Mizoram-a Tourist destination kan neih thatte zinga pakhat chu Reiek tlang hi a ni kan ti thei awm e. Reiek khua hi Aizawl atang chhim thlanglam 30 Km vela hla a ni a. Mizoram-in Airport kan neih chhun, Lengpui atang pawhin a hla lem lo bawk. Reiek tlang leh a chhehvel hi tourist destination tha tak ni mah se, kum 1990 hma lamah chuan EGS Jeepable road chhe takin a pawh ve hram hram chauh a. A tlang mawina leh larna aiin Reiek khaw kawng chhiatzia kan larpui zawk thin. Tunah erawhchuan riah buahfai nen Aizawl kal kan ngai ta bik lova, darkar khat chhung lekin eng motor pawhin kan thleng ve zung zung thei ta.
Hun rei tak chhung khaw mawngping kan nih avangin tunlai hmasawnna chi hrang hrang hian ka bu zawl a rawn thleng ve dawn tan chauh a. Kan changkan loh luatah ram ngaw leh hmunhma kan la tichingpen nasa lutuk lo zawk a. Khaw dangin nasa taka min changkan san tawhnate chu umphak tumin theih tawp kan chhuah a lo tul ve ta.
Reiek tlang hi Mizote rohlu niin kan intawm mah ni se, a hmun thuttute kan nih avangin a venhim leh enkawl kawngah mawhphurhna kan la a. Midangte aia Reiek tlang malsawmna kan lo dawng tam deuh a nih pawhin Zoram khawvel hian min thik lo turah kan beisei a ni.
Mite hian Reiek tlang mawina leh nawmna atang hian khuanu rorel dan leh remruat dante hriain, A thilsiam ropui takte avanga nun kawng dik kan hmuhchhuah theih kan duhin, Reiek Tlang hi kan Evangelical Missionary atan kan hmang a ni. Hetiang hi kan rilru a nih avangin Khuarel mawina leh a nihphung tidanglam thei thil lakah kan venhim hi a pawimawh em em a ni.
Reiek tlang hi tourist destination tha tak a ni tih hriain Mizoram Sorkar pawhin a tih changtlun dan tur te, a venhim dan tur leh tihhmasawn dan turte siamin "Reiek Tlang Master Plan" a nei a. Chu Reiek Tlang Master Plan chu a puitlin kan la nghakhlel em em reng a. Kan beisei anga thil a thlen tak mai loh avangin Local level-ah "Reiek Tlang Tourism Development Board" kan din ta ngawt mai a ni. Reiek tlang Master Plan hi a puitlin hun a lo thlen hma pawhin nasa taka venhim leh enkawl a lo tul tak avangin Vawiin, ni 8 Sept., 2018 atang hian Reiek Tlang Tourism Development Board ruahmannain Tourist Resort luh dawnah "Visitor Counter" siama duty indah tan a lo ngai ta a ni.
He Visitor Counter hi zawi zawia tihchangtlun chhoh zel a ni ang a. Tlang tlawhtute tan pawha chhenfakawm zawka inkaihhruaina leh a tul anga intanpui tawn theih dan turte pawh ruahman zui zel a ni ang. Entry fee atan Rs. 10/- per head-a lak rih niin hun rei loteah ennawn a ni ang. He entry fee hi tlang rawn tlawhtuten na ti lovin, khuarel mawina vawn him kawnga contribution pe ve-ah inngai thei zawk ila kan duh hle a ni. He entry fee petute hian kan tu kan fa lo la awm zel turte tan, tlawh tlak hmun nuam leh thianghlim kan siam zawk a ni tih hria ila. Chen tur hmun nuam leh mawi - 'Reiek Tlang' min siam saktu, Pathian hnena lawmthu sawina rilru pu chungin contribution nei ve-ah inngai thei ila kan duh tak meuh a ni. ~ Lcm Chuaungo
Post a Comment