Eptu MNF Party chuan November ni 28 a assembly inthlan lo awm tur atana an candidate turte chu naktuk hian Vanapa Hall-ah an puang dawn.

Mizoram election 2018MNF hruaitute hnen atanga thudawn danin an party hian bial 40 hi chuh kim an tum a. Naktuk, an party din champha lawmna inkhawm ni pahfawmah hi chuan bial 39 a an candidate turte an puang phawt dawn a. Tuichawng biala an party candidate tur chu NGO Coordination Committee thu an ngaichang rih dawn ni a, thudawn a ni a. Chakma bitna bial dang pakhat West Tuipui bialah chuan Mizo candidate an dah dawn niin an sawi. A takin la puang lo mahse bial engemawzata ding tur chu hriata a ni tawh a. Naktuka an candidate puan tur hi local tv channel-ah live a pek chhuah tur a nih thu an sawi bawk a. ZPM chuan Nilaini khian an candidate tur puan an tum ve bawk.



Tun dinhmunah hian rorellai MPCC chuan an candidate tur puang tawhin bial 40 chuh an tum thu sawi mahse bial 36 a an candidate tur chiah an la puang a. Mara Autonomous District Council leh Chakma Autonomous District Council huam chhunga bial 4 candidate tur an la puang lo. BJP chuan bial 13 a an candidate an puang tawh a. Nationalist Congress Party (NCP) chuan bial 5 chuh an tum thu an puang tawh a, an bial chuh tur puangin candidate hming erawh chu khulama an hotute pawmpuina lak phawt tur a la ni. PRISM Party chuan bial 30 bawr vel chuh an tum thu sawiin bial 18 a an candidate tur hming an puang tawh a, a tahtawla puan chhoh zel an tum thu an sawi.

Meghalaya a hmunpui nei leh hmarchhaka inzar pharh National People’s Party (NPP) chuan inthlan hi chuh an tum thu an puang a. Candidate an la puang lova, an dinna tur bial zat chu puanzar theih thuai an inbeisei thu an sawi. - AIR News Aizawl

Post a comment

Powered by Blogger.