INTHLAHCHHAWN RORELNA LAKLUH TUM AVANGIN CONGRESS A CHHE MEK: MNF PRESIDENT
Vawiin hian Serchhip Bazarah Serchhip MNF East Block huaihawtin 'Campaign hawnna' neih a ni a, he hun hi Pu Zoramthanga'n a hmanpui. Pu Rama chuan thusawiin Serchhip bial MNF candidate tur chu Upa C Lalramzauva a nih thu a sawi a. "Congress sorkar avanga Zoram damlo a dam theihna tur in kutah a awm a ni. Zu zuar thei tawh lo tura Congress Party hi in siam a ngai. Kohhran miten ṭawngṭaia Pathian rawn chungin vote thlak turin ka ngen a che u," a ti.
MNF President chuan, "Pu Hawla'n vai rama an hotute tih angin inthlahchhawn rorelna Congress Party-ah lakluh a tum a, Congress Party a lengdarh ta mek a. Congress chakna thahrui ber a Vice President Pu R Lalzirliana chu party aṭangin an ban ta hial a ni," a ti a. "Kan inthlan loh avangin Congress hi an la tla lo mai chauh a. Anmahni leh anmahni an inbei chhe vek tawh a ni," a ti bawk.
Pu Zoramthanga chuan, "Congress party-in District 5 an puante ṭha takin fuke kimin kan siam chho a, kan puan vete an ngaihsak lo thung. Kan sorkar ang a, District 3 kan puante kha ṭha takin kan function tir dawn a ni," a ti.
"Serchhip mipuite u, 'CM tur kan vote tling leh dawn' tih rilru pu tawh suh u. Pu Hawla hi a tling a nih pawhin MLA dang 20 an neih a ngai. Congress hi an sorkar tawh dawn lo. India ram hmun danga Congress an chhia ang chiahin Mizoramah pawh an chhe vek mek a ni. Kohhran, zirlai, zirtirtu leh mipui hrim hrim hian Congress sorkar hi an hne tawh takzet a ni," MNF President chuan a ti bawk.
Pu Zoramthanga bakah hian Upa C Lalramzauva, Adviser Pu Robert Romawia Royte leh Pu R Vanlaltluanga, Secretary-ten thu an sawi bawk.
He inkhawm hi T Zadingliana, MNF East Block President-in a kaihruai.
(LALLENMAWIA JONGTE)
Joint Secretary
Media & Publicity Dept
Mizo National Front
Memo No.MNF/Media/2018/01/292
Dt.18.09.2018.
Post a Comment