VL KROSHNEHZOVA, MZP PRESIDENT HLUI THUSAWI(24/9/2018)

VL KROSHNEHZOVA, MZP PRESIDENT HLUI THUSAWI

Kum 1994 atanga 2011 thleng, kum 17 zet MZP huang chhung atangin chhumlo chat lovin Kan ram leh hnam neih chhun tan hian theihtawp chhuahin, thawhpuite thlazar hnuaiah rawngbawl hna kan lo thawk ve a ni a, 2011 atanga kumin thlengin kum 7 zet phak tawk ang zelin Adviser hna te kan han chelh chhunzawm leh bawk a. Ka khawvel hun hman tawh hun tam zawk hi MZP in a luah a tih theih ang. Chumi hmun atanga kan hnam nun humhim tur leh kan ram hmasawn zelna tura, rawngbawl hna chu he hnam Party atanga chhunzawm tur hian duhthlanna kan siam ta a ni a. Ni 14, September 2018 khan kan khua Saituala, kan veng Unit VI-ah pawl zawmna fee, Kan Senior Vice President zahawm tak leh hotu dang thahnem takte uapna hnuaiah ka han pe tawh a. Vawiinah hetiang hun hlu tak hi kan tawng leh ta a ni. Hun puma rawngbawl hna thawk turin ka tawnhriat te hi a tangkai ve ngai a nih chuan, kan Party leh kan ram leh hnam tan hian engemaw zawng talin hlawkna a awm ve ngei ka bei sei tlat a ni.

Ngun taka ngaituahna sengin, duhthlanna ka siam a, he Party ka zawmna chhan hi tam tak sawi tur awm karah hengte chauh hi han tarlang ila.

1. MNF HI HNAM PARTY A NI:- 
‘Pathian leh kan Ram tan’ ti tlat chunga MNF dintu, Mizo hnam lei Arsi lian her liam ta Pu Laldenga’n Mizo Nationalism chi nung tuh a, kan hnam tana a beihna leh a hnungzuia vawiin thlenga he party-in Mizo Nationalism vawng nunga, chhawm nung zel a, uar taka thang thar lo la awmzel tur tana kan hnam dinchhuahna bulhrum, ze pawimawh a nihna hrechiang a, a tellova kim ve lo Party a nihna hi ka hrechiang a, ka hun kal tawha kan hnam tana tha tur nia kan hriat kan tih thinte, thlamuang taka kan tih chhunzawm nan he hmun bak hi thlan tur dang a awmloh avangin. He hmunah hian kan hnam tana Martar ten zahna tak tak an chang a, chawimawi an ni a, fak an ni. Mite hmuha mawi hawih zawn vangin chung chu tih a ni lova, thuneihna chan duh vang maia thil tih ni lovin, a taka hnam tana fehchhuak, thisen mai nilo nunna chan huama kalte Inpui a nih avangin. Kan vawiin nun atana an naktuk nun hlantute chawimawina hmun a nih angin he hmuna ka ni hman hmasak ber pual hian kan hnam tana Martar zawng zawngte zahna chibai ka buk a ni.

Hmana kan hnam nuna Rihdil leh Jordan lui insual kha rinna in Rihdil tui nu thin kha Jordan tui fim hmangin tihthianghlim a ni a, lungrual takin tisa leh thlarauin chu tui chu Mizo Kristian Nationalism hmangin kan inho ta a. Kan phu reng vang ni lovin min hmangaih em avangin hnama min siamtu tih finin kan awm a, kan ram leh hnamin pawhin hma a sawn chho ve ta zel a. Chutih lai chuan tihfin kan nihna var pawh vaklo kan zingah an seilian ve zel a, kan hnam tana kan rinna nena inmawi hauh lo Ganges lui tuia inbual chunga, Coconut sawhkeh a, ban sawm hmaa inthawi paha kan hnam thu tlangau pui ve phet tum, thil inremlo a ni tih man pha chiah lo, zotuithiang aia kawrvai lui tui ngaina, kawrnghawng chip leh vai kekawr pan zuih nena chheih lama lam tum ve tlat an awm a. Hnamdang tihdan chhe tinreng hmanga inawi nungin ram mipuite awhna chi tinreng hmunah min hruai lut a. Zu chhiah hmanga kal tawk tawk ram hmel kan hmuh phah ta a ni. Mizo Nationalism sawiri an awm apianga lo helh em em, an hotute venthawn vanga sawi ri ve ngam si lo, an hming tawp atanga mipa leh hmeichhe hriat hran ve hauh lohte fak tel zel chunga Nationalism sawi ngaihna hmun atang hi chuan he hnam thu hi a chian tak tak theih loh a ni.

A tawi zawngin, Zalen taka ka hnam thuam ka hak luh theihna hmun, ka hnam zai a ka rin Pathian ka fak ngamna hmun, ka zozia hmanga inthlahrung hauh lova, zonunmawi ka chawisan ngamna hmun hi hnama chiang inti tan thlan loh theih loh hmun a ni.

2.ZUI TLAK PRESIDENT AWMNA PARTY A NI E:- 
He party a kaihhruai dan hi chu tuhran nise, Chief Minister hna a vawn laia a mawhphurhna hlen tura a thawhrimna leh inpekna kha zui tlak a nihzia pholangtu a ni. Kan ram leiba tamtak karah hmasawn turin theihtawp a chhuah a nih kha. Awm lova ta awmah thil tam tak a siam chhuak a, pakhat chauh han tarlang ila, Central a pu chuam leh pichuam nei ten theih lohva an ngaih Assam Riffes chungchangah a lan tir a. Treasury square tawt tak kara Sawrkar hmun pawimawh zawng zawng insawrkhawm kha, kan ram kan tih ve si, vai sipai luah beh reng chu a theihna hmuin a tiruak a, khawpui thar hlak a din a nih khu. An tih theihtawk thenkhatin rawn ti chhunzawmin, a hmingte an rawn thlak ve. A ropui lemlo ngawt mai.

Hmathlir thui tak nei, kan ram mamawh mutmawh hnarmawha neitu a ni a, tute emaw angin a bei dawng ve lova, a tum buau ve hek lo. Tute emaw angin lalna chang chungin kum 20 chuang zet mirethei te hmangaih derin leirem rahtir tumin a bei reng ve lo. Leirem mai rah tir lovin, midang chawmtheitu ni tura siam chhuah a tum.

Tin, kan hnam hi eng hnam hnam emaw compensation hnam, sawrkar kar nana hnatlang hnam etc.ah chhuah a tum ve lova, kan hnam chu a nihna ngai reng zohnamah nghet taka din tirin, hnam chhuanawm taka din chhuah tum tlat mi a ni. Ram retheihna in a hrin rilru retheihna thaibo a, kil tina eirukna hluar mek umbo tura hnam intodelha min siam tum tlattu a ni. Kohhran leh khawtlang ngai pawimawh leh dah pawimawhtu a ni a, an duh loh zawng leh ngaimawh em em Ruihtheihthil thlah zalen phal ngai lo mi a ni.

Mizopa a nihna hi CM a nih leh nih loh laiin a danglam ve lo. Lusun khawhar hnem tura thawhchhuah kawngah te, kohhrana a mawhphurhna hlen kawngah leh he party a enkawlna a Mizopa a nihna zahpui chu sawi loh, chhuang zawk maha hna a thawh dan hi a chhuanawm takzet a ni.

3. HRUAITU TANGRUAL AWMNA HMUN A NI;- 
Thawkho hruaitu nihna hi he Party ah hian alang chiang hle. Kan President tluka inngaitlawm leh thawhpuite zai zap thiam hi kan ramah hian an awmlo ang. Inti lal bur anni ve lova, an zo raih mai a. Sang bik lurh awm phal lova, seihlei awm thei veng tlat mi President awmna Party a ni a. He inngaihtlawmna hi mit a meng tan chuan hmuhhmaih chi rual a ni lo. India ram hmun dangah hetianga thawkhona tha hruaitu awmna hi a awm kherin a rinawm loh. Hmuhtheih loh Pathian nung be ve ta lo chu an hotu ber te Pathian biaka be vel vek party an ni a. Hmalama kutsuiha an hruaitu be thin te tihdan ngaisang lemlo leh hnawl ngam hruaitute awmna a ni. Hetianga inlungrual hruaitute hruaina hnuaia memberte tana ke pen hi thil chakawm tak a nih avangin.

4. Kan ram hnuk hi Vaipa kutah a awm lova, kan kutah a awm tih hretu Party a nih avangin. Kan thiamna leh finna hmang ngeia kan ram hi siamthat tum tlatna hmun, upa zawkte tawnhriat hlut tak leh chawisawng chunga thang tharte thiamna lochhuak zel hmang tangkaia kan ram siam that tum tlatna Party a nih avangin. Neitu nihna nena ram enkawl, mi rethei zawkte a chhe tinreng mawh phurh tir zelna laka chhanchhuaktu sawrkar din turin.

5. Saitual fapa ka ni a, 1974 atanga, kan pi leh pu, nu leh paten tlumte a thlir taka an thlir 2008-a District Headquarters min petu leh min tihhlawhtlin sak ngei tum tlattu Party a nih avangin. He hna leh a hmachhawp tam tak kan ram dinchhuahna turte tipuitling tura hlawhtlinna a chan ngei theih nan theihtawp chhuah turin kan rawn pen chhuak ve a ni. Thuthlung hluiah khan hnawl hnu Lal Saula kha hun enge maw chen lal thutthleng a luah phal sak a ni a. Hnawl a nih hnuah kha chuan a vua leh vangte ngei pawh an hlim kim ta lo a nih kha, mipui chan ngat phei kha chu a chhe hle a, Lalpa miruat Davida ngei pawh a nun humhim tura a tlan chhiat a, a bihruk zak zak a ngai a nih kha. Hnawl tawh lal hun chhung hi hun rei a ni tawh dawn lova, hun thar, ram mipuite hmanga ruat Hruaitu hruaina hnuaia Sawrkar neih hi a chakawm tawh em avanga, chutiang a thlenna tura theihtawp chhuah turin ka rawn pen chhuak a ni.

A tawp berah chuan kan ram hi min siamtu Pathianin kan hnam tana min pek a ni a, a chhiat a thatah keini hnamte hian mawh kan phur tlat a, chu kan mawhphurhna chu kan thlah kal zelte hrilhriat leh entawn tura zirtir hi kan bat a ni a, an chenna tlaka lo buatsaih lawk hi vawiina miten kan mawhphurhna a nih tlat a vangin, chu mawhphurhna hlen tur chuan he hmun hi kan hnam tan Pathianin din a ni tih ka pawm tlat a, hnamte tana ram buatsaitu ram min pek tana inpekna thianghlim nen, theihna ka neihve chhunte hmang turin he hmun hi lungsi takin ka thlang a ni. La dai ngai loh ram dai tur ka ni a, inpe viau mah ila, kawng min kawhhmuh ka mamawh dawn a, kan hruaitu zahawm tak takte leh, hun kha leh chen he party a rawng lo bawl tawhte finchhuahna leh tanpuina, in hmangaihna ka dil tak meuh bawk a ni.

Mizo Nationanal Front, Mizo hnam Party, Pathian leh kan ram tan vul zual zel rawh se, ka lawm e. ~  Chhana Vidìc Vanchhawng

Post a Comment

Powered by Blogger.