BJP chuan November ni 28-a member 40 awmna Mizoram Assembly inthlanpui atana an party candidate tur 13 hming an puang.
Mizoram Pradesh BJP president Prof. John V. Hluna’n a sawi danin he candidate 13 puan hi a hmasa ber a ni a, a list dang pawh tihchhuah leh thuai a ni ang a ti. Candidate leh an dinna tur bial puanah hian Prof. J.V. Hluna chu |awi bialah a ding dawn a, hetah hian tun hnaia Home Minister bang ta, Mizoram Pradesh Congress Committee (MPCC) Vice President leh party member nihna atanga hnawhchhuah tak Pu R. Lalzirliana leh MPCC candidate Pu Rosiamngheta te nen an inbitum dawn a ni.
Candidate puan zingah hian Pastor pahnih – Rev. L.R. Colney leh minister hlui Rev. H. Lalruata te an tel a. Hmeichhe pakhat Pi C. Malsawmi a tel ve a. Candidate langsar zingah Lunglei district BJP President Dr. Aichhunga, BJP state unit president Pu Malsawmtluanga, BJP state general secretary Pu Vanlal Hmuaka leh IPS bang Pu Vanupa Zathang. BJP Mizoram unit hruaitu pakhat chuan an president hi Mamit assembly biala ding tura an lo ngaih thu leh hun rei tak a vil tawh thu an sawi a. Chutih lai chuan Delhi lama an hotute’n Mamit bialah hian an thalai president Pu Malsawmtluanga hi an rawn dah ta a. Pu J.V. Hluna hi a bial duh ber pahnihna |awi lamah an suan ta ni a thudawn a ni.
Pastor ding zing ami Rev. L.R. Colney hi Odhisa lama missionary a awm thin ni a thudawn a ni a, ani hi Aizawl West-II ah dingin rorellai Congress candidate Dr. Lalmalsawma leh MNF candidate Lalruatkima, MLA te nen an inkhing dawn a. Rev. H. Lalruata chuan Lunglei East-ah Congress candidate Pu Joseph Lalhimpuia MLA nen an inbitum dawn a, MNF candidate tur hi naktuka puan a nih rin a ni. Hmeichhe hming lang awm chhun Pi C. Malsawmi hian Finance Minister Pu Lalsawta leh MNF candidate Robert Romawia Royte te a bitum tura ngaih a ni.
BJP candidate zingah hian an party unit general secretary Pu Vanlal Hmuaka chu Serlui bialah dingin Congress candidate Pu Anggu Lalhmachhuana nen an inkhing dawn a, MNF candidate puan a la ni lova. IPS chawl ta Pu Vanupa Zathang chuan Lawngtlai East bialah Congress candidate Pu H. Zothangliana MLA chu a tum dawn a, MNF-in an candidate tur an la puang lo thung. Pu Vanupa Zathang hi 2013 inthlana MNF candidate a he biala ding kha a ni a, candidate a chan tak loh avanga BJP zawm ta nia sawi a ni.
Candidate dangte chu - Aizawl North-I-ah Pu David L Sailo, Aizawl East – I-ah Pu Laldinliana Sailo, Aizawl West-I-ah Pu Malsawmliana, Champhai North-ah Pu Hrangsatkima leh Champhai South-ah Pu Ronghaka Colney te an ni.
BJP hruaitute sawi dan chuan tunkar Thawhlehni hian khulama an party hruaitute an lo zin leh dawn a. Hetah hian candidate nih tumte mimal mala kawmin rei lote-ah list pahnihna tihchhuah thuai a nih an rin thu an sawi. - AIR News Aizawl
Post a Comment