Aizawl, Lunglei leh Thenzawlah te thla hnih chuang ngawrh tak a shooting neih a nih hnuah, Thingtlang tlangval film shooting chu zawh fel a ni ta a, editing hi khawih tan nghal niin, reilo te ah tih chhuah tum a ni. Mizo film Industry a hnuhma nei nual tawh Malsawma Fanai (M-Space) leh Mapuia Chongthu (Leitlang Pictures) ten he film hi an buaipui a ni.
He film ah hian hla paruk lai hmuh a ngaihtlak tur a awm dawn a, Film chan thiam piah lamah zaithiam a ngaih tel avangin achangtu te pawh- Israe Lalbiakrema (Is-a), Hlimhlimi, Bethsy Lalrinsangi te an ni nawk mai! “Beiseina” a sak avanga kan hmelhriat Sangtei Khawlhring chuan hla pahnih-ah a aw a thawh ve dawn bawk. Hla awmsa te hi a hranpa a film mood nen a inmil tura tih danglam vek a ni a, a music hi Lal K. Sailo leh Keyboard thiam, Muanpuia (Chanmari West) te kuthnu niin recording hi Siama (Zonun Recording) in a ti thung. Director, Malsawma Fanai chuan hla pahnih film tan bik liau liau a phuah a nih thu a sawi a, heng hla bik ah te hian a changtu te aw ngei hman tel a ni dawn tih a sawi bawk.
Heng bakah hian achangtu Rosangpuii (Damna Kim), Papuia (Nunna thar & Scooty), Mimi (Anabaino), Siamte-a (Awmpuipa) Gospel-a Tlau (Scooty & Kira) te chu Zoram mipuiin kan hmelhriat tawh te an ni hlawm a, hmel thar hmuh tur an awm nual bawk ang.
Tun ah hian a changtu te Lunglei lam ah film Cover /Poster tur an buaipui mek a, thlalak hna leh poster design hna hi thlalak lama hriathlawh tak Henry de Ccorn in a buaipui mek a ni.
A ziaktu Malsawma Lailung chuan script an uluk thu a sawi a. Thingtlang Tlangval-ah hian hmangaihna, thinrimna, lungngaihna, hlimna, chhanchhuahna kan hmuh tur a sawi a. Tunlai thalaite mamawh rilru hriselna (Mental health) counseling a awm avangin Dr. C. Lalhrekima kuthnu pawh hmuh tur awm ang. He film hi Musical film rawngkai a nih a vangin hla awm te hian a film ah hian pawimawhna an nei vek a, hla pahnih ah phei hi chu Choreography hmuhnawm tak en tur a awm dawn a ni.
He film hi hi Renthei Industry in an produced a ni.
Post a Comment