Tuirial Assembly bialtu, Congress MLA Pu Hmingdailova Khiangte chu vawiin khan MLA a nihna leh Congress primary member a nihna atangin a bang a, Tuirial bialah hian Independent-a a din tur thu a sawi.
Pu Hmingdailova Khiangte hian a banna hi Assembly Speaker Pu Hiphei-a hnenah a thehlut a, Speaker hian a banna hi lo pawmsak nghalin, vawiin la la khan Assembly Secretariat chuan Pu Hmingdailova Khiangte a ban tak avang hian Tuirial Assembly Constituency chu bial ruak a nih thu a puang nhgal a ni.
Pu Hmingdailova Khiangte hian vawiin vek khan Congress party atanga a banna thehlutin, a bial ngaiah hian Independent-in a ding dawn tih AIR a hrilh a. Congress party-in an party official candidate an puan hma pawhin a bialah hian mi dang dah an tum thu hi a hre thawi deuh tih sawiin, bial a chan loh em hi chu a ring pha lo tih a sawi a. Mi hrang hrangin Congress chhuahsan mah se party-ah lungawilohna a neih ngai loh avangin chhuahsan tumna rilru pawh a nei ngai lo tih AIR a hrilh a. A bial chu vawn him ve viaua a inhriat laia Congress-in an party official candidate an puan zingah a tel ve tak loh avangin a bial mipuite rilru a na a, Independent-a ding mai tura an nawr avangin Independent-in a ding dawn tih a sawi a ni.
(AIR Corr.)
Post a Comment