlamuanthlak in an va rinawm dawn lo em ka ti ani. Eng pawh ni sela, ka khua leh tuite in ni a, he tilaiah hian a duh a piangin, in ngaihdan leh duhdante in sawi a thiang tih hria ula tumah tim lovin rawn sawi rawh u, ka sawi takte kha chu ka rilru mai a nia, chuvangin tumah in min hlau lovin lo sawi ve rawh u le” a han ti a.
Chutianga an lalber in a han tih takah chuan a mal mal in an rawn dingchhuak a, an ngaihdante leh an duhdante chu an rawn sawi ve ta tliar tliar a, amah erawh an thu chu a la rual hleithei chuanglo, duh leh duhlo chu an inzat deuh reng hi a la ni ta fan a, thu mum an neihtheih tak lovah chuan banphar a inchhiar mai an rawt ve ta thung a.
Chutia ban an phar hmachiah chuan Chawngkhuma chu a rawn dingchhuak ve ta a, Lal leh upa te hnenah chuan “thutlem ka han sawi ve lawk a nge chu in phal em?” a han ti a, Upa te ho in “E sawi rawh sawi rawh i duh a piang i sawi thei a lawm” an han tih chuan. Chawngkhuma chuan a ngaihdan leh duhdan chu tihian a han sawi ve ta a, “ ka pa khua lehtui duhtakte u, in hmaah thu tlem ka han sawi ve duh a, kei ka ngaihdan chuan hetianga thlawhhma kan lakna tur kan sawn ringawt chuan khawdang a mi ten min nuihsawh dawn lutuk a sin, Ropuithanga khua te chuan keimi an hlau va, an thlawhhma lakna tur an suanphah hial an han tih hunah chuan kan meng ngam dawn em ni ang, chu tih hunah chuan kan chhehvela lal-te hian min rawn zuam zek zek tawh anga, an nawm an mak in min rawn beiin kan ram țhalai hi min rawn chuhpui reng tawh mai dawn a ni. chutiang zawng zawng thleng tur ka dawn in kei chuan ka phal thal thei lova tlawmpa tikah ka la a ni, chu vangin a țul a nih phawt chuan kei hian khulai ramah khuan a daido ber khu ka nei ang, a thlang berah ka awm anga, ka dawta rawn awm ve ngam keihi pasal țha ka ni a, ral leh sa hmaah ka tlan lovang ti ngam in awm phawt chuan ka bulah hian lo ding ve rawh u,chungte ho nen chuan khulai ram chu kan nei hovang” a rawn ti ta a. Chutia an tih vel leh chuan a țhianpa Tawia chu a bulah chuan a rawn dingchhuak hmasa ber a, pasal tha dangte pawh chu an rawn ding chhuak ve ta tliar tliar hlawm bawk a. Chutiang a nih takah chuan a tute pawh mai chu an rawn ding chhuak zo ta vek a, hauhuk mual neih chu an titlu tlang ta a ni.
Bung 6
Chutiang a thu an tihtluk takah chuan thlawh hma lakna tur chu an han sem țha leh ta a, an lal fapa Chawngkhuma chuan daido in a țhianpa Tawia chuan a dawt a, a dawt lehah chuan pasal țha dangte chuan an in semtlang leh a, chutiang zelin lal upate leh khawtlang mipuite chuan an in sem kual ta tliar tliar a, hetiang hian kum dangah chuan an ti ngailo va, lal upa te leh mi neinung chhungten an ram duh lai an han pawm phawt a, chutiang zelin an in sem tlang țhin a ni a, mahse tun țum zet zawng an thlawhhma lakna tur an țihkhai tlang deuh bawk nen darlui hnaihlam a piang chu pasal țha ten an changta phawt a ni.
An hunlai hi chuan Lal te hian thlawhhma neiin huan an siam ngai meuh lova, a nei chhunte pawh hian a tlangpui chuan an bawihte an thawh tir deuh ber ťhin, an lalna khaw mipuite hnenah chhiahte chawi tirin an duh chuan an laksak mai țhin a, mahse an lal fapa Chawngkhuma erawh chu chutiang mi ni ve lovin mahni thawh chhuah ngei ei a ring duh mi a nia, lal fapa te tih ngai loh ang in a ni chuan thlawh hma te neiin a mah hian a thawk lauh lauh țhin a, lal fapa dangte chu ni sela chuan awlthawng takin an awm tur a ni a, chutiang a awm chu a duh zawng a ni ve bau lo, aia upa zah mi leh aia ute thu ngaichang thiam mi a ni a, val upa leh pasal țhate thu chu a zah thiam em em a, lal fapa dangte chu ni sela chuan an hnuaia awm an mi leh sate thu chu engah mah an ngai kher lovang le.
Hetiang taka lal fapa Chawngkhuma a awm chhan chu a pu a mah awm tleitu kha a ni kan ti lo thei lovang, Chawngkhuma a nun a pailai ațang tawh hian a pu hian tupa ka neih hunah chuan ka tlangval lai leh ka rorel hnua ka tih theihloh tam takte hi ka tupa ka zirtir anga, a ni chu pasal țha leh mi nunngil mite zah leh chawimawi ni turin ka en kawl ang, a lo tisa reng tawh a, a lo pianchhuah ațang reng in a ni chu a pu tupa ni hliah hliah a mawi hi a ni reng a, a pu chuan a duatin engtiklai pawh hian a pu hi a ni ngawt mai a, khawi ilo a kalna a piangah hian a hruai reng țhin, țawng a rawn zir a, kal a han zirchho țante hi a pu chuan ka tupa a kal theita tiin a upa te ho nen chawhlui an kilho reng hi a ni hawt mai a, thil a zir theih tirh ațang rengin a pu chuan a theih ang ang a zirtir țhin a, hetianga tih a duh avang hian rorelna pawh a fapa kutah a hlan chhawngta thuai reng.
Chawngkhuma chu thil zir thiam mi tak a lo ni bawk, thil han tihtir leh zirtir chu a lo nuam em em a, sa hnuchhui dante in sual leh silai kah dan zawng zawng a pu chuan a han zirtir thiam te te a, chu mihnuah rilru lampang a han zirtir leh a pasal țha ni tur a, rilru huaisen a ngaihzia te, lalna tlangchang tur anih avangin a nundan leh a thil tih chuan nakinah nghawng thuitak a la neih tur thute chu ngun leh uluk takin a zirtir țhin a ni.
Chung a pu in uluk taka a zirtir țhin nundante chu Chawngkhuma chuan a vawng reng a, engtik laipawn a hre reng țhin. Chutiang anih avang chuan chawngkhuma nun chu a ngilin mite pawhin an ngaisang a an zah em em țhin a, Chawngkhuma a țawng ve tawh chuan tute pawh in, a thu an zawm tlang țhin.
Hauhuk mual chu thlawhhma a tan an han vat \an ta a, bawkte te khawh in an in bawk khawm tal tal a, Hauhuk mual chu a ram a chang tha bawk a, khiang lian tak tak hi an kit tlu ruah ruah reng mai a, hetiang thawm an han nei viau chung pawh hian an hlauh thawn erawh engmah a la rawn thlengta chuang lova, zuva an tam bawk a, nitin mai hian vahrit ram ar thehlei sa eng ilo hi an hmeh deuh reng mai a.
Chawngkhuma ri lawk chu Tawia te thlawhhma a ni a, in auh phak reng a ni bawk a, an chhunchawlte hi an han kukri rawih țhin a, nuam an ti țhin hle a. Tawia pawh hi tlangval duai lo tak a ni in ramvachal tak a ni bawk a, sa a kap thei hle a, Chawngkhuma ai hian kum khat in a nau hret a, hetichung hian an inkawmngeihin ram vah leh ram chhuah ilo ah te khawtlang thiltih nikhuaah te hian an in kawpchawt hi a ni ber.
Tuk khat chu an hna țan hmasi hian, Tawia te lo mawnglam kawrte ah hian sazuk kihreu tha țak mai hi a rawn vakchho den den a, chu tak chu Tawia chuan a lo hmufuh hlauh mai a, a silai chu la in chu sazuk chu zuk kah a tum ta a, a chhukthla chu thinglian tak mai loding chu in phen nana hmangin sazuk chu a lo chang a, sazuk pawh chu a lo chhozel a, a hawiherah chuan a ngam hle tih pawh a hriatin, hmanhmawhlo leh muangchang tak hian a rawn kal chhozel a, a awmna ațang chuan Tawia chuan lo thlir rengin a awmna zawt a lo thlen chuan a han kap ta a, mahse a tumah tak a țhelh tlat mai, sazuk hliam chu an thlanglam Darlui lamah chuan a limthla ta puat puat mai a, Tawia chuan ui tak chungin a thlir vawng vawng a, hnalaknat lai chu nilo seng chuan ka chhuizui ngei ang mawle ti nuah nuah chung chuan a hawn chhohsan ta a.
An riah hmun a han thlen chuan a țhianpa Chawngkhuma chuan “thiana i rawn hlah e law” a lo ti a, Tawia chuan “Nia maw le, ka han thelh hlauh a lawm maw le, hliam erawh chu ka hliam a, mahse ka chhuizui ta lo mai, hna kan la ngah sia” a rawn ti nuah nuah a.
Chawngkhuma chuan “Khai a, i van ti uih awm em! sate ringawt ei chu a hne awm ve tawh a lawm le, sapui sa ei te a chak awm nen titeh, i zukchhui teh ang, i hliam nat phei chuan a kal thuilo mai thei a sin” a han ti a. A țhianpa berin chutianga a tih takah chuan a pa chu a han rawn der ve a, a pa pawh chuan “e kal rawh u, kal rawh u, tiangte chu kan ti mai dawn a lawm, hnate chu damchhung thawh tur a awm a, sa erawh hmuhfuh leh kahfuh lohte chuan ei mai mai tur a awm hleinem maw le, zuk chhui mawlh teh u” a lo tih ve takah chuan phur leh thatho takin huan mawnglamah chuan an chhukthla dun ta a.
Tawia sazuk hliamna an zuk thlen chuan sahnu vel chu an han enchiang a, sazuk thisen chu a lo, baw neih nuai mai a, “e khai a, țhiana hei i beidawng hma lutuk a nih maw le, thuichhuizui a ngaih dawn loh hi, tirawh kal thui thuai ila, khulai lawkah khuan a awm mai ka ring, kan let hma leh lo lam hna kan thawk leh hma a ni mai a lawm” a ti sawk sawk a. Tawia pawh chuan “a kan hna kan țul ve bawk si a, khatia a tluk tak mai lovah chuan, ka rawn letsan leh mai pek a lawm le” a lo ti ve chuar chuar a.
An pahnih chuan an han chhui dun tan a, sa thi chu a tlak nasat em avang chuan harlo takin a chhuizui mai theih a, mahse Chawngkhuma chuan rik deuh phut phut a duh loh avang chuan muangchangin an inzui dun zel a, Chawngkhuma chuan hma a hruai a, a hnu chu Tawia chuan a rawn dawl ve thung a.
Chawngkhuma chuan sa hnu chu fimkhur taka en in a kal bauh bauh a, chutih laitak chuan a hma pik kar ațang chuan keipui hi a rawn chhuak hlawl mai a, a biang velah chuan thi hi a kai nuaih bawk a, a rawn hnaih in a rin loh lutuk a, chutiang sapui rawn chhuak thut chu a ham haih ve hle a, chutih lai tak chuan Tawia chuan a chaldarah tak hian a rawn verh ta siah a, sakei pawh chu a awp rawk a, a thi nghal der a.
Chawngkhuma chuan khai a, țhianpa tlem a tlemah ka che sual țhelh a lawm maw le, ka lo bihtui lutuk a, ka nun i chhan him a nih hi le, awm lo la chuan mual ka liam dawn anih hi” a rawn tichhuak phawng a. “Khaih khaih i uar mah mah a nih kha, i hnunglamah ka lo veng reng che a lawm le” a țhianpa chuan a lo ti ve bawk a.
Tawia chuan pik kar chu a han en a, keipui saseh chu sazuk a lo ni hauh lo mai, sihal no hruai hi a lo ni a, a han kuai let a, a hnute bu tan danah chuan “Hei chu a note an hlat pawh ka ringlo e a” a ti nuah nuah a. Chawngkhuma chuan an awmna bul vel chu an kal kual a, rin loh takin sihal note pahnih ngawt mai hi a hmu ta nghe nghe a, an pian ațang chuan thlali lai an ni tawh ang tih a rin theih mai a.
Tawia bulah chuan a rawn pawm phei a, “hei țhiana han enteh an țhareuh tak tak ani, ka han vulh teh ang” a rawn ti phei lang lang a. Tawia chuan “Kei pawh in ka duh ve tho a lawm maw le, a pa zawk keiin hauh” a rawnti nghalvar a. “Ngawiteh hei em em zawng ni tawh love, vawinah kha hming țhatna țha tak i nei tawh bawk a, hei chu keiin ka duh zawk ka chang ve tawh ang” a ti ve tlat a. Chutianga an tih chuan Tawia chu a lo nui hawk hawk a.
An hlawhtling thawkhat in an in hre bawk a, sazuk hnu chu chhuizui tawh lo ila, kan hnung a mi dangten an duh ve dah ange an ti a, tichuan, Tawia chuan Sakei hla do chu a han chhamta vang vang a, a chham zawh chuan a silai chu a han kap ri ta dur a, a thawm hrephak chinte chuan “e chu sa an kap a nih chu le, tiru i kal ang u” tiin an rawn tlan khawm a, a lo thleng hmasa berte chu an khaw nula hmeltha Darchawngi leh a nau hi an ni a, Tawia tan chuan a duhthu sam lo thlengdik hi a ni ringawt a.
Darchawngi Tawia leh Chawngkhuma te ho hi chu a kum tluana inlawm țhin an ni a, Tawia hian a duh em em a, mahse a thianpa Chawngkhuma hi lal fapa a lo ni in a ni ai chuan a duh zawk arin deuh vang hian engmah hi a tilang ngam ngailo a, mahse Chawngkhuma a erawh chutiang mi a ni lo, a țhianpa rilru hi sawilo mahse a hriat thiamsak em em a, chuvang chuan chuhpui en hian a en lo hrim hrim zawk ani.
Midangte pawh an lo thleng ve nghal thuai a, an khaw pasal țha, Sawithanga chuan “e khai keipui e law inkah a, ei mi a ni em ang chu maw” a rawn ti teh hluai a, chutia an tih teh hluaiah chuan Tawia chuan “E ei mi teh reng a, keimi a ni lo ve, a pian leh ziaah pawh a hriat a lawm” a lo ti ve var a. Sawithanga chuan “Ka han thawifiam mai mai che anih kha lungloah la suh aw” nuichung hian a rawn ti a. Tawia vek chuan “Sakei chauh a ni hleinem hei sihal pawh” a han ti a, sakeiin sihal a lo seh hlum chu a han hmuh tir hlawm a, a note chu an thau dun bawk a, nopang hote chuan an lawm hle a.
Chutianga hlim taka an rik laih laih lai chuan Chawngkhuma chuan Sawithanga chu a han bekbawrh ru a, an sazuk hliam dan leh an chhuizui nalam a keipui chu kap ta an nih thute chu a han hrilh a, tunah chuan an hlawhtling thawkhat a an in hriat thu leh a duh chuan sazuk chu chhuizui ve tur chuan a han rawn a, Sawithanga chuan “in phal takzet chuan keiman ka hanchhui zui a nge” a ti ve a, a liam ta thuai a.
A sa chu an han chan ta a, Upain a pumpui an su a, sa pumpui sutu zawng chuan a kawchhung chu an insem a, a sahrang chu midang ang bawkin an chang ve bawk a. A kaptu ber Tawia chuan a thin leh a, lung, a ir no a chang thung a, chu chu sa serh an ti a. Sa kaptu a piangin an neih țhin a ni. An chan zawh chuan sa hrang chu an han sem a, a chhungte te in an han awm khawm a, an hmaah chuan fei an chhun bur theuh a, fei bulah chuan hnah an phah a, sa semtute chuan sahrang chu an han dah nghauh nghauh a, sakei lu chu an kap ang huai a, an khaw nula hmeltha Darchawngi chu an phurh tir ta a. An kal hmasaktir a, Tawia an a chhawm a, midangin an zui tliar tliar a, a thui pawh an la kal hma chuan hlado chham ri hi an hre ta thuai mai a, an han ngai thla vang vang a, e sazuk hla do anih chu Upa ho chuan an ti a. Chawngkhuma chuan “Pu Sawithanga kha a hlawhtling ngei anih chu le” a rawn ti a.
Chutia a tih takah chuan tiru i zuk kal ang u, tiin tlangval țhenkhat chu an tlan thla leh ta nghal a, an liam dawn chuan rei vaklo chu kan lo nghak ang che u, tiin an zuk au a. tlangval ho chu thuipawh an kal hmanlo, pu Sawithanga chuan sazuk chu a rawn pu chho hnawp hnawp a, tlangvalin kan lo chhawk angche tiin an han lakchhawk a, tilaiah khian midangte pawh an la awm a tiin an hrilh a, hmanhmawh tak chuan an rawn chhotlang leh ta mai a. Chutianga nih takah chuan tiru i chan leh nghal ang u, an ti a, sazuk sa chu an han chan leh a, an hlimtlang dar dar hle a ni.
Pu Sawithanga’n zahder takin “Tawia hnenah “Hei ka zuk kal kha kawithum vel bak ka kal hman lo a lo tlu reng tawh a, kah pawh a ngailo a nih hi, in kah ani a, a lu hi chu i chan ngei tur a ni” a han ti a. Mahse, Tawia chuan “E ni lo ve, kha zawng i chanah ni rawhse, kei chuan hei a aia ropui zawk hawn tur ka nei tawh a lawm, a rengthu ah keini chuan um zui kan tum tawh loh ani a, nang kal lo la chuan sa in a ei loh pawn a riral dawn ani a, i chan tur reng a lawm” a lo ti ve thung a. chutianga Tawia’n a tih tak tlatah chuan lawmtakin pu Sawithanga chuan salu chu a chang ta a.
An riah hmun lamah chuan an chho tlang ta hlawm a, an kal dawn chuan chhawlin an sa channa leh sathi te chu an chhilh a, heihi an tih ve dan reng a ni a.
Riah hmun an han thlen chuan Tawia pa’n “Hei zet chu rinloh a leiah sa hrang lu zuk ni reng a, ti teh u khua ah i hawng tlangteh ang u, zanin chu salu kan aih ngei a ngai dawn a nih hi” a han ti a, midangte pawh chuan hawn phahna tham a ni a, lawmle tiru i hawngteh ang u an ti a, khawlamah chuan an hawng ta a.
Kawngtluan chuan tlangval ho chuan hlado te an chhamin an ri le lu a, ral khat hla fe khua a mite pawn an thawm an hrephak ang tih ah chuan hlado chu an han chham leh a, nopang tualchai te chuan “e chu sa a kap an awm a niang tiru i hmuak ang u” tiin an rawn tlankhawm dar dar a, zawnfung tur an han siamsak a, nopang ho chuan sa lu chu an zawn ta a, kawtchhuah an thlen chuan salu chu an han nghat a, Tawia chu hlado han chham turin an han ti a, hlado chu a han chham ta vang vang a, chu tah silai chu a han kap ri ta dur a, midangte pawh chuan an silai chu an lo kap ve tluar tluar a, tlang chu an han tlir ta a. Naupang ho chuan Tawia te in thleng an zawn a.
Chawngkhuma pawh an in lamah a hawng tlang nghal a, a duh zawk, sihal note chu a pawm hawng bawk a, a nun a lo hmuh chuan “mama e kha sihal note a law, a va duh awm ve maw le, tun nge sa kap a” alo ti thuai a, ‘Tawia’n sakei a kap a lawm maw le” a han tih chuan “e chu zanin chu sa in aih dawn a nih chu le, hei i sihal note lo hawn hi kan hrai hneh dawn em ni” a han tih chuan “e lung ngai suh kan ei ang ang kan pe anga, hei a len tawh hi, hnute pek kher pawh a ngaih ka ring tawh love a” tiin a nu chu a chhang a, zan riah an ei kham chuan Tawia te in lamah chuan a chhuk ve ta a.
Bung 7
Zanah chuan sa lu chu an tuiphuh a, zu an zu a. Sa hrang lu chu nula leh tlangvalin an men ta a, zankhuain sa lam hla an sa dur dur mai a. A lam apiang chuan, “Sa lu ka lam e” an ti a. Sa lu keng chuan an lam a, an kaih tur apiang chu a sa lu chuan an nawr a. “A seh tak e” an ti a. Chutia an nawr apiang chu an lam zel a, sa lu a nawr chuan midang an kai leh zel a. Hlim takin zan hun chu an hmangtlang ta a ni.
An hma lawkah lungngaih manganna in a la rawn hmuak dawn tih reng chu tumah in an hre pha lo.
Chu mi zan chuan nula Darkimi nuam samlo chu a hawnghma hle a, a han mu chu a mumangah mumang rapthlak deuh mai hi a nei a, an khuaah chuan thisen hi alo luang zeihzuih a. palianpui hang renrun hi an lal in tualah chuan a lo thuhnur mai a, an țhan harh chuan a thlantui hian a lo bual huh vek a, an ngaihtuah chian chuan mak hi a ti em em a, chu a mumang chuan a rilru a kap reng a, a tuka a țhiannu nen an ram kalna ah chuan a țhiannu chu a hrilh a, a thiannu lah chuan “chutiang mai mai mangchhia a nih chu” a tih sak a. Mahse a ngaihchu a țha thei chuanglo, kan khua hian eng emaw chhiatna kan tawk dawn a ni ngei ngei ang tiin a ngaihtuah reuh reuh reng a.
Zan khat chu, khua a hnim in chhum chhah pui pui hi a rawn lang zut zut a, chhum karah chuan thla hi a lang leh zoh zoh țhin a, zan rei lam ni tawh in, khaw mite pawh an mu reh tawh a. Chu tihlai chuan vengthlanglam a awm pi Ngaihi chu a note hnute ngen han țap that that chuan a tiharh a. An pate leh a chhungte hi, lovah hna țul lai a nih avangin ram an riak vek a, a ni nauno pawm a ni bawk a, a chhungte chuan nang chu inlamah lo awm mai rawh tiin an nau tleirawl pakhat nen in an nghah tir a ni a.
Chutia nau hnute a han pek zawh chuan khawnge kei pawh zun zungin ka han chhuak lawk teh ang ti a, pawn a hanchhuak chu leikapui a pel chauh tihin an leikapui hnuai ațanga lo melh rengtu mitmu eng rum mai a han hmuh chuan a țe țhawt a, mahse chu thil chuan a rawn zuanthluk tak tawpah chuan țe zui tur a awm ta lo, a thaw ri bawrh bawrh a, a chat thla chu a ni zui ta mai a.
A țe thawmah chuan a nau tleirawlte chu a lo harh zawk a, inbengkang a thawh a tumlai chiah chuan an kawngkharpuiah chuan keimi an tih khawtlangin an sawi luai luai chu a rawn lut ta phut mai, a hlauh lutuk chu a pawnpui chuan a in lukhup thuai a, pawnpui kar ațang chuan a han bihthla dek dek a, keimi chu muangchangin an in chhungah chuan a hnar a len ruai a, a hmui ațang chuan thi duk pui hi a luang thla zuih a, a tin chu a ti kak thu a, a mitmeng ațang chuan sehleh tur hi a duh ngawih ngawih tih hi a chiang reng, chu tih lai chuan an țhenawm velah chuan țe rawng rawng thawm leh patling au țhawt țhawt thawmte chu a rawn rita chel chul a, silaite chu a puak ri dawt dawt a, hmeichhe mang ang au thawm lo ri ve bawk nen, tleirawl Zikpuii hlau lutuk chu a khur zawih zawih a, a duh engmah a hmuh loh vang nge keimi chu pawnlamah chuan a chhuak ta thuai a.
Chutiang thawmah chuan an lal Ropuithanga chu a rawn harh zawk a, ralin an rawn bei ta ah ngaiin hman hmawh takin a silai chu a han chuhvat a, mahse sakei hahum thawm a hriat chuan rin dan leh ngaihdan chu a nei thuai a, a phaw bangkil a tun chuh in pawn lamah chuan rang takin a tlanchhuak ve ta thuai a, kawt a han thlen chuan an khaw mite lo tlanchhe nuaih nuaih leh an kar a mihring leh sakei in pawlh ni awm tak takte pawh chu a hmuh hmaih lo, a silai chuan pakhat lo hnaiber chu a han kap thawr a, mahse engtizia a, inhnaihchilh taka kap niin fuhchiang hle mahse engah teh vak a ngai hauh lo mai, a silai mu chu thun leh na hman awm tawh hek lo a chem chu a phawichhuak a, a kut leh lam a phaw hum chung chuan keimi chu a lo hma chhawn ta ringawt mai a, a rawn bawhchilh rawp a, a phaw chuan a lo inveng hman hram a, a chempui chuan a han vai let thuak a, a sat fuh lo tlat, an han in veh dun leh țham țham a, rum chhur chhur chungchuan keimi chuan a rawn bawh phei leh ta, a kut tin hriam tak chuan a rawn bengbur a, a phaw chuan a lo in veng hman hramna chungin a ben nat em avang chuan a pei chawn chawn a, chu chu rem changah la in keimi chuan a rawn su chilh leh ta bur a, hnung zawngin a tlu chiang ngei mai, a tlu lai chu rawn bawhzui a tumlai tak chuan a hnunglam a tangin an khaw pasalțha Thangvawra chuan a fei chuan a rawn chhuntlang ta zawk a, keimi pawh chu a hma leicharah chuan a tlu bawk khup thlawrh a. Ropuithanga tlu chu a rawn kai tho thuai a.
Ropuithanga rawn tho chhuak chuan “A va han thin ur thlak em, kan khaw mipui tam zawk leh kan tlangvalte ramriah hlan a, ti mai mai a, ka khua an han suasam teh hrep chu ni” a rawn ti chhuak bawrh bawrh a.
A ni tak a, Hringzawl khaw mipa tam zawk hi lovah hna țul hunlai tak anih avangin ram lamah an riak bo deuh vek a, nunau tete leh mipa tlem a zawng an awm a ni deuh mai a, mipa awm ho lah tlema upa deuh tawhte an ni in, chutiang ni lova awm te chu damlohna vang a, in lama awm an ni deuh chawt a, awm kim ve ta vek sela chuan tihian an rawn bei theikher a nge maw.
Thangvawra chuan “lalpa a khawm deuhin i awm teh ang u” tiin a lo rawt thuai a, a ni pawh chuan rem a tihpui thuai a, midangte pawh chu an han au khawm zung zung a, nunau chu a laiah an dah a, an dinhual țhap a, chutianga an insiamrem lai chuan, in tlu țhen khat chu mei siin man kaiin a rawn alh engta puat puat a, mei eng nasa tak a lo awm takah chuan keimi te pawh chu an tawlh hnunga an pil bo zo ta thuai a.
An pil bo zawh tak hnu chuan nunau ho chu zawlbukah an luh khawm tir vek a, țhenkhat tin silai nen chuan pawnlamah an veng thung a, in kang chuan indang a mankai hma chuan an thelh mit zung zung bawk a, meichherte siamin mi engzat chiah nge thi leh hliam tiin an han zawngkhawm a, hliamna tak tak an tam rualin mitthi pawh an tamna ngiang mai, mi sawmhnih chuang dawn chu an lo thi reng mai a.
An lal ho chuan engtin nge kan tih ang, tiin ro an han rel khawm a, a hmasa berin zualko intirh a, ramlama an unaute koh hawn thuai chu țha an titlanga, mahse tunge kal ber ang tih chu an buaina a ni ta a ni, zan thim hnuaiah chuan tumah chuan kal an chaklo tlang a ni ber a, kawnglakah keimi ho kha an tawk leh ang tih mawlh chu an hlau a ni ber, chu tiang an in rawn khawm laih laih lai chuan an khaw pasal țha Thangvawra chu ngawi rengin a lo zuk kal nal nal tih reng an hrelo. Engpawh ni sela khawvar nghak ila vartianah i kal mai ang u, an tih tlan tak avang chuan khawvar chu an nghak tlangta ngawt ngawt a.
Thangvawra chu hman hmawh leh fimkhur takin thla enghnuaiah chuan meichher pawh keng ngamlo chuan a kal a, mahse kawngțum fel tak a nih avang chuan meichher pawh keng kherlo chuan kawng chu bahlah miah lo chuan a kal par par thei a. A hah lutuk chu a hanchawl deuh dat a, thawm danglam a awm em ti a, ngaichang chuan a beng a hanchhi vang vang a, mahse engmah chutiang awm a, a hriat loh avang chuan hman hmawh takin a kal leh ta sawk sawk a.
A hmanhmawhin a kalchak bawk a, reiloteah chuan ram riak awmna hnaiber chu a thlengta thuai a, an lo muhil thap țawh chu a zuk țhawngtho thuai a, an ni ho chuan engthil nge ni ta ti a, an lo zawh chuan thil awm dan leh thlendan zawng zawng chu a han hrilh zung zung a, chutiang thu an hriat ve leh chuan meichher siam in silai chu an han kap ri thuai thuai a, an rala awm mi dangte pawh chu an au khawm nghal thuai a, an thawm hre phak tawh phawt chuan midang an hrilh chhawng zel a, zanrei tawh lam a lo ni ve bawk nen thawm a ring a, reiloteah chuan an meichher nen chuan an rawn thleng khawm nghal thuai a, thil awmdan chanchinte an han hriat chuan an thinrim in, in lama an chhungte an ngaihtuah bawk si chu kal nghal mai an tum hlawm a, mahse an zinga upa awm ve te chuan “ngawiru kawnglakah ti ringawt chuan keimi te pawh chuan minlo lam bun lovang tih kan sawi theilo, inringtak leh a khawm deuh a, kan hawn loh chuan a tih chi lovang” an tih tak tlat ah chuan hawn rum rum duh mahse la, tha leh dik zawk dawn a, an hriat vangin meichher tha takte an han siam leh a, tichuan inringtak leh an zinga hmeichhiate chhawm chung chuan hmanhmawh takin khawlamah chuan an hawng tlang ta a.
Zing khawvar dawn hnaih kawl a lo eng țan det det tih chuan an khua chu an thleng a, an khua chu a lo reh țhiap a, in tlu remrum leh thisen luang zeihzuih mai an han hmuh chuan an zinga awm ve nula Darkimi chu a rawn tap chhuak rawih a, “awi ka nu ka duh theilo, ka mumang ang chiah a ni, ka nu ka pa in lo tha maw” tiin a țap ta hawm hawm a.
Mi țhen khat chuan silai an han kap ri țhuai țhuai a, an thawm chu hria in zawlbuk ațang chuan an rawn tlanchhuak a, an chhungte lo hawng an han hmuh chuan lawm avangin an țap zawih zawih a, chu tihlai chuan veng mawng lama Ngaihi pasal chuan an in kawta a nupui lu chhum lek lek lo thi reng tawh a han hmuh chuan a bulah a țhingthi hnawk a, a nupui ruang chu a pawm vawng vawng a, “Mate nu hei ka lo hawng asin, tinge minlo lawm loh” tiin a țapchhuak rawih a, an thawm chu hria in an inchhung ațang chuan an nau tleirawlte chu a rawn tlanchhuak a, a nu leh pa a unaute a, han hmuh chuan a tlan a, a chhungte chu a kuah vawng vawng a.
Chu mi ni nileng chuan an khawtlang chuan ruang seng hawi buai in an buai a, lal leh upa te ho chuan engtianga tih tur nge tih chu relin lal inah chuan an țhukhawm a, han tih vak ngaihna erawh an hrelo tlang hle in, an bangbo hlawm hle mai a, an mahni rawn tibuai a, rawn beitu lah chu mihring a ni bawk silo nen chuan an mangang takzet a, silai a kah pawh an haw lo anih chuan chemleh fei ringawt an hma chhuan theih chu a ni a, chu tihlai lahin an beihte lah chu an chak rapthlak a ni si a, an rilru chu a buai takzet a ni. Thumum pawh nei theilo a rik bawrh bawrh lai chuan an khaw pasal tha Thangvawra chu a rawn lut hlawl a, an lalpa hnenah chuan “Lalpa nizan khan pakhat kha feiin kan chhun thlu der khan ka hresia, hei vawin mi ruang kan seng hawi naah hian ka hmu hauh lo mai a, mak ka tih em avangin rawn hrilh hriat che u, țha ka ti a, ka rawn tel nawlh mai” a rawn ti lut bawrh bawrh a. Chutianga Thangvawra’n a han sawi leh takah phei chuan an hrilh hai tlang hle hlawm a, feia chhun pawh a, an thi thei chuang lo a nih si chuan engtiang chiah a, han tih tur nge maw ni le, kan pi pute thawnthuah kha chuan Lalruanga kha chuan Keichala kha chu thal in a that ngei mai a, chutiang bawk in Phawthira leh Hrangchala te thawnthuah pawh khan an țhian dun khan an that thei a ni bawk si a, hengte hi tak tak a nih si chuan tinge keinin silai leh fei a that ve thei miahlo nge maw kan nih le, tiin an inzawt hehaw hlawm a.
An lalpa Ropuithanga chuan “Khonge maw kan bawlpu leh sadawt te pawh hi an awm le, han ko teh u, a tih dan dante pawh an lo hremial mahna sin” a han ti a, Thangvawra chuan an rorelna hma a, lo awm ve reng chu nuam a ti bik chiah lo, nen “khawnge keiman an ni chu ka zuk ko ange” tiin a tlanchhuak ta vat a.
Reivak lovah chuan Bawlpu leh Sadawt chu Thangvawra chuan a zuk hmu thuai a, an ni pahnih chu miruang vel buaipui chuan an lo buai dun mawlh mawlh a, mitthi te chu zan riahpui chi an nih loh avang leh rawn bei leh thut thei an nih avang chuan ruang phumna tur chu hmun khatah zau takin an lai a, chutah chuan phum turin an lo buatsai mek a lo ni a. Lalin an pahnih a, a koh thu Thangvawra chuan a zuk hrilh a, lak lawh viau mahse lalin a koh si chuan kal lo thei niin an in hre lova, an bawlpu chuan a fapa Tuvela hnenah chuan “hei mama lalin min ko thut mai sia, a pawimawh thawkhat a niang e, kan han kal phawt anga, kan kal hlan in miruangte hi lo buaipui mai ta che, a tih dan tur engkim i hriat vek tho kha” a han ti a. Thangvawra pawh chuan “e kei pawh hei ka awm a lawm a theih ang ang in Tuvela hi ka lo pui dawn nia, hanchho rang zawk teh u, a pawimawh viau a niang e” a lo ti ve bawk a. Tichuan, bawlpu leh sadawt chu hmanhmawh takin lalin lam pan chuan an kalchho dun ta a.
Lalin an han luh chuan lalpa Ropuithanga chuan “Tawki pa leh Vungzau pa pawh hei an lo thleng ta e, kan lo nghak reng tawh che u a sin” a lo ti a. țhut hmunte an han rem fel ve hnu chuan Ropuithanga chuan thilawm dante, a rawn koh tirna chhante chu a han hrilhfiah a.
An sadawt Laiawrha chuan “nia a mak ang reng khawp mai, min rawn beitu hi engtiang chiah a, han beihlet chi nge a nih pawh hi kei chuan ka hrethiam love a, ramhuai emaw sahrang emaw lah a ni bawk silo, kan pi leh pute thawnthu mai mai ni a kan ngaih țhin kha hei atak tak a lo ni reng si a, kan thiam leh kan tihtheih anga han hnawh bo mai theih a nih pawh kei chuan ka hre hauh lo mai, a tih dan pawh hi kan pi leh pute pawh hian min hrilh chhawngin kan lo in hlanchhawng reng reng siloa, kei chu ka bangbo ang reng khawp mai” a ti charh charh a.
Bawlpu pawh chuan “ni e, lalpa kei pawh hian kan sadawt sawi ang khan han tihvak ngaihna awm reng reng ka hre biklo mai, inthawina hmanga han hnawh bo dawn pawn a tihdan kan lo inhlanchhawng hauh silo a, ka hrelo kei pawn, mahse thu rawn erawh ka nei a” a han ti a, Lalpa chuan an bawlpu hnenah chuan “a nih eng nge i thu rawn chu ni a” a lo ti thuai a, ani chuan “Kan tlangvalte hi tirchhuak ila, kan chhehvel khua a, bawlpu leh sadawt awm vete hian a tihdan an lo hriat takin a zawt turin kal ta mai se la, a țhat ka han ring a.” tiin a thurawn chu a sawi a.
An lalpa ropuithanga leh a upa te ho chuan an bawlpu thu rawn chu an han sawi khawm nak nak a, a tih chi berin an ring tlang vek a, an lalpa chuan eng pawh ni sela, kan tlangvalteah hian, a kal tur chu zaninah thlanchhuahna nei ta mai ila, a țha in ka hria tunah rum rum han kokhawm dawn ila, hei thlanlai leh inthawm țha in an buai a ni a, chuvang chuan koh mai chi nihrih pawn ka hre love” a ti a.
Hringzawl khua chu nileng deuh thawin miruang phum chuan an buai a, a tute pawh chuan mit tui nen ni an khar a ni hrim a, a tute mah inhnem chuang tur an awmlo, an chhung leh khat te an țhian țhate an channa chu a na em a ni…
Post a Comment