CATHERINE - PIALRAL THLENGIN PART I (MIZO LOVE STORY)

VAIVUT CHU VAIVUTAH

Thawhtanni

Mizo nupa nun
            Ni thum zet khua a chhe tawh a. Ruah sûr tluk tluk leh chhûm zing pik chuai mai chu ning teh mah ila tihngaihna a awm der si lo. Chuvangin lehkhabu chhiarna hunah ka hmang a, a tihchi phian. Ka lehkhabu chhiar chu a ngaihnawm em avangin zunram thiar ka duh a, loh theih loha thawh a ṭul chângte hian ka ûi thei hle a, ka tho phal mai ṭhin lo.

Chutia ngaihnawm ti em em leh a ziaktu ngâisâng rilru tak chunga ka chhiar zel chuan a chanve ka chhiar thleng mêk a; chu chu chawhnu tlâng her, dâr khat leh a chanve vel a ni. Ka chhiar lai phêk phei chu ngaihnawm ka tih zual lai ber a nih avangin kan kawngkapui rawn kik dawt dawt ri pawh chu haider ka duh deuh hial a. Mahse an kik hun leh thawm chuan a zir em avangin thil pawimawh fê a nih ka ring a. Bathlar thingphel chhuata mipa pheikhawk per ri ṭuk ṭuk leh ṭawng thum bul bul aṭang chuan kan inleng turte chu khawilam nula mah an ni dawn lo tih pawh ka hre thei nghal a ni.



            Kawngkapui ka va hawn chuan an piang ve tih ka la hriat ngai reng reng loh leh tute nge an nih rin ngaihna pawh ka hriat loh tlangvâl pahnih, in upat hleih tih hriat tak mai hi an lo ding huh chap a. Hmelhriat loh mikhual pahnihte chuan mi tihrilhai lek lek zâwk a ni. Ka biak hmain a upat hmel zâwk leh hmêlchhe zâwk, missionary atana itawm loh hmel ve fahran mai, thlân laih nikhuaa a kotlang ‘A’ team nih duh hmêl tak, sam dum hlap mai, a huh avanga pial than tawh chuan, “Hei hi Pu Thangbuaia te in a ni em? Anih chuan Tv Lalchhuanmawia kan hmu duh e,” a ti a. A aw aṭang chuan vâwt a ti hle tih a hriat nghe nghe a. Kei chuan, “Ni e. Kei hi in hmuh duha chu ka ni e. Engnge ni ta? A va pawimawh awm ve?” tiin ka lo chhâng a. Ani chuan, “Hmunzotlanga i ṭhianpa . . . . kha Delhi-ah a boral a. A ruang pawh naktûk tlai dâr ngâ vel khian an rawn thlen pui hman an beisei,” a ti leh a. Hmunzotlanga i ṭhianpa tih chuan a hming sawi kher a ngai lo; ka chiang nghal em em ringawt.  “E he! Engtika boral nge?” ka ti a. A naupang zâwk chuan, “Inrinni chawhma lam kha a ni awm e,” a  lo tive bauh a.
            Ka ṭhianpa thih thu chuan mi dêng na kher mai. India ram damdawi in ṭha ber tia sawi ngam hial tur New Delhi khawpuia AIIMS-ah rei tak a awm tawh a. A ralkhat thil deuh avangin a dinhmun chiang tak ka zuk hre vek sêng lo. A natna chu a sirias hle tih hre mah ila beiseina lian tak neiin a tân van lamah dilna pawh ka thawn chho hnem ve hle tawh a ni. A awmna damdawi in chu ṭha tâwk êma ka hriat avangin ngaihṭhat thlâk viauin ka hria a. Hetiang em em a nih hi chu ka ring phal ngai lo. Tuna ka hnathawh lai hi zo ila zuk kal ve hial pawh ka lo tum rilrûk lâi zâwk a ni.

            Ka rilru te chu buaiin chi-ai hle mah ila chanchin rapthlâk leh thin ṭhawng min rawn hrilhtu zualko pahnihte chu buaipui an ṭul si a. Aw pangngai leh hmêl pângngai put luih hram hram tum chungin, “A nih tak chu maw le. Engpawhnise min rawn hrilh a, kan lawm e. In rawn kalna a hla si a, rawn lût phawt rawh u. In rilte pawh a ṭâm ang chu. Chaw in ei nghal dawn nia” ka ti a. A naupan hmêl zâwk leh Sunday sikul kai kim lâwmmante pawh la ve mai thei âwm hmêl pu zâwk chuan, “A ngai lo vang, ṭhiante in kan pan mai ang chu kan ti deuh a. Kan kete hi a berh si a, in chhûng kan dâi berh mai mai alawm,” a lo ti a. Kei chuan, “Mi in pawh in va dai berh ve dawn tho asin. Chu, ruah pawh a rawn tlâk tam lehzual chu.”  ka ti a. Chutihlai tak chuan a hma aia nasa fêin ruah chu a rawn tla thum leh ta chur chur mai a. Zualko pahnihte chuan ṭang der chung zelin min zui lût  ta a ni.

            In chhûngah chuan thil awmziate kan han inzawt chiang lehzual a. Zualko upa zawk chu kum 28 bâwr vel tur, fit nga leh inches li vela sâng, hâng lam deuh,  sawi tur hriat hmêl tak a ni. Khabe dawh deuh, hmui chhah deuh leh ha bâl ang reng tak mai hi a ni bawk a. A kalpui pa ai chuan ṭawng pawh a ṭawng duh deuh e. Awm rei phei se chu a ngaihzawng neih tawh zât nen lam a inpuang vek hman ang tihtur a ni.
A naupang zâwk erawh chu a hawiher atangin sawi awm chin leh chin lo hre thiam tih hriat tak, kan zawhna bâk engmah sawi belh duh miah lo hi a ni thung a. Amah chu fit nga leh inches ruk vela sâng, ngo lam, khabe zum deuh, kum 23 mi vel tur a ni.  Kan in chhûng bungbêl a thlêk ulukzia te, kan lehkhabu inrem a enchikzia te leh  “Phaia lehkha zir in awm a ni maw?” a han tih mai theih dan atangte chuan a kalpui pa ai chuan makpa atana ittu a ngah zawk ang tih rinhlelh rual a ni lo. An che vel leh ṭawngkam atang chuan khaw khata seilian an ni naa zualko pahnihte chu an inkawm tam lo tih a hriat khawp mai.
Tapchhaka zualko pahnih inhem lum vel lâi chuan nimin piah lawka min boral santu ka ṭhianpa chanchin chu kan sawi nak nak a. Ka nu chuan a nupui neih nia kan thlalâkte chu a va phawrh chhuak a. An present dawn kan hawn lâi vel thlalâkte chu kan en nawn a. A lunglen thlâk ngei mai. An inneih ni chuan ṭhianah ka ṭang a. Chutihlai chuan kei chu kum 20 chuang awrh, college zo hlim chauh ka la ni a. Ani erawh chu val upa, senior lam a ni tawh a. Mahse kan inkawm ngeih ve tlat.


            Chhûngte ruala chaw ei lovin kan insiam sawk sawk a. Chutia kan insiam vel lâi chuan ruah chu a han ta deuh a. Khua chuanṭhat lam a pan zel dawn a nih rin theih turin kawl thlâng lamah van dumpawlte pawh a rawn lang ṭan ta bawk a. Kawng chhia avangin motor-a kal theih a ni dawn lo va, kea kal a ṭul hmel a ni. Thingsulthliah-ah chhungte dang han hrilh chhawn tur an nei lo va; kei, a hminga a ṭhianpa ber hi mi ngaipawimawhin min rawn hrilh vang vang a ni. Ka rilru chuan Machama te, Ramnghaka te leh Hruaia te awm lai nise an hmelhriat leh an kawm ve fo a nih tho avangin  hrilh ve ngei ṭha ka ti hle a. Mahse tun tlai hian Aizawl atangin an rawn haw chho maithei tih chauh a ni si, ka hrilh ta lo mai. An hriat phawt chuan an rawn kal ve nghal duh ngei ang.

            Khuain ṭhat lam pan dawnin lang mah se ruah a la tlâk deuh seng seng avang leh thli a thawt vur vur avangin chanchin duhawm lo zet min rawn hrilhtu zualko pahnih ruala ka chhuak chu a nuam lo kher mai. Khaw vawt chu thu khat, kawng nal leh berh vel chuan kal a ti hrehawm a ni. Kan ṭawng khâtin sawi tur kan hre lo tlâng hle a, han biak lumlam vak pawh ka châk lo a ni ber e. Ngawi rengin kan kal miah miah mai a ni.
            Thingsulthliah leh Hmunzotlang chu patling nilêng ban tâwk vel a ni ve a. Pumpelh hnaiah lo phei chuan muan sual awl tak a ni. Kawng chin hre ṭhang kan ni bawk a, pumpelhah deuh zar zar kan kal a. Rilru buai leh hmanhmawh nen; ka chau hle a ni. Zan dâr sâwmah Thingsulthliah leh Hmunzotlâng inkâra khaw tereuh tê, in 70 emaw chauh tur Sâizâwl khuaa ka pu fapa upa ber dawttu inah kan thleng a. Kal zel peih lovin chu khua-ah chuan kan riak a. Sâizâwl kan thlen lai chuan ruah a sur tawh lo va. Van lam han hawi ila chhum dum lian pui pui thlâwk duai duai karah fiah zet zetin arsi an lo lang a; a zia-awm ta. A tûk zing varṭianah  kan kal leh a. Zing dâr sarih leh a chanve velah Hmunzotlâng chu kan thleng ta a ni.

Thawhlehni

            Ka kal chhan ber inah chuan lût mai lovin a bul lawka chhûng khat hnaite inah ka innghat a. Ka thawmhnawte thlâkin ka inbual a. Khaw awm dan enin ruah chu a sur leh theih pawh a rinawm ta lo hial a ni. Muangchang lovin ka inpeih veleh mitthi in lam chu ka pan lehnghal a. Pawna ka awm laiin ka hmelhriat Hrângkhûma a rawn kal a, “E kha, i rawn kal thei maw? Engtikah nge i rawn thlen?” a lo ti a. (Henglai bawr vela mite hi chuan min hmelhriat sa ve fur a).Lo chibai pahin kei chuan, “Nichin deuh lawk kha a ni. In dam tlan lai a ni maw?” ka lo ti ve a. Ani chuan, “Dam e, kan ṭhat lai a ni e. Engtin nge ka mitthi chanchin chu i lo hriat a?” a ti leh a.  Kei chuan, “Tlangval pahnihin min rawn hrilh alawm. Tak a, hei a ruang hi engtikah nge a rawn thlen dawn chu le?” tiin ka zâwt zui a. Ani chuan, “Ka hre chiang bik chiah lo. Thlawhnain Silchar thleng an rawn phûr ang a. Silchar aṭang chuan sawrkar motor-in an lo zu hmuak dâwn a ni. Sawrkar milian a ni bawk a, sawrkarin a lo ngaihtuah ang chu ka ti mai asin,” a ti a. “Kawng lah chu a la chhe nasa mai si a. A va buaithlâk dâwn ve!” ka ti leh a. Chutihlai chuan midangin min rawn be buai a, kan thil sawi lai chu kan titawp ta a ni.
            Mahse chumi ni chuan ka ṭhianpa ruang chu sipai helicopter-in Zemabâwk thleng a rawn phur chho va. Zemabâwk aṭang chuan motor-in kawng chhiatna lai thleng a rawn phur chho leh a. |halai hovin a ruang chu kan lo zu hmuak a. Kei pawh a ruang hmuaktute zingah chuan a kila lung pawimawh ber pawlah ka zu ṭang ve a. Unau hmel hai velah khua kan lût a. Phum nghal chi-ah tuman an ruat lo; kan tlaivar pui ta a ni. Chumi nia a ruang rawn thlen pui a nih dan te, zana nula leh tlangvalin an tlaivarpui dan te, leh ûitu a ngahziate chu sawi lang vek lo mai ila.
        

Nilai
            A tûk khua a lo var leh chuan vui ni a nih tawh dawn avangin ka huphurh em em mai a. Tin, chu bâkah  vawi khat chauh tal a hmêl han hmuh leh chu ka châk ngang mai bawk a. Ka rilruin engtia a âwm chin tal lang thei tura a  kuang hi an siam loh chu âw ka ti a. Chu zawhna chu mi chhâng thei an awm pawhin ka ring lo va. Ka zâwt bawk hek lo. A thihna hi a rei deuh tawh avang leh a natna khan a zir em avangin Aizawl-Zemabâwk aṭanga a ruang an rawn phurh chhoh a, kawng chhe laia kan han inhlan tur khawih che velah pawh a nam deuh hlek tawh avangin a kuang hawn rawt hmasa tua ṭan chu ka ngam chiah lo deuh si a ni.
            Chawhma lam dâr 11:30-ah vûina hun serh ṭan a ni a. Hun serh neih lai chuan a nupui Sângpuii bulah ka ṭhu a. Pastor din hmain pangpâr dah a, thlahna hun nei duh tan hun tawi tê an hawng a. Kohhran ṭhalai, YMA, zirlai pawl etc., aṭangtein pangpâr dah an tam hle. Ka mittui tling karah chuan mitthlain a nupui neih nia kan hlimzia leh zana present hrang hrang kan hawn laite kha a rawn lang zut zut a. A inang ta lo ngei mai.

Mizo inlu            Mi chi hrang hrangin tawi tê têin thu an sawi a. Mitthi vui dan pangngaiin tuman a chanchin chhe lam sawi tur an hre lo. A tâwp berah a pa, kum 80 mi vel lâi tawh chu thusawi turin a rawn ding chhuak ve a. Putar lu ṭuak vâr vau tawhin a fapa neih chhun ang deuh thawa a kuah ngun, a innghahna ber a sûn a ni a, khawngaih pawh a hlawh kher mai. A thusawi tâwp lamah chuan insûm zo lovin a ṭap chhuak ta a. A fapa hmêl chu vawi khat chauh tal  hmuh leh a châkzia chu a au chhuah pûi bawk a. Sawi tawh angin a natna hian a zir em avang leh a rei deuh hlek tawh avangin a rimchhe tawh hle a. Mahse a pa dinhmun leh a ruang kiltute rilru tur thlirin kuang hawn leh a, a hmêl han hmuh leh chu kan remti tlâng hle niin a lang.
            Thusawi awm chin deuh deuhin an sawi zawhah pastor-in thlamuanna thuchah sawiin hla hnuhnung a thlang nghal a. Mipui kal khawm zawng zawngin ding chunga pastor hla thlan  ‘……pakhat zela an kal bovin; an kiam hin chhungkaw tinreng…” tih hla kan han sa dup dup mai chu rilru a zing duh chuai chuai ngei mai. Kan sak zawhah Lal Biakna kan sawi rual leh a. Tichuan thlânmual lama inthlah liam turin kan insingsa ṭan ta a ni. Tin, a hma lama kan lo rilrûk ang deuh khân a kuang hawn a, mipui en theih tura dah chu kan rem ti tlâng ta bawk a.
            Kuang an han hawng chiah chu; romol phawrhin hnâr kan hup sap sap mai. A lu chin chauh lang theia an dah kaṭhianpa, khum khata ka riahpui fo, hlim taka ka nuih pui bawk bawk ṭhin hmêl chu ka zuk en a. Tunhmaa pa hrisel, tisen neiṭha ṭel ṭawl, chal arh phek phawk ni ṭhin kha kuang chhûngah meuh chuan danglam tak a ni. Ka ṭhianpa, ka hmuh ṭhan fo leh ka ngaih em em ṭhin ni lo phei se hlauhawm thei  hial tur khawpin a hmêl chu a chhe tawh a. Mihring hmêl pawh a ang tawh lo. A mit khurte chu a thûkin a hehte chu a dum vek a. A hmaite chu a duk nasa hle. Tin, a hnâr aṭanga tui rawn chhuak chu a rimchhe em em bawk. A rimchhiat em avang leh en duh dang an tam em avangin en reng theih pawh a ni lo.
            Kuang an chhin leh hnu chuan a chhûngte leh a laina hnai zualten thla an lâkpui leh a. Kei pawh a thian hlun ber ka nih avang leh a nau ang chiaha min entu a nih vangin chumi ni chuan ka phusa nasa ve hle. Ka rilru a tâwt em avangin ka duh angin ṭhiante pawh ka huihai thei lo zâwk  a ni. Thlalâk zawh, thlânmual lam an pan pui dawn chuan Sangpuii chuan ka koki vuanin mi rawn ṭahkhum chiam a. Kei pawhin ka mittui ka sûm zo bik lo. Mipa  ka nihnaa pachang tur leh hmeichhia zâwk hnem tur ka nihnate chu ka theihnghilh lek lek a. Ka lungchhiat ve em avangin midang hnêm tur ka awm bik mawlh lo a ni. Ka mittui far zung zung chu hru faiin Sangpuii hnenah chuan, “Sangpui, thlânmual thleng ka zu thlah ve ang a. Nang chu hetah hian lo awm hrih rawh khai,” ka ti a. A ṭhiante chuan an lo thlêm ve mêk bawk a. Sangpuii chuan insûm hram hram chungin, “Ni e. Zuk kal ang che.Taka, Chhuana, Mama pa khan a thih dawn ṭêpin i hnena hlan tur lehkhabu leh a thilziak min pe asin. Amah an vui nia pe nghal tur che hian min chah a,” a ti a. A ṭah nasat em avangin a ṭawngte chu hriat a harsa tawh hle. Thei leh thei lovin, “I rawn haw lehlamah i rawn lam dawn nia,” a ti a. Kei chuan, “Ni e, ka rawn lam ngei ngei ang. Pachang taka i awm avangin ka lawm takzet a ni,” ka ti a. Ani chuan, “Ngawi teh. Pachan a har em hi. Ka pachang thei mawlh lo,” a ti a. A ṭah zawm nghal zat a. A ṭhianten an awmpui reng bawka thlânmual lam panin mipui tam  hnung lamah chuan ka kal ve ta a ni.
            Hmunzotlâng thlânmual chu daipawn tlâng thengthaw nuam taka awm, khua aṭanga lên nuam tawk vek chauh tur hi a ni. Thlânmual lam pana ka kal lai chuan ka bula kalte chu tute nge an nih ka hre lo va; hriat pawh ka tum lo. Val siniar lam ka lo ni ve ta bawk a; khawvel nawmna leh hrehawmnate hi chu dai hnem ve ta hlein ka inhria.
        Tleirawl ngaihzawng ṭhen hrehawmzia te, ramhnuai ngawpui chhah mup kara riah hlauhawmzia te, thlasik khaw vawh vanglâia Chalfilh ngaw hnuaiah kawr bânbul pan nena tlaivar hrehawmzia te, ramsa hram mak pui pui kâra kawng bo hlauhawmzia te, pawisa nei lo va vairam awm hrehawmzia te leh tuilian so bulh bulh mai kal kâi tura lawnglêng phui lo chuan hlauhawmzia te pawh ka hriat hnu vek an ni a. Mahse ṭhian ṭha tihah pawh û anga ka en, kawng engkima min kai hruaitu ka sûn meuh chu danglam tak a ni.
            Heh pet fan fan chungin ka kal ve zel a. Tumah ka biak loh avang leh keimah chauha ka kal fâl deuh avangin min en hrek hrek ṭhin tih pawh ka hre reng a, mahse pawi ka ti lo. Thlân kotlâng thleng lovin mipui nawlpui awmna aṭanga fâl deuh thingbuk hnuai thlân pakhat chungah chuan ka ṭhu ta a. A hma lawka ni thum zet khua a chhiat avangin ruah surna hnuhma a la lang tam hle. Hmun ṭhenkhatah phei chuan kawnglaiah tuihâwk a la tling deuh thluah a. Ka ṭhutna bul lawka thlân pakhat phei chu a chim deuh bawk a, tui a la tling luau a ni.


        Hun hnuhnung changa ṭawngṭai chu tunge a nih ka han hre lo va. Eng ang dilna leh malsawmna nge van lamah chuan a han thawn chhoh ka hre hek lo.  Thlân kotlanga hun hmang mêk chuan eng ang dilna mâwi leh nalh pawh chham duahin dak nâl mah se chung lam aṭanga chhânna rawn thleng tur awm anga ka rin hriat chuan ka rilru tâwt leh buainate chu a rawn chhêm kiang duak duakin ka ring lo. A ṭawngṭai thu leh hla ka ṭawmpuia ka ‘amen’ pui vang pawh ni chuang lovin ka maimichhing tlat a. Ka ngaihtuah ber pawh  hriat mang loh châng ka ngah mai.
            Thawm han ri hakah chuan an ṭawngṭai zo tih ka hre thei mai a. Naupang tha za rual chin phei chu hmanhmawh fêin an tlan darh nghal hak a. Jacket ipte zen chungin ka ṭhianpa thlân lam chu ka pan ve ta a ni. Mâkpa leh tlawmngai zualten a thlân an vur lai chu ka lo thlir reng a. Han tihpui ve awm tak pawh a nih teh reng nen ka ti thei der lo. Thlân chu an vur zo va, a lung an phun tak tak hmaa lo ding tur a hming ziahna thing kawkalh pawh an phun fel a. Chutah a thlân vurtute pawh an kal kiang ta. Kei erawh chu ka dinna ngaiah ka la ding ta reng a.
            Rilru pangngai pua ka han hawi chhuah leh meuh chuan khua chu a lo tlai bawih tawh a. Chulai hmun, dam laiten awmhmun ben bel nana kan ram it loh ber, kan pumpelh miah loh tur si hmun khawhara din reng chu a sâwt loh em avang leh a mawi pawh a mawi chiah loh avangin ka kal sawn ve ta a ni.
            In ka han thleng leh chu an lo thâwl deuh hawk tawh a. Zanriah ei a hun dawn tawh avangin vêng hla deuhho chu an lo haw rem deuh duak tawh a ni. In chhûng lût mai lovin pâwn lera paho ti ti chu ka ngaithla a. Chûng patling, hriatna lama kei kani inti ṭhiauho bula dârkâr chanve vel ka awm hnu chuan hmeichhe naupang pakhat hian, “U Chhuan, Nu Sângpuiin a be duh che,” a rawn ti a. ‘Paho tual lai titi aṭang ngawt hi chuan kawrapsawn-te pawh hi awm theia mawi a nih loh hi maw le,’ ti rilru chung zelin chu hmeichhe naupang chu ka zui lût ta a.
            “Chhuana, Mama pa thuchah hi min tihhlawhtlin sak hram ang che aw. Hetiang lamah hi zawng, nang chauh hi a nia a rin ngam. En teh, a hun hnuhnung lamah phei chuan i hming hi a rawn lam fo va. A thuchah che pawh i tihhlawhtlin sak ngei a ring tlat a ni,” tiin Sângpuii chuan ṭap ṭeuhin min lo be mawlh mawlh a. A thil mi pêk hum rauh rauh chungin, “Sângpui, ka theih tawp ka lo chhuah ang e. A nat hrehawm zual laia ka rawn thleng thla hlei thei lo kha ka inthiam lo ngawt mai,” ka ti a. “Kâr a hla a, engtin nge i rawn kal theih ang ni? Damdawi ina a awm lai chuan i lehkhathawnte kha kan chhiar dun a, kan hlim puiin kan rawn sawi fo ṭhin che asin,” a ti leh a. A mittui a sûm zo leh ta lo va. Kei pawhin ka ṭahpui ṭhelh a ni. Chutih lai tak chuan midangin an rawn be bawk a, ka kalsan ta a.
            Sângpuii thil mi pêk chu lehkha ip pakhat leh lehkhabu chhah tak, tuam phui tlat leh lehkha zial ṭawn khawng tlat hi a ni a. Lalchhuanmawia Tochhawng. Camp Area. Thingsulthliah tih hi fiah zetin a lo inziak vek bawk a. Pawn lama a lan dan aṭang ngawt chuan a chhungah eng thil nge inziak rin ngaihna ka hre hlawm lo.
            Zanriah eikhamah kan zaikhawm leh a. Khawtual nula leh tlangval ho chu zan hnih zet an lo tlaivar zawn tawh hlawm avangin an hah hle a. Chumi hre reng chuan val upaten zan dâr riat velah ṭin zai an rêl a. Chu chu kan vêng lamah pawh kan tih dan a nih avangin ka hre thiam hle. Mahse Sangpuii thil mi pêk chu ka en châk tawh em avangin mut mai chu ka tum lo. Ka riahna turte’n khum min siam sakna lamah chuan kalin ka thil hawn chu ka phelh darh ṭan ta a.

            Lehkhabu chhah tak chu Bible a lo ni a. A tuamna hmasa hlui tawhzia leh a ṭawnna hrui balh tawhzia aṭang pawhin tûn hnaia tuam a ni lo tih a hriat hle a ni. Eng vanga chu Bible chu mi pe nge tih hriat tumin ka phelh nghal a. Ka han keu chuan a phêk hmasa berah hian ‘Catherine’ tih hi a lo inziak a. Ka’n keu leh a, nula sam sei deuh mai, a thlalâk aṭang pawha nula tlawntlai ṭha zet zawt tih hriat tak mai hi a lo intâr a. Thlalâk hnuaiah chuan hawrawp ṭha vak lo hian Catherine-i hming chu a inziak leh a. Catherine-i hming chu ka ṭhianpa hnen aṭangin ka hre zing tawh bawka mak ka ti lem lo. Bible chu ka keu thuak thuak hnu-ah engmah thil pawimawh dang awma a lan loh avangin ka dah a. Lehkha inzial chu ka han phelh leh ta a ni. A phêk hmasa ber chung lamah chuan hetiang hian thu min lo chah a. ‘Chhuana, he thil hi ngun takin chhiar la. Min lo kawlhat sak dawn nia. Ka tan chuan a hlu hle a. I tâna a ngaihnawm leh ngaihnawm loh tur zawng ka hre lo; mahse  i theih anga rei n kawl hat tum hram ang che. Tu leh fate pawh i la nei ang a. Zan khat mitchhinte pawh i la tâwk ve ang; chung hun thleng thleng zawng ka sawi thei lo’ tih a lo inziak a. A lehkha ziak chu ka chhiar zawm zel a. Ka rin aiin a lo ngaihnawm a. Chumi zan chuan rei tak ka men phah ta a ni. A thuziak chu hetiang hi a ni e. Khawih danglam miah lovin a ziak ngai ngaiin hetiang hi a ni.

(Heta ang hi chuan ka hianpa thuziak hlir kan chhiar rih dawn a ni. LCM).



Post a Comment

0 Comments